﻿ZABURA.
145.
Dikiri táaki kũ Dauda lɛ̀ɛ. Mani n táaki lɛ́, ma Luda ma Kína, manigↄ̃ n tↄ́ bo gↄrↄ sĩnda pínki. 
Manigↄ̃ n sáabu kpá lákũ gu dìgↄ̃ dↄ nà, manigↄ̃ n táaki lɛ́ lakanaa sari. 
Dikiri zↄ̃kↄ̃, à kà ò a táaki lɛ́, a zↄ̃kↄ̃kɛ lɛ́ vĩro. 
Kpàinↄ ni n yãkɛnanↄ sáabu kpá Wurenↄnɛ, oni n yãzↄ̃kↄ̃kɛnanↄ kpàkpa kɛ. 
Oni n manakɛ zↄ̃kↄ̃ gakuride yã o, mani n yãbonsarɛkɛnanↄ laasun lɛ́. 
Oni n yãkɛna naasi gbãna yã o, mani n zↄ̃kↄ̃kɛ gadi kɛńnɛ. 
Oni n manakɛ zↄ̃kↄ̃ baaru kpá, oni ayuwii kɛ n yãzɛdekɛnanↄ yãi. 
Dikiri sùru vĩ kũ wɛ̃ndao, àdi pↄ fɛ̃ likaro, à gbɛ̃kɛ vĩ zↄ̃kↄ̃. 
Dikiri dì yã mana kɛ gbɛ̃ sĩnda pínkinɛ, àdi a pↄ́ kũ à kɛ̀nↄ wɛ̃nda gwa ń pínki. 
Pↄ́ kũ n kɛ̀nↄ ni n sáabu kpá ń pínki, n yãmarinↄ ni n tↄ́ sɛ́ lei, Dikiri. 
Oni n kpata gakuri gadi kɛ, oni n iko gbãna yã o, 
de gbɛ̃ sĩnda pínki n yãzↄ̃kↄ̃kɛnanↄ dↄ̃ kũ n kpata mana gakuride yão. 
N kpata bi kpata lakanasarimɛ, ĩnigↄ̃ de kína ũ ari ó buria. Dikirin náani vĩ yã kũ à ò musu pínki, à sùru vĩ kũ pↄ́ kũ à kɛ̀nↄ ń pínki. 
Dikiri dì gbɛ̃ kũ òtɛn lɛ́tɛnↄ kũ, àdi gbɛ̃ kũ wari tↄ̃̀ḿmanↄ futɛ. 
Pↄ́ sĩnda pínki wɛ́ dↄnyĩ, ndì pↄ́ble kpáḿma a gↄrↄa. 
Ndì ↄ porońnɛ pↄ́ mↄ́ḿma, ndì pↄ́ sĩnda pínki pↄyeina bↄkↄtɛnɛ. 
Dikiri yãkɛnanↄn mana pínki, à gbɛ̃kɛ vĩ a yã sĩnda pínki kɛnaa gũn. 
Dikiri kãni kũ a sìsirinↄ ń pínki, gbɛ̃ kũ òdi a sísi kũ yãpuraonↄ. 
Àdi a vĩnakɛrinↄ pↄyeina bↄkↄtɛńnɛ, àdi ń wikilɛna ma à ń sura ba. 
Dikiri dì gbɛ̃ kũ ò yeainↄ dãkpã ń pínki, ama ani yãvãnikɛrinↄ kakatɛ. 
Dikiri táakilɛna nigↄ̃ da ma lɛ́n, pↄ́ sĩnda pínki gↄ̃ a tↄ́ kũ à kú adona bo gↄrↄ sĩnda pínki. 
