﻿ROMUDENƆ.
5.
Lákũ Luda tò yã bò kũoo nna nà a náani kũ ótɛn kɛ yãi, ó nna kãao sà ó Dikiri Yesu Kirisi gãi. 
A náanikɛnaa gũn o zɛ́ lè a gãi o gɛ̃ Luda gbɛ̃kɛ kũ ó kúoo pìi gũn, akũ ótɛn pↄnna kɛ kũ Luda gakuri kũ ó wɛ́ dↄiio. 
Adi kɛ abiren adoro, ótɛn pↄnna kɛ kũ ó warikɛnaao dↄ, zaakũ ó dↄ̃ kũ wari dì su kũ mɛnao, 
mɛna dì su kũ dà manao, dà mana dì su kũ tãmaaao, 
tãmaa sↄ̃ àdi ó nɛ́ro, zaakũ Luda a yenyĩ dà ó nɛ̀sɛn a Nini kũ à ó gbá gãi. 
Ó gbãnasarikɛ gũn Kirisi gà ókↄ̃nↄ yãvãnikɛrinↄ gɛ̃nɛ ũ gↄrↄ kũ Luda dìtɛa. 
Gana gbɛ̃ mana gɛ̃nɛ ũ aragaro. Ke gbɛ̃ke ni we à ga gbɛ̃ mana gɛ̃nɛ ũ gwɛɛ, 
akũ Luda mↄ̀wɛrɛ deran á yewái nà, zaakũ ó durunnadekɛ gũnn Kirisi gà ó gɛ̃nɛ ũ. 
Lákũ yã bò kũoo nna nà sà a aru yãi, a ó sina Luda pↄfɛ̃a a gãi sika vĩ dↄ yá? 
Yã ó ĩni kũ Ludaomɛ, akũ o kɛ kãao nna a Nɛ́ gana yãi. Lákũ o kɛ kãao nna nà sà, ó surabana a kunna wɛ̃̀ndiio yãi sika vĩ dↄ yá? 
Adi kɛ adikĩnamɛ adoro, ótɛn pↄnna kɛ kũ Ludao dↄ ó Dikiri Yesu Kirisi kũ à tò o kɛ kãao nna gãi. 
Gbɛ̃ mɛ̀n do yãin durunna gɛ̃̀ andunia gũn, akũ durunna ga ì. Lɛmɛ dↄ ga kú gbɛ̃ sĩnda pínkia, kũ gbɛ̃ sĩnda pínki durunna kɛ̀ yãi. 
Durunna kú andunia gũn de Musa doka gↄ̃ gɛ́ su. Gↄrↄ kũ doka kunlo, Luda dí durunna yã daro, 
ama sɛna zaa Adamua ari à gɛ̀ɛ pɛ́ Musaa ga kí blè gbɛ̃ sĩnda pínkia, bee gbɛ̃ kũ odi durunna kɛ lán Adamu sãtɛna bàronↄ. Adamu bi gbɛ̃ kũ ani su takamɛ. 
Ama Luda gba ni sí lɛkↄ̃a kũ Adamu taarioro, zaakũ lákũ gbɛ̃nↄ gà dasi nà Adamu ado sãtɛna yãi, Luda gbɛ̃kɛ kũ a gbao kũ à kà gbɛ̃nↄa dasi Yesu Kirisi ado gbɛ̃kɛ yãi de abirekũla. 
Luda gba ni sí lɛkↄ̃a kũ gbɛ̃ mɛ̀n do durunna pìioro. Taari mɛ̀n do pì mɛ́ à sù kũ yãkpatɛkɛnaao, akũ yã vùtɛ bisãsirinↄa. Taarinↄ sù kũ Luda gbao, akũ yã bò kũ gbɛ̃nↄ nna. 
Lákũ Adamu ado taari mɛ́ à tò ga sù à kí blè nà, Yesu Kirisi ado yã kũ à sùo zↄ̃kↄ̃ de abirekũla. Abire yãi gbɛ̃ kũ Luda gbɛ̃kɛ kɛ̀ńnɛ, kũ à tò yã bò kũńwo nna gba ũnↄ ni kí ble wɛ̃̀ndii gũn. 
Abire yãi lákũ taari mɛ̀n do pìi tò yã vùtɛ buri sĩnda pínkia nà, lɛmɛ dↄ yãmanakɛna mɛ̀n do pìi dì tó buri sĩnda pínki bo mana lɛ ò wɛ̃̀ndi le. 
Lákũ gbɛ̃ mɛ̀n do sãgbãna mɛ́ à tò gbɛ̃nↄ gↄ̃̀ durunnadenↄ ũ dasi nà, lɛmɛ dↄ gbɛ̃ mɛ̀n do yãmana ni tó gbɛ̃nↄ bo mana dasi. 
Doka sù de taari le àgↄ̃ kara yãimɛ. Ama kũ durunna kàra, Luda gbɛ̃kɛ kàra de abirekũla. 
Lákũ durunna kíblenaa sù kũ gao nà, lɛn dↄ Luda gbɛ̃kɛ kíblenaa dì tó ò bo mana lɛ, ò wɛ̃̀ndi kũ àdi lákaro le ó Dikiri Yesu Kirisi gãi. 
