﻿YAASINƆ.
27.
Ǹsun n zĩda sáabu kpá zia yã musuro, zaakũ ń dↄ̃ yã kũ ani su ziaro. 
Ǹ tó ò n sáabu kpá, ǹsun n zĩda sáabu kpáro. Ǹ tó à bo gbɛ̃nↄ lɛ́n, ǹsun tó à bo n lɛ́nlo. 
Gbɛ̀ɛ tìkisi, bùsu'atɛ̃ bi asomɛ, ama yↄ̃nkↄ pↄfɛ̃ tìkisi de abirekũnↄla pínki. 
Pɛ̃tɛ̃ pãsĩ, pↄfɛ̃ dì dańla, ama dí mɛ́ ani nɛ̀sɛgↄ̃ba fↄ̃ↄ? 
Kpãkɛ̃na gbɛ̃i pari wára mana de yena gbɛ̃i asiri gũnla. 
Gbɛ̃nna yã'ũmmana kpáńyĩ náani vĩ, ibɛrɛ lɛ́pɛmmana manafiki vĩ. 
Gbɛ̃ kũ à kãna dì zã̀zã kũ kũ zↄ́omɛ, ama nàdɛri pↄ́ kyã̀kyã dↄ̃ro. 
Gbɛ̃ kũ à kɛ̃̀ a ↄnnwa àtɛn likara de lán bã kũ à sã̀tɛ a sàaa bàmɛ. 
Nísi gbĩ nnanna kũ turaretitio dì ń pↄ kɛ nna, lɛ́dakↄ̃ana kũ nɛ̀sɛ mɛ̀n doo dì gbɛ̃nnanↄ kɛ nna. 
Ǹsun pã kpá n gbɛ̃nnairo ke n de gbɛ̃nna. Tó yã n le, ǹsun gɛ́ n vĩ̀ni ke n dakũna bɛaro. N gbɛ̃dake kũ à kú kãni kũńwo mana de n bɛ gbɛ̃ kũ à kú zã̀la. 
Ma nɛ́, ǹgↄ̃ ↄ̃ndↄ̃, ma pↄ ni kɛmma nna, mani we ma sↄ̃̀sↄ̃rinↄa sà. 
Laakaride dì yã pãsĩ e káaku, akũ àdi utɛnɛ, laasunsaride dì gí àgↄ̃ gɛ́, akũ àdi yã le. 
Tó gbɛ̃ nibↄ fĩnaa dì a musu, ǹ a uta sí ǹgↄ̃ kũna tↄrↄma ũ ade gɛ̃nɛ ũ. 
Tó n yã ò gbãnagbãna n sa mana ò n gbɛ̃dakenɛ kↄnkↄkↄnkↄ, onigↄ̃ da sa vãnimɛ. 
Nↄ fìtide de lán legũ'i kũ àtɛn tↄ́tↄ zɛnaa sari bàmɛ, 
a dãdãna de lán ĩa dãdãnaa bàmɛ, ade tɛn nísi'iwa kũ kũ ↄomɛ. 
Lákũ mↄ̀nↄ dì kↄ̃ lɛ́ kɛkɛ nà, lɛn bisãsiri dì a gbɛ̃dake kɛkɛ lɛ. 
Tó gbɛ̃ laakarii dↄ̀ kaka lía, ani a nɛ́ ble, tó gbɛ̃ a dikiri yã mà, ani a kpe ta. 
Lákũ gbɛ̃ dì a nini e ín nà, lɛn bisãsirinↄ dìgↄ̃ kↄ̃ laasun dↄ̃ lɛ. 
Lákũ gɛ̀nↄ dì mↄ́ gaaro nà kũ gyãwãnnwo, lɛn gbɛ̃ wɛ́ yena pↄ́i dì mↄ́aro lɛ. 
Lákũ òdi andurufuu kũ wuraao mana dↄ̃ a baasanaa gũn nà, lɛn òdi bɛ̀ɛrɛ lí gbɛ̃nɛ a tↄ́bonaa gũn lɛ. 
Bee tó n fayasaride dà gón n a sabò lán pↄ́blewɛ bà, a fayasarikɛ ni kɛ̃aro. 
Ǹgↄ̃ n pↄ́kãdenↄ kunna dↄ̃ manamana, ǹ laakari dↄ n kpàsa pↄ́nↄa, 
zaakũ aruzɛkɛ dìgↄ̃ kun gↄrↄ sĩnda pínkiro, beekpata dì gↄ̃ gbɛ̃ pↄ́ ũ ai a buriaro. 
Sɛ̃̀ɛ dì láka, a dufu dì butɛ, ndì a tàragaa kpá pↄ́nↄa, 
ndì pↄ́kasa kɛ kũ n sãnↄ kão, ndì bú lú kũ n blèe ↄgↄo, 
n blènↄ vĩ dìgↄ̃ dinyĩ n pↄ́ble ũ, ndì n ↄndenↄ kũ n nↄgbɛ̃ zĩkɛrinↄ gwao. 
