﻿LUKU.
12.
Gↄrↄ birea gbɛ̃nↄ kàkarai, ò ń lɛ́ dↄ̃ro, ari òtɛn gɛ̀sɛ pɛ́tɛpɛtɛkↄ̃a, akũ à yã ò a ìbanↄnɛ gĩa à pì: À laakari kɛ Farisinↄ lùbɛnɛɛi. Àkũmɛ ń manafiki ũ. 
Pↄ́ke kun utɛna kũ ani bo gupuraaro. Asiriyã ke kun kũ oni gí dↄ̃iro. 
Lɛmɛ dↄ yã kũ a ò gusiran, oni ma gupuraa, asiriyã kũ a ò kↄ̃ sãn kpɛ́ tú, oni a kpàkpa kɛ gãnu arɛ. 
Ma gbɛ̃nnanↄ, matɛn oárɛ, gbɛ̃ kũ oni mɛ̀ kakatɛ a gbɛra oni fↄ̃ ò yãke kɛárɛ doronↄ, àsun vĩna kɛńnɛro. 
Mani gbɛ̃ kũ à de à vĩna kɛnɛ oárɛ. À vĩna kɛ Ludanɛ kũ à gbãna vĩ à á zu tɛ́ gũn mɛ̀kaatɛnaa gbɛra. Ee, matɛn oárɛ, à vĩna kɛnɛ. 
Òdi bãntoro mɛ̀n sↄↄro yía kↄbↄ plaroo? Ama bee ń ke yã dì sã Ludanlo. 
Bee á mìkãnↄ, à a lɛ́ dↄ̃. Ásun vĩna kɛro, á bɛ̀ɛrɛ de bãntoro dasinↄla. 
Matɛn oárɛ, gbɛ̃ kũ à zɛ̀ kũmao gbɛ̃nↄ arɛ, Bisãsiri Nɛ́ ni zɛ kãao Luda malaikanↄ arɛ. 
Gbɛ̃ kũ à ledi kpàmai gbɛ̃nↄ arɛ sↄ̃, mani ledi kpái Luda malaikanↄ arɛ. 
Tó gbɛ̃ Bisãsiri Nɛ́ vãni bò, Luda ni a kɛ̃. Ama tó gbɛ̃ Luda Nini tↄ́ vãni sì, ani kɛ̃nɛro. 
Tó òtɛn gɛ́ kãáo yãkpatɛkɛkia aduakɛkpɛn ke kínanↄ kũ gbãnadenↄ arɛ, àsun á zĩda bona damu kɛro ke yã kũ áni o, 
zaakũ Luda Nini mɛ́ ani yã kũ à de à o daárɛ zĩ birea. 
Zàa gũn gbɛ̃ke pì Yesunɛ: Dannɛri, ǹ o ma vĩ̀ninɛ à ma baka kpáma ó túbi gũn. 
Akũ à wèa à pì: Ma gbɛ̃, dí mɛ́ à ma ditɛ á yãkpatɛkɛri ke á yãgↄ̃gↄ̃ri ũu? 
Akũ à pì gbɛ̃nↄnɛ: Àgↄ̃ á zĩda kũna dↄ̃. À laakari kɛ pↄ́ sĩnda pínki aniapãsĩkɛnaai, zaakũ aruzɛkɛ bi bisãsiri wɛ̃̀ndinlo, bee tó à fↄ̃̀ àgↄ̃ didikↄ̃a dia. 
Akũ à yã lɛ̀kↄ̃ańnɛ à pì: Ɔgↄde mɛ́ à kun a bura pↄ́ble kɛ̀nɛ manamana, 
akũ à laasun lɛ̀ à pì: Bↄ́n mani kɛɛ? Má pↄ́wɛkaki vĩro. 
Akũ à pì: Yã kũ mani kɛn dí: Mani ma pↄ́katɛkinↄ gboro, mani a zↄ̃kↄ̃nↄ bo, mani ma pↄ́wɛ kán pínki kũ ma aruzɛkɛnↄ. 
Mani pi ma zĩdanɛ: Gbɛ̃, n gĩnakɛ ń pↄ́ mana vĩ zↄ̃kↄ̃, kũ ani ká kũnwo wɛ̃̀ ũgbangbaa? Ǹ kámma bo, ǹ pↄ ble, ǹ í mi, ǹ pↄnna kɛ. 
Akũ Luda pìnɛ: Yↄ̃nkↄ, gwãaniala mani n wɛ̃̀ndi gbɛkamma. Soru kũ n kɛ̀ ni gↄ̃ dí pↄ́ ũmɛɛ? 
