﻿MATIU.
27.
Kũ gu dↄ̀ kↄnkↄkↄnkↄ sa'orikinↄ kũ Yuda gbɛ̃ zↄ̃kↄ̃nↄ ń pínki yã gↄ̃̀gↄ̃ Yesui de ò a dɛ. 
Ò a yĩ̀, akũ ò gɛ̀ɛ ò a nà bùsu gbɛ̃ zↄ̃kↄ̃ Pilatinɛ a ↄ̃i. 
Kũ Yudasi kũ à bò a kpɛ è yã dàala, à gↄ̃̀ díndↄ̃mɛnɛ gũn, akũ à gɛ̀ɛ andurufu ↄgↄ mɛ̀n baraakurii pì ɛra sa'orikinↄnɛ kũ gbɛ̃ zↄ̃kↄ̃nↄ 
à pìńnɛ: Ma durunna kɛ̀, ma taarisaride kpà gai. Akũ ò pìnɛ: Ó bàka ũgbaa? N yãn gwe. 
Akũ Yudasi ↄgↄ pìi zù Luda kpɛ́n, akũ à tà à gɛ̀ɛ à a zĩda lòko. 
Akũ sa'orikinↄ ↄgↄ pìi sɛ̀tɛ ò pì: Ɔgↄ pì kana Luda kpɛ́ ↄgↄdaki gũn zɛ́ vĩro, zaakũ gbɛ̃dɛ'ↄgↄmɛ. 
Kũ ò yã gↄ̃̀gↄ̃, akũ ò orobori gbĩ̀dãki lù kũ ↄgↄ pìio nibↄnↄ vĩki ũ. 
Abire yãi ari kũ a gbãrao òdi pi zĩtɛ pìinɛ Zĩtɛ Arude. 
Akũ yã kũ annabi Ilimia òo kɛ̀ à pì: Ò andurufu ↄgↄ mɛ̀n baraakurii pìi sɛ̀tɛ, ↄgↄ kũ Isarailanↄ zɛ̀o ò kpà a yã musu pìi, 
akũ ò orobori gbĩ̀dãki lùo, lákũ Dikiri dìtɛmɛnɛ nà. 
Yesu zɛna bùsu gbɛ̃ zↄ̃kↄ̃ arɛ. Akũ gbɛ̃ zↄ̃kↄ̃ↄ pì a là à pì: Mↄkↄ̃n Yudanↄ kína ũ yá? Yesu wèa à pì: Lɛn n ò lɛ. 
Gↄrↄ kũ sa'orikinↄ kũ gbɛ̃ zↄ̃kↄ̃nↄ tɛn yã didia, adi yãke weḿmaro. 
Akũ Pilati pìnɛ: Ńdi yã dasi kũ òtɛn didimma maroo? 
Ama Yesu dí yãke o yã pìnↄ doke musuro, akũ yã pìi bò bùsu gbɛ̃ zↄ̃kↄ̃ↄ pìi sarɛ manamana. 
Vĩnla dikpɛ zĩ pínki bùsu gbɛ̃ zↄ̃kↄ̃ↄ pìi dì purusunanↄ do kũ gbɛ̃nↄn yei gbarɛńnɛ. 
Gↄrↄ kũ̀a sↄ̃ purusuna tↄ́de kú gwe òdi pi Baraba. 
Kũ pari kàkara, akũ Pilati ń lá à pì: Dín á ye mà gbarɛárɛɛ? Baraban yá, ke Yesu kũ òdi pi Arumasihu? 
Zaakũ à dↄ̃ kũ nɛ̀sɛgↄ̃ba vĩna kũ Yesuo yãin ò a kpàawa. 
Gↄrↄ kũ Pilati vutɛna a gbĩ̀gbaaa, a nanↄ gbɛ̃ zĩ̀a à pì: Ǹsun yãke kɛ gbɛ̃ mana pìinɛro, zaakũ nana kũ ma ò a yã musu gĩa gwãani wari dↄ̀ma manamana. 
Sa'orikinↄ kũ gbɛ̃ zↄ̃kↄ̃nↄ nàkara gbɛ̃nↄa ò Baraba gbɛka, ò pi ò Yesu dɛ. 
Akũ bùsu gbɛ̃ zↄ̃kↄ̃ↄ pìi ń lá à pì: Gbɛ̃nↄn pla pìnↄ gũn, dín á ye mà gbarɛárɛɛ? Akũ ò pì, Barabamɛ. 
