﻿YAASINƆ.
28.
Yãvãnikɛrii dì bàa lɛ́, bee tó òtɛn pɛ́aro, gbɛ̃ mana dìgↄ̃ wↄ́rↄgↄ vĩ lán músu bà. 
Tó bùsu taari kɛ̀ zↄ̃kↄ̃, a kínanↄ dìgↄ̃ dasimɛ, ama laakaride yãdↄ̃ri ni tó aafia gↄ̃ kun. 
Kína kũ àdi wɛ́ tã takasidenↄa de lán legũ kũ à mà à pↄ́ble yàkaa bàmɛ. 
Dokadarisarinↄ dì yãvãnikɛrinↄ sáabu kpá, dokadarinↄ sↄ̃ òdi fìti kɛ kũńwo. 
Gbɛ̃ vãninↄ yãzɛde mì dↄ̃ro, ama gbɛ̃ kũ òdi Dikiri arɛ wɛtɛnↄ dↄ̃ swáswa. 
Takaside taarisaride mana de aruzɛkɛde yãlɛkpɛrɛkɛrila. 
Nɛ́ dokadari asãnsĩni vĩ, pãpãdenↄ gbɛ̃nna dì wé'i da a deamɛ. 
Gbɛ̃ kũ àdi a aruzɛkɛ kara ↄgↄ'i zↄ̃kↄ̃ↄ gũn tɛn pↄ́ kakara gbɛ̃ kũ àdi takasidenↄ wɛ̃nda gwanɛmɛ. 
Gbɛ̃ kũ àdi doka kpá sãkoto, Luda dì zã a aduakɛnan. 
Gbɛ̃ kũ àdi gbɛ̃ mananↄ da zɛ́ vãnia ni lɛ́tɛ à da a zĩda tankutɛmmɛ, taarisaridenↄ sↄ̃ oni bo mana. 
Ɔgↄde dì a zĩda ditɛ ↄ̃ndↄ̃de ũmɛ, ama takaside asãnsĩnide dì a ↄ̃ndↄ̃ dↄ̃amɛ. 
Tó gbɛ̃ mananↄ zĩ̀i blè, gbɛ̃ sĩnda pínki dì ĩa dãmɛ, tó yãvãnikɛrinↄ kpata blè, baadi dìgↄ̃ mì kpáguimɛ. 
Tó n n taarinↄ ùtɛ, ĩni gɛ́ arɛro, tó n ò akũsↄ̃ n tò, Luda ni n wɛ̃nda gwa. 
Arubarikademɛ gbɛ̃ kũ àdigↄ̃ Dikiri vĩna vĩ ũ, sãgbãnade sↄ̃ àdi lɛ́tɛ à da yãn. 
Gbɛ̃ pãsĩ kũ àdi kí ble takasidenↄa de lán músu kũ àtɛn pũtã bàmɛ, lán sàbo kũ àtɛn kusiḿma bà. 
Don'arɛde kũ àdi wɛ́ tã a gbɛ̃nↄa faya vĩro, gbɛ̃ kũ à zã̀ ↄgↄvãnilenan wɛ̃̀ndii dìgↄ̃ gbã̀na. 
Gbɛ̃dɛri kũ a laasun tɛn wari dↄa nigↄ̃ bàa lɛ́ ari à gɛ́ gaomɛ. Gbɛ̃ke sún kpánɛro. 
Gbɛ̃ kũ àdi yã kɛ a zɛ́a nigↄ̃ aafiamɛ, yãdↄrↄsarikɛri sↄ̃ ani lɛ́tɛ kãnto. 
Gbɛ̃ kũ àdi laakari dↄ a bú zĩa dìgↄ̃ kãna, gbɛ̃ kũ àdi pɛ́ gukoria sↄ̃ àdigↄ̃ kú takasi gũmmɛ. 
Luda ni arubarika da náaniden manamana, gbɛ̃ kũ àtɛn wã à kɛ ↄgↄde ũ ni bo pãro. 
Gbɛ̃wɛgwana manaro, bee kũ abireo gbɛ̃ ni taari kɛ burodi kusu yãi. 
Sãnkarade dì wã kũ aruzɛkɛlenaao, àdigↄ̃ dↄ̃ kũ takasi ni a lero. 
Gbɛ̃ kũ àdi kpãkɛ̃ gbɛ̃i nigↄ̃ nna kãao de gbɛ̃ kũ à a tↄ́ nna sìla. 
Gbɛ̃ kũ à kpãni ò a de ke a daa, akũ àtɛn pi, taarinlo, ade lɛɛlɛ kũ kpãni wɛ́dewɛomɛ. 
Gbɛ̃ kũ à wãkũ vĩ dì fìti damɛ, gbɛ̃ kũ à Dikiri náani vĩ mɛ́ ani karana le. 
Gbɛ̃ kũ àtɛni a zĩda náani kɛ bi yↄ̃nkↄmɛ, gbɛ̃ kũ à tɛ́ ↄ̃ndↄ̃i mɛ́ ani bo mana. 
Pↄ́ dì kĩa gbɛ̃ kũ àdi takasidenↄ gba pↄ́aro, òdi gbɛ̃ kũ àdi ń wɛ́ gwaro kámɛ. 
Tó yãvãnikɛrinↄ kpata blè, baadi dìgↄ̃ mì kpáguimɛ. Tó ò gàga, gbɛ̃ mananↄ dì dagula. 
