﻿YAASINƆ.
20.
Wɛ̃ dì lalandi zĩḿma, í gbãna dì ń da yãbↄtɛn, gbɛ̃ kũ à tò à a dɛ ↄ̃ndↄ̃ vĩro. 
Kína pↄfɛ̃na de lán músu pũtãnaa bà, gbɛ̃ kũ à tò à pↄ fɛ̃̀ a zĩda kpà gaimɛ. 
Bàalɛna ledikpanaanɛ bɛ̀ɛrɛ vĩ, fayasaridenↄ dì kasa fìti kɛro. 
Ma'ãde dì bú wí a gↄrↄaro, tó à gɛ̀ɛ bura pↄ́kɛ̃gↄrↄ, àdi pↄ́ke lero. 
Bisãsiri nɛ̀sɛgũnyã bi í lòkotoomɛ, ama laakaride mɛ́ à yã pìnↄ tↄna dↄ̃. 
Gbɛ̃ daside dì a manakɛna yã o, ama bona gbɛ̃ náanidea zĩ'ũ. 
Gbɛ̃ mana dìgↄ̃ kun taari sari, arubarikadenↄn nɛ́ kũ à ń tónↄ ũ. 
Kína kũ à vutɛna a yãkpatɛkɛkia dì yã vãni sĩnda pínki dↄ̃ a wɛ́ gũn à plɛ dodo. 
Dí mɛ́ ani fↄ̃ à o kũ a nɛ̀sɛ yãke vĩro, á kun durunna sari swáswaa? 
Kilooyↄ̃na vãni kũ manafiki zakaao, Dikiri zã̀ abirenↄn pínki. 
Bee kↄ̃kↄ̃'onaa gũn òdi dↄ̃ nɛ́a, tó a yãkɛna mana ke à zɛ́ vĩ. 
Sã kũ òdi yã mao kũ wɛ́ kũ òdi gu eooo, Dikiri mɛ́ à ń kɛ́ ń pínki. 
Tó ń ye i'onaai, ĩni gↄ̃ takaside ũmɛ, ǹ ibɛ̃nɛ kɛ, pↄ́ble ni mↄ́mma. 
Pↄ́lurii dì pi: À manaro! À manaro! Tó à kào arɛ, àdi a zĩda sáabu kpá. 
Wura kun, akũsↄ̃ òso din, ama dↄ̃na kunna lɛ́mmɛ gbɛ̀ bɛ̀ɛrɛde ũ. 
Tó gbɛ̃ nibↄ fĩnaa dì a musu, ǹ a uta sí ǹgↄ̃ kũna tↄrↄma ũ ade gɛ̃nɛ ũ. 
Dibidibi pↄ́ble dìgↄ̃ nna gbɛ̃nɛmɛ, àdi láka à gↄ̃ n lɛ́n lán gbɛ̀wa bà. 
Ǹ zɛ kũ yão lɛ́damma musu, ǹ yã gwa manamana gbasa ǹ zĩ̀ ká. 
Kↄrↄmↄtↄde dìgↄ̃ kure kũ dakenↄ asiriyãomɛ, ǹsun kakara kũ yãbↄtɛriioro. 
Gbɛ̃ kũ à lɛ́ kɛ̀ a de ke a danɛ, a fitila ni ga gusira níkinikimmɛ. 
Túbiblena káaku warikɛsari dìgↄ̃ arubarika vĩ saaro. 
Ǹsun yã vãni fĩnabonaa laasun lɛ́ro. Ǹ Dikiri dã à n sura ba. 
Dikiri zã̀ kilooyↄ̃na vãnin, manafiki zakaa dì káaguro. 
Dikiri mɛ́ àdi bisãsiri gɛ̀sɛ da zɛ́a. Deran gbɛ̃ ni yã kũ ani kɛ zɛ́ dↄ̃ↄ? 
Gba lɛ́sɛna Ludanɛ wãnawãna kari vĩ, ĩni láka ǹ laasun lɛ́ lɛ́ kũ n kɛ̀nɛɛ pìia. 
Kína ↄ̃ndↄ̃de dì gbɛ̃ vãninↄ plɛplɛ à ń ká gbɛ̀n à ń akara kɛ. 
Dikiri fitilaa dì bisãsiri laasun pu, àdi nɛ̀sɛgũnyã tàasi ká pínki. 
Gbɛ̃kɛ kũ náaniomɛ kína dãkpãrinↄ ũ, manakɛnaa dì a kpata zĩni pɛ́tɛ. 
Kɛfɛnnanↄ gbãnamɛ ń ĩadãbↄ ũ, mare zↄ̃kↄ̃nↄ mìkã puramɛ ń gakuri ũ. 
Wɛ́tãmmanaa dì yã vãni kɛ̃ḿma, flã̀ ũmmanaa dì yã bɛ̃̀nɛ bo nɛ̀sɛn. 
