﻿ZABURA.
132.
Gɛna Yurusalɛmu lɛ̀ɛ. Dikiri, ǹ tó Dauda yã gↄ̃ dↄngu kũ wari kũ à kɛ̀nↄ pínki. 
À la dà Dikirinɛ, à lɛ́ sɛ̀ Yakubu Luda gbãnadenɛ à pì, 
áni gɛ̃ kpɛ́nlo, áni wútɛ a gádoaro, 
áni we à idekũ dɛro, áni tó i na a wɛ́aro, 
ari à gɛ́ gu leo Dikirinɛ à kpɛ́ bo Yakubu Luda gbãnadenɛ. 
O a baaruu mà Ɛflata bùsun, o boa Yarimu bura. 
Ò gɛ́ a kúkia, ò kútɛ a tìntin arɛ. 
Dikiri, ǹ futɛ ǹ su n kipakia, mↄkↄ̃n kũ n gbãnakɛ àkpatiio. 
N gbàgbarinↄ manakɛ da uta ũ, n yãmarinↄ ayuwii gↄ̃ dↄ. 
Ǹsun mìkpɛrɛ zu kína kũ n kàanɛro n zↄ̀bleri Dauda yãi. 
Dikiri sì kũ a kunnaao Daudanɛ, à náani vĩ, ani lɛ́ litɛro, à pì: Mani n burinↄ doke ká n kpatan. 
Tó n burinↄ ma bàka kunna kũńwo yã dà, tó ò yã kũ ma dàńnɛnↄ kũna, ń burinↄ nigↄ̃ vutɛ n kpatan gↄrↄ sĩnda pínki. 
Zaakũ Dikiri Zaiↄ̃ sɛ̀, à ye àgↄ̃ de a vutɛki ũ, à pì: 
Gu dín manigↄ̃ kun gↄrↄ sĩnda pínki, lan manigↄ̃ vutɛna, zaakũ à ma pↄ gbàmɛ. 
Mani arubarika dan manamana, mani pↄ́ble kpá a takasidenↄa à mↄ́ḿma. 
Mani surabana da a sa'orinↄnɛ uta ũ, ma yãmarinↄ ayuwii nigↄ̃ dↄ. 
Gwen mani Dauda buri kína gbãnade bon, gwen kína kũ ma kà tɛ́ nigↄ̃ kún. 
Mani wé'i da a ibɛrɛnↄa, a kífura nigↄ̃ pí a mìia. 
