﻿LUKU.
13.
Gↄrↄ birea gbɛ̃kenↄ sù ò Galili gbɛ̃ kũ Pilati ń dɛdɛ à ń aru yã̀katɛ kũ ń sa'obↄ aruonↄ yã ò Yesunɛ. 
Akũ Yesu pìńnɛ: Kũ Galili gbɛ̃ pìnↄ ga de lɛ, átɛn da ń durunna de Galili gbɛ̃ kparanↄ pↄ́lan yá? 
Oi! Matɛn oárɛ, tó ádi nɛ̀sɛ litɛro, á pínki ni ga lán ń bàmɛ. 
Gbɛ̃nↄn baro plansari kũ Siloamu kpɛ́didikↄ̃anaa gbòro à sìḿma ò gàganↄ sↄ̃, átɛn da ń taari de gbɛ̃ kpara kũ ò kú Yurusalɛmunↄ pↄ́lan yá? 
Oi! Matɛn oárɛ, tó ádi nɛ̀sɛ litɛro, á pínki áni ga lán ń bàmɛ. 
Akũ à yã dí lɛ̀kↄ̃ańnɛ à pì: Gbɛ̃ke mɛ́ à kaka lí bà a swadakoo gũn, akũ à gɛ̀ɛ a nɛ́ wɛtɛ adi ero. 
Akũ à pì a zĩkɛriinɛ: Ǹ gwa, a wɛ̃̀ aakↄ̃den dí, kũ madì su nɛ́ wɛtɛ kaka lí pìia mádi ero. Ǹ a zↄ̃, óni tó à gu sí pãn yá? 
Akũ zĩkɛrii pìi pìnɛ: Baa, ǹ tó ari ziki dↄ. Mani gu bi mà likai mà taaki kánɛ. 
Ani gí nɛ́ i zikiro. Tó adi nɛ́ iro sà, mani a zↄ̃ mà nɛ. 
Kámmabogↄrↄ zĩ Yesu tɛn yã dańnɛ aduakɛkpɛn. 
Nↄgbɛ̃ ke kú gwe, tãna a kↄ̃̀nↄ kù à kà wɛ̃̀ baro plansari. Àdigↄ̃ kokonamɛ, àdi fↄ̃ à a zĩda poro bee fítiro. 
Kũ Yesu a è, akũ à a sìsi à pì: Nↄgbɛ̃, n kↄ̃̀nↄkɛ gòmma. 
Akũ à ↄ nàa. Zaa gwe gↄ̃̀nↄ à pòro, akũ à Luda sáabu kpà. 
Akũ aduakɛkpɛ gbɛ̃ zↄ̃kↄ̃ pↄ fɛ̃̀, kũ Yesu a wèrekↄ̃a kámmabogↄrↄ zĩ yãi, akũ à fùtɛ à pì gbɛ̃nↄnɛ: Gↄrↄ suddo mɛ́ à kun kũ òdi zĩ kɛn. Àgↄ̃ su ò á werekↄ̃a gↄrↄ abirenↄa, ama kámmabogↄrↄ zĩ baasi. 
Akũ Dikiri wèa à pì: Manafikidenↄ! Kámmabogↄrↄ zĩ á baadi dì a zù ke zaaki poro a bàdↄkia à gɛ́ í kpáaroo? 
Ibrahĩ buri nↄgbɛ̃ díkĩna sↄ̃, Setan a yĩ̀ wɛ̃̀ baro plansarimɛ. A bàa pìi poronaa kámmabogↄrↄ zĩ zɛ́ vĩroo? 
Kũ à ò lɛ, akũ wé'i a ibɛrɛnↄ kũ̀ ń pínki, ama gbɛ̃nↄ pↄ kɛ̀ nna daboyã kũ àtɛn kɛnↄa pínki. 
Akũ Yesu pì: Bↄ́n kpata kũ à bò Luda kĩnaa bòkↄ̃aoo? Bↄ́n mani kpákũsũoo? 
