﻿MATIU.
24.
Yesu bò Luda ↄnn àtɛn tá, akũ a ìbanↄ nàai ò lɛ́zuki kɛ̀nɛ a kpɛ́nↄa. 
Akũ Yesu pìńnɛ: A abirekũ è pínki yá? Yãpuran matɛn oárɛ, oni gbɛ̀ ke tó dikↄ̃aro, oni gboro pínkimɛ. 
Gↄrↄ kũ Yesu vutɛna Kùkpɛ sĩ̀sĩgɛrɛɛi, a ìbanↄ sù a kĩnaa gusarɛ, ò a là ò pì: Ǹ owɛrɛ, bↄrɛn yã dínↄ ni kɛɛ? Bↄ́ mɛ́ anigↄ̃ de n suna kũ andunialakagↄrↄo sèeda ũu? 
Yesu wèḿma à pì: À laakari kɛ, àsun tó ò á sãtɛro. 
Zaakũ oni su dasi kũ ma tↄ́o, onigↄ̃ pi Arumasihumɛ ń ũ, oni gbɛ̃nↄ sãtɛ dasi. 
Áni zĩ̀nↄ baaru ma kũ a òpiio. Àsun bídi kɛro. Sé abirekũnↄ kɛ, ama gↄrↄ lakana kpɛ́. 
Buri kũ burio ni futɛ kũ kↄ̃o, lɛmɛ dↄ bùsu kũ bùsuuo. Nà kũ zĩtɛ yĩgãyĩgãnaao nigↄ̃ kú gukenↄn. 
Yã birenↄ pínki nↄ̀wãwã naana ũ. 
Abire gbɛra oni á kũkũ ò á kpáḿma, ò wɛ́ tãáwa ò á dɛ, buri sĩnda pínki ni zãágu ma yãi. 
Gbɛ̃nↄ ni fuma dasi, ò bo kↄ̃ kpɛ, oni zãkↄ̃n. 
Annabi ɛ́kɛnↄ ni su dasi ò gbɛ̃nↄ sãtɛ dasi. 
Yã vãni ni kↄ̃, gbɛ̃nↄ yenyĩ ni busa dasi. 
Gbɛ̃ kũ à zɛna gbãna ari a gↄrↄ lɛ́a mɛ́ ani surabana le. 
Oni kpata kũ à bò Luda kĩnaa pì baaru kpá andunia gu sĩnda pínkia sèeda ũ buri sĩnda pínkinɛ, gbasa pↄ́ pínki ni láka. 
Tó a tɛ̃̀ guyakari kũ annabi Daniɛli a yã òo è Luda ↄnn, kyókɛri gↄ̃ dↄ̃, 
gbɛ̃ kũ ò kú Yudeanↄ bàa sí ò mì pɛ́ kpinↄa. 
Gbɛ̃ kũ à kú a kpɛ́ musu sún kipa à gɛ̃ kpɛ́ gũn à pↄ́ke sɛ́ à booro. 
Gbɛ̃ kũ à kú bura sún ɛra bɛ à a uta sɛ́ro. 
Waiyoo nↄ̀sindarenↄ kũ nɛ́randenↄ gↄrↄ birea. 
À adua kɛ de bàasinaa pì sún kɛ bunsirɛ ke kámmabogↄrↄ zĩro. 
Zaakũ gↄrↄ pì wɛ́tãmma nigↄ̃ zↄ̃kↄ̃. Zaa gↄrↄ kũ Luda andunia kɛ̀ ari gbãra, a taka dí kɛro, akũsↄ̃ ani kɛ zikiro. 
Tó Luda dí gↄrↄ pìnↄ lagoro, de gbɛ̃ke ni boro. Ama ani gↄrↄ pìnↄ lago a gbɛ̃ kũ à ń sɛ́nↄ yãimɛ. 
Gↄrↄ birea tó gbɛ̃ke pìárɛ, à Arumasihu gwa la kesↄ̃ à Arumasihu gwa zãa, àsun síro. 
Zaakũ Arumasihu ɛ́kɛnↄ kũ annabi ɛ́kɛnↄ ni su ò sèeda zↄ̃kↄ̃nↄ kũ daboyãnↄ kɛ, de ò gbɛ̃ kũ Luda ń sɛ́nↄ sãtɛo se, tó ani sí kɛ. 
À ma, ma gĩnakɛ ma òárɛ zaa káaku kↄ̀. 
Tó ò pìárɛ à gwa, à kú sɛ̃̀n, àsun gɛ́ro. Ke tó ò pìárɛ à gwa, à kú kpɛ́nɛ gũn, àsun síro. 
Zaakũ lákũ legũ dì pí à ludambɛ pura kũ zaa ifãboki kpa ari a lɛ́tɛ kpa nà, lɛn Bisãsiri Nɛ́ suna nigↄ̃ de lɛ. 
