﻿MATIU.
10.
Yesu a ìba gbɛ̃nↄn kuri awɛɛplanↄ sìsi, akũ à ń gba iko ò tãnanↄ goḿma, ò gyãrenↄ werekↄ̃a kũ gbãnasaridenↄ ń pínki. 
Zĩ̀ri gbɛ̃nↄn kuri awɛɛpla pìnↄ tↄ́nↄn dí: Gbɛ̃ káaku Simↄ kũ òdi pinɛ Pita kũ a dakũna Anduruo, Zebedi nɛ́ Yamisi kũ a dakũna Yuhanao, 
Filipi, Batↄlↄmiu, Tomasi, bɛ'ↄgↄsiri Matiu, Alafeu nɛ́ Yamisi, Tadeu, 
Simↄ Kokaride kũ Yudasi Isikariↄti kũ à bò a kpɛo. 
Kũ Yesu tɛn gbɛ̃nↄn kuri awɛɛpla pìnↄ zĩ, à pìńnɛ: Àsun gɛ́ buri pãndenↄ kĩnaaro. Àsun gɛ̃ Samaria wɛ̃tɛnↄ gũnlo. 
À gɛ́ Isaraila kũ ò sã̀tɛ lán sã bànↄ kĩnaa. 
À gɛ́ àgↄ̃ waazi kɛ àgↄ̃ gɛ́o à pi: Kpata kũ à bò Luda kĩnaa kà kãni! 
À gyãrenↄ werekↄ̃a, à gɛ̀nↄ vu bona gan, à kusunↄ werekↄ̃a swáswa, à tãnanↄ goḿma. Lákũ a lè pↄ́kekpanaa sari nà, à kɛńnɛ pↄ́kesinaa sari. 
Àsun ↄgↄ da á bↄ̀kↄnlo. 
Àsun bↄ̀kↄlokona sɛ́ro ke uta plade ke kyate ke gòo, zaakũ zĩkɛrii kà à a pↄ́ble le. 
Wɛ̃tɛ kũ áni kán sĩnda pínki ke lakutu, à gbɛ̃ mana wɛtɛ à kipaa, àgↄ̃ kú gwe ari à gɛ́ gɛ̃o zɛ́la. 
Tó a gɛ̃ ↄnn, à fↄↄ nna kpáḿma. 
Tó ↄndenↄ kà, á fↄↄ nna ni gↄ̃ńnɛ. Tó odi ká sↄ̃ro, á fↄↄ nna ni ɛra à sukpaáwa. 
Gu kũ odi gbãnakɛ kpáái ke odi sã kpá á yãiro, à bo ↄn ke lakutu pìi gũn à lukutɛ̃ warawara á gbánↄa. 
Yãpuran matɛn oárɛ, yãkpatɛkɛgↄrↄ zĩ wɛ́tãmmana kũ Sↄdↄmu kũ Gↄmↄradenↄ ni le nigↄ̃ sã̀na de wɛ̃tɛ pì denↄ pↄ́la. 
Matɛni á zĩ lán sãnↄ bà lɛwannanↄ tɛ́mɛ. Àgↄ̃ laakari vĩ lán mlɛ̃̀nↄ bà, àgↄ̃ de yãkekɛrisaridenↄ ũ lán potɛ̃nɛnↄ bà. 
À laakari kɛ bisãsirinↄi, zaakũ oni á kũkũ ò á na yãkpatɛkɛrinↄnɛ ń ↄ̃i, oni á gbɛ̃gbɛ̃ ń aduakɛkpɛnↄ gũn. 
Oni gɛ́ kãáo bùsu gbɛ̃ zↄ̃kↄ̃nↄ kũ kínanↄ kĩnaa ma yãi. Ánigↄ̃ deńnɛ ma sèedadenↄ ũ kũ buri pãndenↄ. 
Tó ò á kpáḿma, àsun yã kũ áni o damu kɛro ke yã kũ áni liḿma. Zĩ kũ̀a Luda mɛ́ ani yã kũ áni o da á lɛ́n. 
Adi kɛ ákↄ̃nↄ mɛ́ áni yã oro, á De Nini mɛ́ ani yã da á lɛ́n. 
Vĩ̀ni kũ dakũnanↄ ni kↄ̃ kpáḿma ò dɛ. Denↄ ni bo ń nɛ́nↄ kpɛ. Nɛ́nↄ ni bo ń denↄ kũ ń danↄ kpɛ ò ń dɛ. 
