﻿YAASINƆ.
22.
Tↄ́ nna de aruzɛkɛla, nna kũ gbɛ̃nↄo de wura kũ andurufuuola. 
Aruzɛkɛde kũ takasideo zĩni dokↄ̃nↄmɛ, Dikiri mɛ́ à ń kɛ́ ń pínki. 
Laakaride dì gĩnakɛ à yã vãni e à utɛnɛ, ↄ̃ndↄ̃saride dìgↄ̃ gɛ́ ari à wɛ́tãmma le. 
Zĩdabusana kũ vĩnakɛna Dikirinɛɛo gbɛ̀ɛmɛ aruzɛkɛ kũ bɛ̀ɛrɛɛo kũ wɛ̃̀ndiio ũ. 
Lɛ̀ɛ kũ tankutɛo kú gbɛ̃ dↄ̀rↄsaride zɛ́n, gbɛ̃ kũ à ye aafiaai dì kɛ̃ḿma. 
Ǹ nɛ́ fíti da zɛ́ kũ à de à sɛ́a, tó à zↄ̃kↄ̃ kũ̀, ani kɛ̃aro. 
Aruzɛkɛde dì gbãna mↄ takasidenɛ, pↄ́sãkãrii dì zↄ̀ ble pↄ́denɛ. 
Gbɛ̃ kũ à yã vãni tↄ̃̀, ade ni yã le a kɛ̃gↄrↄa, a pãsĩkɛgo ni a gbɛ̃. 
Luda ni arubarika da gbɛ̃ kũ à gbɛ̃kɛ vĩnɛ kũ àdi pↄ́ble kpaatɛ takasidenↄnɛ yãi. 
Ǹ pɛ́ lalandikɛriia, fìti ni mì dɛ, yãkete kũ wé'io ni láka. 
Nɛ̀sɛpurade kũ a lɛ́gbɛ nna mɛ́ anigↄ̃ de kína gbɛ̃nna ũ. 
Dikiri wɛ́ dìgↄ̃ pɛ́ dↄ̃naai, àdi mìkpɛrɛ zu náanisaride yãnɛ. 
Ma'ãde dì pi músu kú bàai, tó ma bo, ani ma dɛ gãnulɛa. 
Karua lɛ́ bi wɛ̀ɛ lòkotoomɛ, gbɛ̃ kũ Dikiri pↄ fɛ̃̀ kãao dì lɛ́tɛ à sin. 
Fayasariyã dìgↄ̃ kú nɛ́nↄ swɛ̃̀n, foru kũ flã̀ao ni tó ò kɛ̃a. 
Gbɛ̃ kũ àdi wɛ́ tã takasidea de à a aruzɛkɛ kara kũ gbɛ̃ kũ àdi gba da ↄgↄdenɛɛo, ń pínki ni kĩa. 
Ǹ sã kpá ǹ ↄ̃ndↄ̃rinↄ yã'onnɛna ma, ǹ n nɛ̀sɛ wɛ̃ ma yãdannɛnaanɛ, 
zaakũ à nna ǹgↄ̃ kũna n swɛ̃̀ɛ gũn, àgↄ̃ kú n lɛ́n. 
Bee mↄkↄ̃n, matɛn yã dannɛ gbãra, de ǹgↄ̃ Dikiri náani vĩ yãimɛ. 
Ma yã'onnɛnaa kɛ̃̀nnɛ mɛ̀n baraakuri, yã pìnↄ lɛ́damma kũ dↄ̃naao vĩ. 
Matɛn yãpura kũ à náani vĩ dannɛ, de ǹ le ǹ yã weḿma a zɛ́amɛ. 
Ǹsun gbãnasaride ble a gbãnasarikɛ yãiro, ǹsun gbãna mↄ wɛ̃ndadenɛ yãkpatɛkɛkiaro, 
zaakũ Dikiri ni yã sí kũńwo, ani wɛ́ tã gbɛ̃ kũ òtɛn wɛ́ tãḿmanↄa. 
Ǹsun gbɛ̃nna kpá kũ pↄfɛ̃riioro, ǹsun kure kũ nɛ̀sɛwãnadeoro, 
de ǹsun a dà sɛ́tɛ ǹ n zĩda da yãnlo yãi. 
Ǹsun gbɛ̃ke fĩna di n musuro, ǹsun zɛnkpɛkɛ sɛ́nɛro. 
Tó ń pↄ́ke vĩ ǹ fĩna booro, oni n wutɛbↄ sɛ́ n zĩtɛa. 
Ǹsun zĩtɛ lɛ́ sèeda zĩ woro, n dizinↄ mɛ́ ò a pɛ̀tɛ. 
N gbɛ̃ kũ à a zĩ dↄ̃ manamana è yá? Ade ni zĩ kɛ kínanↄnɛ, adi kɛ talakanↄmɛ ani kɛńnɛro. 