Akũ Pilati ń lá à pì: Bↄ́n mani kɛ kũ Yesu kũ òdi pi Arumasihuoo? Gbɛ̃ sĩnda pínki pì: Ǹ a pá lía. 
Akũ à ń lá à pì: Bↄ́ dàan à kɛ̀ɛ? Akũ ò wiki lɛ̀ ò kàra ò pì: Ǹ a pá lía. 
Kũ Pilati è áni fↄ̃ à yãke kɛro, zuka tɛn kara, akũ à í dã̀, à a ↄ pìpi gbɛ̃nↄ wára à pì: Ma ↄ bↄ̀tɛ gbɛ̃ pì gana yãn. Á yãmɛ. 
Akũ gbɛ̃ pìnↄ pì: A dɛna yã wí ó musu kũ ó nɛ́nↄ. 
Akũ à Baraba gbàrɛńnɛ, à pì ò Yesu gbɛ̃ kũ flã̀ao ò a pá lía. 
Akũ Pilati sozanↄ gɛ̃̀ kũ Yesuo bùsu gbɛ̃ zↄ̃kↄ̃ↄ pì bɛa, akũ ò ń gã̀ kàkara pínki ò lìkai. 
Ò a pↄ́nↄ bↄ̀tɛa ò arukĩmba tɛ̃ra dànɛ, 
akũ ò lɛ̀ fùraa tã̀ ò kùnɛ, ò leba nànɛ a ↄplan gò ũ. Akũ òtɛn kútɛkutɛnɛ, òtɛni a fobo òtɛn pi: Fↄↄ, Yudanↄ kína! 
Ò lɛ́'i sùa, ò leba pìi sɛ̀ ò a lɛ̀o a mìia. 
Kũ ò a fobò ò làka, akũ ò arukĩmba pìi gòala ò a zĩda pↄ́kasanↄ dànɛ, akũ òtɛn gɛ́ a pá lía. 
Kũ ò bↄ̀tɛ òtɛn gɛ́, ò dàkarɛ kũ Sirɛni gbɛ̃ kũ òdi pi Simↄo, akũ ò gã nàa à Yesu lígbãndurukpana sɛ́. 
Akũ ò kà gu kũ òdi pi Gↄgↄta kũ à pì mìtokoki. 
Akũ ò sèwɛ̃ kũ ò yã̀katɛ kũ ɛzɛo dↄ̀nɛ à mi. Kũ à í kɛ̀, akũ à gì mii. 
Kũ ò a pà lía, akũ ò kàpaa kpà ò a pↄ́kasanↄ kpàatɛkↄ̃nɛ. 
Akũ ò vùtɛ òtɛni a dãkpã gwe. 
Ò yã kũ ò dìaa kɛ̃̀ ò nà a mìla ò pì: 
Akũ ò kpãni wɛ́dewɛnↄ pà lía a sarɛ gbɛ̃nↄn pla, gbɛ̃ do a ↄplai, gbɛ̃ do a ↄzɛi. 
Gbɛ̃ kũ òtɛn gɛ̃ zɛ́la gwenↄ tɛni ń mì kɛ dékũdekũ, òtɛni a sↄ̃sↄ̃ 
ò pì: Mↄkↄ̃n kũ n pì ĩni Luda kpɛ́ wí ǹ ɛra ǹ bo gↄrↄ aakↄ̃ daguran gweroo? Tó mↄkↄ̃mmɛ Luda Nɛ́ ũ, ǹ n zĩda sura ba ǹ kipa lía. 
Lɛmɛ dↄ sa'orikinↄ kũ ludayãdannɛrinↄ kũ gbɛ̃ zↄ̃kↄ̃nↄ tɛni a fobo lɛ ò pì: 
À gbɛ̃ pãndenↄ sura bà, ama ani fↄ̃ à a zĩda sura baro. Isarailanↄ kínanloo? À kipa lía tera, óni a náani kɛ. 
À Luda náani vĩ. Tó Luda yei, à a bo sà, zaakũ à pì akãamɛ Luda Nɛ́ ũ. 
Bee kpãni kũ ò ń pá lía lɛɛlɛnↄ tɛni a sↄ̃sↄ̃ lɛ dↄ. 
Kũ ifãntɛ̃ kà mìdangura, akũ gusira dà bùsuu pìla pínki ari fãnantɛ̃ mↄ̀ aakↄ̃. 
