﻿YAASINƆ.
5.
Ma nɛ́, ǹ laakari dↄ ma dↄ̃naaa, ǹ sã kpá ǹ ma ↄ̃ndↄ̃ yã ma, 
de ǹgↄ̃ kú n laakariia, dↄ̃na yã nigↄ̃ kú n lɛ́n. 
Karua yã'onaa dìgↄ̃ nna lán zↄ́ bàmɛ, àdi ń gátɛ kũ lɛ́nnao, 
ama kpɛkpɛ àdi kɛńnɛ kyã̀kyã lán sɛwɛ bà, àdi ń zↄ̃ lán fɛ̃nɛda lɛ́nna kpa plade bà. 
A zɛ́ dì mì pɛ́ kũńwo gaa, àdi si kũ gbɛ̃ kũ ò tɛ́inↄo gyãwãn. 
Àdi laasun lɛ́ wɛ̃̀ndi zɛ́aro, à dↄ̃ a zã zɛ́ pìiaro. 
Ma nɛ́, ǹ sã kpá ma yãi sà, ǹsun kpɛ li ma lɛ́dammanɛro. 
Ǹ pã nↄgbɛ̃ dí takanɛ zã̀zã, ǹsun na a bɛ gãnulɛiro, 
de n bɛ̀ɛrɛ sún gↄ̃ gbɛ̃ pãndenↄnɛro, de ǹsun n wɛ̃̀ndi kpá gbɛ̃ pãsĩnↄaro, 
de n aruzɛkɛnↄ sún gↄ̃ dakenↄnɛro, de n zĩ àre sún gↄ̃ ↄn pãnde bedenↄnɛro. 
Ĩnigↄ̃ nda n gↄrↄ lakanaaa, ĩni fɛ̃fɛ̃ n gbãna ni láka. 
Ĩni pi: Ma gi lɛ́dammai fá! Ma dↄkɛna kũ foruo mɛ́ à tò. 
Mádi arufannanↄ yã'onnɛna maro, mádi sã kpá ma yãdannɛrinↄiro. 
À gↄ̃̀ fíti kũ mà kpe bo andunia dagura. 
Ǹ n zĩda orozã í mi, ǹ zɛ kũ n zĩda lↄ̀gↄ'io. 
N í kↄtɛna bàai manaro. N í bona gãnulɛa zɛ́ vĩro. 
Ǹ tó àgↄ̃ de n nanↄ pↄ́ ũ ado, àsungↄ̃ de gbɛ̃ pãnde pↄ́ ũro. 
Luda arubarika da n íboki pìn, ǹ pↄnna kɛ kũ n kɛfɛnnakɛgↄrↄ nↄo. 
N gã yenyĩde! N bikyao mana! Ǹ tó a bã̀ndaragana gↄ̃ kɛnnɛ nna, ǹ a yenyĩ ni dɛ lákũ gu dìgↄ̃ dↄ nà. 
Ma nɛ́, bↄ́yãin ĩni karua ni dɛɛ? Bↄ́yãin ĩni bã̀ndara gá kũ gbɛ̃ pãnde nↄoo? 
Bisãsiri yãkɛna ke utɛna Dikirinɛro, àdigↄ̃ zɛ́ kũ à sɛ̀ dↄ̃ pínki. 
Yãvãnikɛri taari dì bà kpákpanɛ, a durunna dì a kũ. 
Lɛ́dammamanasari ni a kpá gai, a yↄ̃nkↄkɛ zↄ̃kↄ̃ ni a sãtɛ. 