Gbɛ̃ sĩnda pínki ni zãágu ma yãi, ama gbɛ̃ kũ à zɛna gbãna ari a gↄrↄ lɛ́a ni surabana le. 
Tó òtɛn wɛ́ tãáwa wɛ̃tɛ ken, à bàa lɛ́ à tá a pãnden. Yãpuran matɛn oárɛ, áni gɛ́ Isarailanↄ bùsu wɛ̃tɛnↄ gũn à láka pínkiro, Bisãsiri Nɛ́ ni gĩnakɛ à su. 
Ìbaa dìgↄ̃ de a dannɛrilaro. Zĩ̀rii dìgↄ̃ de a dikirilaro. 
Tó ìba a yãdannɛri lenaa lè ke tó zĩ̀ri a dikiri lenaa lè, abirekũ mↄ̀ lɛ. Tó ò tↄ́ kpà ↄn bedenɛ Bɛlɛzɛbubu, tↄ́ kũ a vãni de abirekũlan oni kpá a ↄndenↄnɛ. 
Àsun vĩna kɛńnɛro. Pↄ́ke kun utɛna kũ ani bo gupuraaro. Asiriyã ke kun kũ oni gí dↄ̃iro. 
À yã kũ matɛn oárɛ gusiran o gupuraa. À yã kũ átɛn ma á sã gũn kpàkpa kɛ gãnulɛa. 
Gbɛ̃ kũ òdi mɛ̀ kakatɛ, ama òdi fↄ̃ ò nini dɛ̀ronↄ, àsun vĩna kɛńnɛro. À vĩna kɛ Ludanɛ, kũ ani fↄ̃ à nini kũ mɛ̀ɛo kakatɛ tɛ́ gũn pínki. 
Òdi bãntoro mɛ̀n pla yía kↄbↄ donloo? Ama ń ke dì lɛ́tɛ zĩtɛ á De yãdↄ̃naa sariro. 
Bee á mìkãnↄ, à a lɛ́ dↄ̃. 
Abire yãi àsun vĩna kɛro. Á bɛ̀ɛrɛ de bãntoro dasinↄla. 
Gbɛ̃ kũ à zɛ̀ kũmao gbɛ̃nↄ arɛ, mani zɛ kãao ma De kũ à kú musu arɛ. 
Gbɛ̃ kũ à ledi kpàmai gbɛ̃nↄ arɛ sↄ̃, mani ledi kpái ma De kũ à kú musu arɛ. 
Ásungↄ̃ da ma su de gbɛ̃nↄ gↄ̃ nna kũ kↄ̃o andunia gũnnlo. Mádi su de gbɛ̃nↄ gↄ̃ nna kũ kↄ̃o yãinlo, sé futɛna kũ kↄ̃o. 
Ma sumɛ, de gↄ̃gbɛ̃ bo a de kpɛ, nↄgbɛ̃ bo a da kpɛ, nↄzãre bo a zã da kpɛ. 
Gbɛ̃ bedenↄ ni gↄ̃ a ibɛrɛnↄ ũ. 
Gbɛ̃ kũ à ye a de ke a dai demala dí ká àgↄ̃ de ma ìba ũro. Gbɛ̃ kũ à ye a nɛ́gↄ̃gbɛ̃ ke a nↄgbɛ̃i demala dí ká àgↄ̃ de ma ìba ũro. 
Gbɛ̃ kũ adi a lígbãndurukpana sɛ́ àgↄ̃ tɛ́omairo, ade dí ká àgↄ̃ de ma ìba ũro. 
Gbɛ̃ kũ à a wɛ̃̀ndi kũna, ade ni kurai. Gbɛ̃ kũ à gì a wɛ̃̀ndiii ma yãi sↄ̃, ade nigↄ̃ wɛ̃̀ndi vĩ. 
Gbɛ̃ kũ à á sí ma simɛ. Gbɛ̃ kũ à ma si sↄ̃, ade gbɛ̃ kũ à ma zĩ sìmɛ. 
Gbɛ̃ kũ à annabii sì a annabikɛ yãi ni annabi láada le. Gbɛ̃ kũ à gbɛ̃ mana sì a manakɛ yãi ni gbɛ̃ mana láada le. 
Bee í yĩdan, gbɛ̃ kũ à nɛ́ dínↄ doke gbà ma ìbakɛ yãi, yãpuran matɛn oárɛ, ade ni kura a láadairo. 