Lɛmɛ gbɛ̃ kũ à aruzɛkɛ tↄ̃̀kↄ̃ai, ama à de ↄgↄde ũ Ludanɛro yã de lɛ. 
Akũ à pì a ìbanↄnɛ: Abire yãi matɛn oárɛ, àsun á wɛ̃̀ndi damu à pi bↄ́n óni blero, àsun á mɛ̀ damu kɛ à pi bↄ́n óni daro. 
Wɛ̃̀ndi de pↄ́blela. Mɛ̀ de pↄ́kasala. 
À kãakãannanↄ gwa. Òdi pↄ́ tↄ̃ro, òdi pↄ́ kɛ̃ro, ò dↄ̃̀ ke gbàsↄ vĩro, bee kũ abireo Luda dì ń gwa. Á bɛ̀ɛrɛ vĩ manamana de bãnↄla fá! 
Á tɛ́, dí mɛ́ ani fↄ̃ à a wɛ̃̀ndi gbã̀na kara, bee gↄrↄ do, a damukɛnaa gũnn? 
Tó áni yã fíti dí fↄ̃ro, bↄ́yãi átɛn yã kparanↄ damu kɛɛ? 
À lávunↄ gwa sɛ̃̀n lákũ ò de nà. Òdi zĩ kɛro, òdi buu tãro, ama matɛn oárɛ bee Sulemanu kũ a aruzɛkɛo, adi uta da a mana kà ń ke ũro. 
Sɛ̃̀la kũ à kun gbãra ani tɛ́ kũ zia, lákũ Luda dì pↄ́ nai lɛ nà, oni ákↄ̃nↄ ludanaanikĩanadenↄ pↄ́ o dↄ yá? 
Ásun tó pↄ́ kũ áni ble ke pↄ́ kũ áni mi yã doárɛ arɛro. Ásun a damu kɛro. 
Andunia dí burinↄn pↄ́ pìnↄ pínki yã dì dↄńnɛ arɛ, á De sↄ̃ à dↄ̃ kũ pↄ́ pìnↄ kↄ̃ sì kãáo. 
À tó kpata kũ à bò a kĩnaa yã doárɛ arɛ, ani pↄ́ pìnↄ karaárɛ. 
Ma kpàsa fíti gbɛ̃nↄ, àsun vĩna kɛro, zaakũ á De pↄyenyĩnaamɛ à á kpá kpataa pìn. 
À pↄ́ kũ á vĩnↄ yá, à takasidenↄ gba a ↄgↄ. À ↄgↄsↄ̃nↄ kũ àdi zĩ kũro zↄ̃, ludambɛ aruzɛkɛ kũ àdi lákaro káki ũ, kũ kpãni dì nairo, kↄ̀kↄ sↄ̃ àdi a yakaro. 
Zaakũ gu kũ á aruzɛkɛ kún, gwen á laakari nigↄ̃ kun se. 
Àgↄ̃ kú soru gũn, à tó á fitila gↄ̃ nana. 
Àgↄ̃ de lán gbɛ̃ kũ òtɛni ń dikiri suna dã à su kũ nↄsɛ pↄnnakɛnaao bà, de gↄrↄ kũ à sù à gbàa lɛ̀, oni zɛ́ wɛ̃nɛ gↄ̃̀nↄ. 
Arubarikadenↄn zĩkɛri kũ ń dikiri ni ń le bɛ̃nɛ a sugↄrↄanↄ ũ. Yãpuran matɛn oárɛ, dikirii pì ni a pↄ́nↄ kɛkɛ à yĩ, ani ń vutɛ, ani pↄ́ble kakarańnɛ. 
Bee tó à sù lizãndo ke kↄnkↄkↄnkↄ, tó à ń lé lɛ, arubarikadenↄmɛ á ũ. 
Àgↄ̃ yã dí dↄ̃. Tó bede gↄrↄ zaka kũ kpãni ni suawa dↄ̃̀ yã, de ani tó à a kpɛ́ fↄ̃ro. 
Ákↄ̃nↄ sↄ̃, àgↄ̃ kú kũ soruo, zaakũ Bisãsiri Nɛ́ ni su gↄrↄ zaka kũ á wɛ́ dↄiro. 
Pita pì: Dikiri, ó yãin n yã pìi lɛ̀kↄ̃a yá, ke gbɛ̃ sĩnda pínki yãimɛ? 
