﻿ZABURA.
147.
Aleluya! Lɛ̀sina ó Ludanɛ mana, à nna akũsↄ̃ à kũ̀ ò a táaki lɛ́. 
Dikiri tɛn Yurusalɛmu futɛ dↄ, à Isaraila zĩ̀zↄnↄ kàkara àtɛn ɛra à su kũńwo. 
Àdi gbɛ̃ kũ ń nɛ̀sɛɛ yàkanↄ laakari kpátɛńnɛ, àdi ń bↄ̀ pípińnɛ. 
À susunɛnↄ lɛ́ dↄ̃, àdi ń baadi sísi a tↄ́a. 
Ó Dikiri zↄ̃kↄ̃, à iko vĩ manamana, a ↄ̃ndↄ̃ lɛ́ vĩro. 
Dikiri dì zĩdabusarinↄ gba gbãna, ama àdi ↄ tↄ̃ yãvãnikɛrinↄa ari zĩtɛ. 
À lɛ̀ sí Dikirinɛ kũ a sáabukɛnaao, à ó Luda táaki lɛ́ kũ mↄrↄↄo. 
Àdi tó legũ sisi, àdi zĩtɛ gba legũ, àdi tó sɛ̃̀ butɛ sĩ̀sĩnↄa. 
Àdi pↄ́ble kpá nↄ̀bↄnↄa kũ kãakãanna nɛ́nↄ, tó òtɛn wiki pɛ́. 
Adi kɛ sↄ̃ gbãnakɛ mɛ́ àdi kánɛro, adi kɛ gↄ̃sagbãnakɛ mɛ́ àdi kɛnɛro. 
Gbɛ̃ kũ ò a vĩna vĩnↄ mɛ́ àdi kánɛ, gbɛ̃ kũ ń wɛ́ dↄ a gbɛ̃kɛinↄ. 
Yurusalɛmudenↄ, à Dikiri tↄ́ bo, Zaiↄ̃denↄ, à á Luda táaki lɛ́. 
Zaakũ àdi arubarika daágu, àdi á wɛ̃tɛ bĩnilɛnↄ gbãna karaárɛ. 
Àdi á gba aafia ari á bùsulɛ lɛ́n, àdi pↄ́buri mana kpááwa à kã. 
Àdi yã o à kpãzã zĩtɛnɛ, a yã dì ká gↄ̃̀nↄgↄ̃nↄ. 
Àdi tó legũgbɛ kↄ́tɛ púu lán buu bà, àdi tó plí kpá lán túbu bà, 
àdi legũgbɛ fã lán gbɛ̀kↄsↄↄ bà. Dí mɛ́ ani fↄ̃ à zɛ a ĩa yĩdaii? 
Àdi yã o à kpãzã, legũgbɛɛ dì yↄ́, àdi ĩa gbarɛ, a í dì bàa lɛ́. 
Àdi tó Yakubu burinↄ gↄ̃ a yã dↄ̃, àdi doka kũ à dìtɛnↄ da Isarailanↄnɛ. 
Adi abirekũ kɛ buri pãnde kenɛro, ò a yãditɛnanↄ dↄ̃ro. Aleluya! 
