﻿YAASINƆ.
1.
Yáasi kũ Dauda nɛ́ Sulemanu, Isarailanↄ kína zù, 
de gbɛ̃nↄ le ò ↄ̃ndↄ̃ kũ ògↄ̃ laakari vĩ, ò dↄ̃na yã dada, 
ò gↄ̃ wɛ́zɛ̃ri laakaridenↄ ũ manakɛna kũ yãzɛdeo kũ náanio yã gũn. 
Yáasi dínↄ dì nɛ̀sɛdode gba laakarii, àdi tó kɛfɛnna gↄ̃ kú a dↄ̀rↄↄa kũ dↄ̃naao. 
Laakaride ni ma, a yãdadana le à kara, nɛ̀sɛde ni lɛ́damma le a gũn, 
ani yáasi kũ yãlɛkↄ̃anaao mì dↄ̃ kũ ↄ̃ndↄ̃rinↄ yã'onaao kũ ń gara kutu yãnↄ. 
Vĩnakɛna Dikirinɛɛmɛ dↄ̃na naana ũ, ama yↄ̃nkↄ dì ↄ̃ndↄ̃ kũ lɛ́dammao gya bo. 
Ma nɛ́, ǹ n de yã'onnɛna ma, ǹsun pã kpá n da lɛ́dammairo. 
Anigↄ̃ de fùra mana ũ n mìia, anigↄ̃ de mↄ̀wakarɛ ũ n wakaaa. 
Tó durunnakɛrinↄ tɛni n laakari gátɛ, ǹsun wero, ma nɛ́. 
Òdi pi: Ǹ mↄ́ ò gɛ́ gbɛ̃nↄ dãdã ò ń dɛdɛ, ò taarisaridenↄ kpákpa ò ń kũkũ. 
Ò ń mↄ́mↄ bɛ̃nɛ lákũ mira dì kɛ nà, ò ń mↄ́ vãni lákũ gyãwãn dì kɛ nà, 
óni pↄ́ ↄgↄde buri sĩnda pínki le, ó kpɛ́nↄ ni pa kũ pↄ́ kũ o nàkↄ̃anↄ. 
Ǹ mↄ́ ò ó baka kakara, ó pínki ó ↄgↄsↄ̃nↄ nigↄ̃ dokↄ̃nↄ. 
Ma nɛ́, ǹsun gɛ́ kũńworo, ǹsun zɛ́ sɛ́ kũńworo. 
Zaakũ òdigↄ̃ lika kũ yãvãnikɛnaao, ò wãna kũ gbɛ̃dɛnaao. 
Bàkpakpana bãnↄ wára bi yã pãmɛ. 
Òtɛn tankutɛ kpákpa ń zĩdanɛmɛ, ń toke mɛ́ à ń para. 
Ɔgↄvãniwɛtɛrinↄ zian gwe ń pínki, ń lukana pↄ́i mɛ́ àdi ń wɛ̃̀ndi bo. 
Ɔ̃ndↄ̃ tɛn wiki lɛ́ gãnulɛa, a kòto dↄ zɛ́dan. 
Àtɛn lɛ́ zu zɛ́ kũ òdi kↄ̃ kakaran lɛ́a, àtɛn kpàkpa kɛ wɛ̃tɛ bĩnilɛnↄ gũn à pi: 
Ɔ̃ndↄ̃saridenↄ, ánigↄ̃ kun kũ ↄ̃ndↄ̃sarikɛo ari bↄrɛɛ? Lalandikɛrinↄ, áni ma fobona tó bↄrɛɛ? Yↄ̃nkↄnↄ, ánigↄ̃ zã dↄ̃nan ari bↄrɛɛ? 
Tó a ma lɛ́damma mà yã, de ma a dↄ̃naa pìsiáwa, mani tó àgↄ̃ ma laasun vĩ. 
Lákũ ma á sisi a gi sã kpái nà, ma ↄ pòroárɛ á gbɛ̃ke dí laakari kɛro, 
lákũ a ma lɛ́damma kpà sãkoto nà pínki, ádi we laakari kũ ma á gbáiro, 
tó kisira á lé, mani á yáa dↄmɛ, tó yã á lé, mani á lalandi kɛmɛ, 
bee tó yã á lé lán zàga'ĩa bà, ke tó kisira á lé lán tùtuu bà, ke tó takasi kũ yã'ũmmanaao gɛ̃̀ái. 
Zĩ birea áni lɛ́ zumai, mani we sↄ̃ro, áni ma ki wɛtɛ, áni ma e sↄ̃ro. 
Zaakũ a zã dↄ̃nan, ádi zɛ kũ vĩnakɛna Dikirinɛɛoro. 
Ádi we ma lɛ́dammairo, a laakari kũ ma á gbá gya bò. 
Áni á dàa gbɛ̀ le, yã vãni kũ a zɛo ni wí á musu. 
Kpɛlina ↄ̃ndↄ̃nɛ ni ↄ̃ndↄ̃saridenↄ dɛdɛ, laasunsari ni yↄ̃nkↄnↄ dúgu zↄ̃. 
Gbɛ̃ kũ à ma yã kũna sↄ̃ anigↄ̃ kun aafia, anigↄ̃ kun kũ laakariio kpatɛna vĩnakɛna vãninɛɛ sari. 