Dikiri pì: Dín bɛgwari náanide laakaride kũ a dikiri dì a zĩkɛrinↄ nanɛ a ↄĩ, à pↄ́ble kpáḿma a gↄrↄa ũu? 
Arubarikadenↄn zĩkɛri kũ a dikiri a lè, àtɛn kɛ lɛ a sugↄrↄa ũ. 
Yãpuran matɛn oárɛ, ani a aruzɛkɛ sĩnda pínki nanɛ a ↄĩmɛ. 
Ama tó zĩkɛrii pìi pì a nɛ̀sɛɛ gũn, a dikiri suna tɛn gì kɛ sↄ̃, akũ à nà a zĩkɛri dakenↄ gbɛ̃gbɛ̃naaa, gↄ̃gbɛ̃nↄ kũ nↄgbɛ̃nↄ, àtɛn sãnkara pↄ́ ble, àtɛn wɛ̃dɛ kɛ, 
a dikiri ni su gↄrↄ kũ a wɛ́ dↄiroamɛ, gↄrↄ zaka kũ à dↄ̃roa, ani a zↄ̃zↄ̃kↄ̃rɛ à a baka da kũ kifirinↄ. 
Zĩkɛri kũ à a dikiri pↄyenyĩna dↄ̃, akũ adi soru kɛ à a pↄyeinaa kɛ̀ro, oni a gbɛ̃ búgubugu. 
Zĩkɛri kũ à a dikiri pↄyenyĩna dↄ̃ro, akũ à yã kũ à de ò a gbɛ̃ kɛ̀ sↄ̃, oni a gbɛ̃ fítimɛ. Gbɛ̃ kũ Luda a gbà zↄ̃kↄ̃ Luda ni wɛtɛa zↄ̃kↄ̃. Gbɛ̃ kũ Luda pↄ́ nànɛ a ↄĩ zↄ̃kↄ̃, ani gbɛkaa deńla. 
Tɛ́n ma su na anduniaa, mádi gii tɛ́ pì gↄ̃ kũ se teraro. 
Má wɛ́tãmma vĩ kũ mani gɛ̃n. Má kú laasun zↄ̃kↄ̃ↄ gũn ari à gɛ́ lákao. 
Átɛn da ma su de gbɛ̃nↄ gↄ̃ nna kũ kↄ̃o andunia gũnn yá? Oi! Matɛn oárɛ, kɛ̃kɛ̃kↄ̃ana yãin ma su. 
Zaa tera ↄn kũ gbɛ̃nↄn sↄↄronↄn kún, oni kↄ̃ kpaatɛtɛ. Gbɛ̃nↄn aakↄ̃nↄ ni bo gbɛ̃nↄn planↄ kpɛ, gbɛ̃nↄn planↄ ni bo gbɛ̃nↄn aakↄ̃nↄ kpɛ. 
De ni bo a nɛ́gↄ̃gbɛ̃ kpɛ, nɛ́gↄ̃gbɛ̃ ni bo a de kpɛ. Da ni bo a nɛ́nↄgbɛ̃ kpɛ, nɛ́nↄgbɛ̃ ni bo a da kpɛ. Zã da ni bo nↄzãre kpɛ, nↄzãre ni bo a zã da kpɛ. 
Yesu pì gbɛ̃nↄnɛ: Tó a è legũ tɛn sisi ifãlɛtɛ kpa, áni pi gↄ̃̀nↄ, legũ ni ma, akũ àdi kɛ lɛ. 
Tó a è ĩa tɛn bo gɛ̀nↄmidↄki kpa, áni pi, gu ni wã, akũsↄ̃ àdi wã. 
Manafikidenↄ! Á zĩtɛ kũ musuo wɛ́ dↄ̃kↄ̃i, akũ á gↄrↄ dí yáasi dↄ̃ sↄ̃ro bi? 
Bↄ́yãi á yãkɛna a zɛ́a dↄ̃ á zĩdaaroo? 
Tó n ibɛrɛ tɛn gɛ́ kũnwo yãkpatɛkɛkia, ǹ kokari kɛ de à gaafara kɛnnɛ zaa zɛ́n, de àsun n gátɛ à gɛ́ kũnwo yãkpatɛkɛri kĩnaaro yãi. Tó ńdi kɛ lɛro, yãkpatɛkɛrii pì ni n kpá dogariia, dogari ni n da kpɛ́siran. 
Matɛn onnɛ, ĩni bo gwero ari ǹ gɛ́ fĩna boo pínki. Bee kↄbↄ ni gↄ̃ tɛ́nyĩro. 