Gu kũ gɛ̀ kún, gwen yumburukunↄ ni kↄ̃ kakaran. 
Gↄrↄ pìnↄ wɛ́tãmma gbɛra gↄ̃̀nↄ ifãntɛ̃ ni sira kũ, mↄvura ni í kɛro, susunɛnↄ ni wowo ludambɛ, gbãna kũ ò kú musunↄ ni dege. 
Bisãsiri Nɛ́ sèeda gbasa à bo ludambɛ, buri kũ ò kú andunia gũnnↄ ni ń zĩda kɛ̃kɛ̃ ń pínki, oni Bisãsiri Nɛ́ suna e ludambɛ lukun kũ gbãnao kũ gakuri zↄ̃kↄ̃ↄo. 
Ani a malaikanↄ zĩ kũ kãkãki'ũ gbãnao, oni a gbɛ̃ kũ à ń sɛ́nↄ kakara andunia kusuru siikↄ̃a zaa ludambɛ lɛ́ díkũ kũ a lɛ́ direkũo. 
À yã dada kaka lía. Tó a gã̀nↄ í kpàkpa, àtɛn lá bↄ̀tↄ kú, á dↄ̃ guwãnagↄrↄ kà kãni. 
Lɛmɛ sↄ̃, tó a yã pìnↄ è pínki lɛ, àgↄ̃ dↄ̃ kũ a sunaa kà kãni, à kú kpɛ́lɛlɛa. 
Yãpuran matɛn oárɛ, gↄrↄ dí gbɛ̃nↄ ni gɛ̃tɛro ari yã pìnↄ gɛ́ kɛo pínki. 
Musu kũ zĩtɛo ni gɛ̃tɛ, ama ma yãnↄn gɛ̃tɛna vĩro. 
Gbɛ̃ke a gↄrↄ ke a gↄrↄ zaka dↄ̃ro, bee malaika kũ ò kú musunↄ ke Luda Nɛ́, sé De Luda. 
Lákũ à de nà Nuhu gↄrↄ, lɛn anigↄ̃ de lɛ se Bisãsiri Nɛ́ sugↄrↄa. 
Gↄrↄ kũ í dí da andunialaro, òtɛn pↄ́ ble òtɛn í mi, òtɛn nↄ sɛ́ òtɛn zã kɛ ari Nuhu gɛ̀ɛ à gɛ̃̀ gó'itɛ gũn. 
Odi dↄ̃ro, akũ í sù à ń sɛ́tɛ ń pínki. Lɛn anigↄ̃ de lɛ se Bisãsiri Nɛ́ sugↄrↄa. 
Gↄrↄ birea gbɛ̃nↄn planↄ nigↄ̃ kú bura, oni gbɛ̃ do sɛ́ ò gbɛ̃ do tón. 
Nↄgbɛ̃ gbɛ̃nↄn planↄ nigↄ̃ pↄ́ lↄ́lↄ gbɛ̀n, oni gbɛ̃ do sɛ́ ò gbɛ̃ do tón. 
Abire yãi á wɛ́ gↄ̃ dↄ, zaakũ á dↄ̃ gↄrↄ kũ á Dikiri ni suro. 
Àgↄ̃ adikĩna dↄ̃. Tó bede gↄrↄ zaka kũ kpãni ni suawa dↄ̃̀ yã, de á wɛ́ gↄ̃ dↄ, ani tó à a kpɛ́ fↄ̃ro. 
Abire yãi ákↄ̃nↄ sↄ̃, àgↄ̃ kú kũ soruo, zaakũ Bisãsiri Nɛ́ ni su gↄrↄ zaka kũ á wɛ́ dↄiroamɛ. 
Dímɛ zĩkɛri náanide laakaride kũ a dikiri a zĩkɛrinↄ nànɛ a ↄĩ de à pↄ́ble kpáḿma a gↄrↄa ũu? 
Arubarikaden zĩkɛri kũ a dikiri a lè àtɛn kɛ lɛ a sugↄrↄa ũ. 
Yãpuran matɛn oárɛ, ani a aruzɛkɛ sĩnda pínki nanɛ a ↄĩmɛ. 
Ama tó zĩkɛrii pì pãsĩ, akũ à pì a nɛ̀sɛɛ gũn a dikiri tɛn gì kɛ, 
akũ à nà a zĩkɛri dakenↄ gbɛ̃gbɛ̃naaa, àtɛn pↄ́ ble àtɛn í mi kũ wɛ̃dɛrinↄ, 
a dikiri ni su gↄrↄ kũ a wɛ́ dↄiroamɛ, gↄrↄ zaka kũ à dↄ̃roa, 
ani a zↄ̃zↄ̃kↄ̃rɛ, à a baka da kũ manafikidenↄ. Gwen oni ↄ́ↄ dↄn ò ↄ di ń mìia. 