Fãnantɛ̃ mↄ̀ aakↄ̃n Yesu wiki lɛ̀ gbãnagbãna à pì: Ɛloi, Ɛloi, lɛma sabatani! Abirekũ pì, ma Luda, ma Luda, à kɛ̀ dera n ma tonn? 
Kũ gbɛ̃ kũ ò zɛna gwe kenↄ yã pìi mà, akũ ò pì: Dake tɛn Iliasu sísi. 
Zaa gwe gↄ̃̀nↄ ń gbɛ̃ do bàa lɛ̀ à gɛ̀ɛ à sako sɛ̀ à dà sèwɛ̃ kpã̀kpãa gũn, à fĩ̀fĩ lebaa, akũ à dↄ̀ Yesunɛ à mi. 
Akũ gbɛ̃ kparanↄ pì: À zɛ gĩa ò gwa tó Iliasu ni su à a sura ba. 
Yesu ɛ̀ra à wiki gbãna lɛ̀ dↄ, akũ à a wɛ̃̀ndii gbàrɛ. 
Akũ Luda kpɛ́ lábure kɛ̃̀kↄ̃a pla bona musu suna zĩtɛ. Zĩtɛ yĩ̀gãyĩgã, gbɛ̀nↄ pàrapara, 
miranↄ wɛ̃̀wɛ̃, akũ Luda gbɛ̃nↄ fùtɛ bona gan dasi. 
Yesu vuna gan gbɛra ò bↄ̀tɛ miran, ò gɛ̃̀ Luda wɛ̃tɛn, gbɛ̃nↄ ń é dasi. 
Kũ sozanↄ gbɛ̃ zↄ̃kↄ̃ kũ a gbɛ̃ kũ òtɛn Yesu dãkpãnↄ zĩtɛ yĩgãyĩgãnaa pìi è kũ yã kũ ò kɛ̀nↄ pínki, vĩna ń kũ manamana ò pì: Yãpuramɛ Luda Nɛ́n gbɛ̃ dí ũ. 
Nↄgbɛ̃nↄn kú gwe dasi, òtɛn gu gwa zã̀ dire. Ò tɛ́ Yesui bona Galilimɛ, òdigↄ̃ pↄ́ble kɛnɛ. 
Ń tɛ́n Mariama Magadalɛni kun kũ Mariamao Yamisi kũ Yusufuo da kũ Zebedi nɛ́nↄ dao. 
Kũ ↄkↄsi kɛ̀, Arimatea gbɛ̃ ↄgↄde kũ òdi pinɛ Yusufu sù. Yesu ìbaamɛ dↄ. 
À gɛ̀ɛ à Yesu gɛ̀ɛ gbɛ̀ka Pilatia, akũ Pilati pì ò kpáa. 
Kũ Yusufu gɛ̀ɛ pìi sɛ̀, a táaru biza dufu fĩ̀fĩa, 
à a dà a zĩda gbɛ̀wɛɛ kũ ò sↄ̀ mira ũ gũn. Akũ à gbɛ̀ gbɛ̃̀ntɛ̃ɛ gbigiri kɛ̀ à tà wɛ̀ɛ pìlɛ à tà. 
Mariama Magadalɛni kũ Mariama pãnde pìio vutɛna gwe, ò arɛdↄna miraa. 
Kũ gↄrↄ lìtɛ, kámmabogↄrↄ zĩ kà, akũ sa'orikinↄ kũ Farisinↄ gɛ̀ɛ Pilati kĩnaa lɛɛlɛ 
ò pì: Yã kũ gbɛ̃kɛkɛrii pìi ò a bɛ̃nɛ zĩ dↄógu à pì, gↄrↄ aakↄ̃ gbɛra áni vu. 
Ǹ tó ògↄ̃ mira pì dãkpã ari a gↄrↄ aakↄ̃de zĩ. Tó lɛnlo, a ìbanↄ ni su ò a gɛ̀ sɛ́ kpãni, oni o gbɛ̃nↄnɛ à fùtɛ bona gan. Ɛ́kɛ kpɛ bire nigↄ̃ de a káakupↄla. 
Akũ Pilati pìńnɛ: À sozanↄ sí à gɛ́ à mira pì dãkpã lákũ áni fↄ̃ nà. 
Akũ ò gɛ̀ɛ ò sèedaa kɛ̀ miragbɛɛa, ò sozanↄ tò gwe ògↄ̃ dãkpã. 