À de lán musadi wɛ́ bà, akũ gbɛ̃ sɛ̀ à tↄ̃̀ a karaa gũn. Kũ à bùtɛ, à kɛ̀ lí ũ, akũ bãnↄ sù ò dìdi a gã̀nↄa. 
Akũ à pì dↄ: Bↄ́n mani kpata kũ à bò Luda kĩnaa kpákũsũoo? 
À de lán lùbɛnɛ kũ nↄgbɛ̃ sɛ̀ à kà flawa zaka lɛ́ aakↄ̃ gũn, à yã̀katɛ pínki bà. 
Gↄrↄ kũ Yesu tɛn gɛ́ Yurusalɛmu, àtɛn gɛ̃ wɛ̃tɛnↄ kũ lakutunↄla, àtɛn yã dańnɛ, 
akũ ò a là ò pì: Baa, ase gbɛ̃ kũ oni surabana lenↄn dasiroo? Akũ Yesu pì gbɛ̃nↄnɛ: 
À kokari kɛ à gɛ̃ zɛ́lɛ kpakoto gũn. Matɛn oárɛ, gbɛ̃nↄ ni wɛtɛ ò gɛ̃n dasi, ama oni fↄ̃ro. 
Tó bede fùtɛ à zɛ́ tàta à làka, tó a gↄ̃ bàai, akũ átɛn gbà lɛ́, átɛn pi: Baa, ǹ zɛ́ wɛ̃wɛrɛ, ani oárɛ, á á dↄ̃ gukearo. 
Abire gbɛra tó a pìnɛ à pↄ́ blè kãáo, à í mì kãáo, à yã dàńnɛ á bɛ gãnulɛa, 
ani oárɛ á á dↄ̃ gukearo. À goala á yãvãnikɛrinↄ á pínki. 
Tó a Ibrahĩ kũ Isaakuo kũ Yakubuo kũ annabinↄ è pínki kpata kũ à bò Luda kĩnaa gũn, akũ ò á zú bàai, gwen áni ↄ́ↄ dↄn, à ↄ di á mìia. 
Gbɛ̃nↄ ni bo ifãboki kpa kũ ifãlɛtɛ kpao kũ gugbãnduruo kũ gɛ̀nↄmidↄkio, oni su pↄ́ ble kpata kũ à bò Luda kĩnaa gũn. 
Lɛn gbɛ̃ kpɛdenↄ nigↄ̃ gbɛ̃ káakunↄ ũ lɛ, gbɛ̃ káakunↄ nigↄ̃ gbɛ̃ kpɛdenↄ ũ. 
Gↄrↄ birea gↄ̃̀nↄ Farisi kenↄ sù Yesu kĩnaa ò pìnɛ: Ǹ futɛ gu dín, zaakũ Hɛrↄdu ye à n dɛmɛ. 
Akũ à pìńnɛ: À gɛ́ o flɛ̃ pìinɛ, matɛn tãnanↄ goḿma, matɛn gyãrenↄ werekↄ̃a gbãra kũ ziao, a gↄrↄ aakↄ̃de zĩ sↄ̃ mani ma zĩ papa. 
Bee kũ abireo séto mà gɛ́ arɛ gbãra kũ ziao kũ ziandoo, zaakũ adi kũ annabi ga gukearo, sé Yurusalɛmu. 
Yurusalɛmudenↄ, Yurusalɛmudenↄ! Adì annabinↄ dɛdɛ, adì gbɛ̃ kũ Luda ń zĩáwanↄ pápa kũ gbɛ̀ɛo, à ń dɛdɛ. Madìgↄ̃ ye mà á kakaramai gɛ̃̀n baaakↄ̃, lákũ ko dì dɛ̀mbɛrɛ kú a nɛ́nↄla nàmɛ, ama adì weiro. 
Luda ni á kpɛ́ tóárɛ bɛzĩ ũmɛ sà. Matɛn oárɛ, áni ma e doro ari à pi, arubarikaden gbɛ̃ kũ àtɛn su kũ Dikiri tↄ́o ũ. 
