﻿ZABURA.
119.
Arubarikadenↄmɛ gbɛ̃ kũ ò kun taari sari ò Dikiri doka kũnanↄ ũ. 
Arubarikadenↄmɛ gbɛ̃ kũ ò Dikiri yã kũna ò a ki wɛtɛ kũ nɛ̀sɛdoonↄ ũ. 
Òdi yã kpɛdangara kɛro, òdi táa o a zɛ́ gũn. 
N n ↄdↄki mↄ̀wɛrɛ, de ògↄ̃ tɛ́i kũ laakariio. 
Má ye màgↄ̃ kú ma dↄ̀rↄↄa màgↄ̃ n yãdannɛnanↄ kũna. 
Tó má n yãditɛnanↄ kũna pínki, abirekũ ni tó wé'i ma kũro. 
Gↄrↄ kũ matɛni n dokayã mananↄ dada, mani n sáabu kpá kũ nɛ̀sɛpurao. 
Manigↄ̃ n yãdannɛnanↄ kũna, ǹsun ma tón sãnsãnlo. 
Deran kɛfɛnna ni fↄ̃ àgↄ̃ kun gbãsĩ sari nàa? Séde a yãkɛna kↄ̃ sɛ́ kũ n yão. 
Matɛni n ki wɛtɛ kũ nɛ̀sɛdoo, ǹsun tó mà zã n yãditɛnanↄaro. 
Ma n yã dà ma swɛ̃̀ɛ gũn de màsun durunna kɛnnɛro yãi. 
Arubarikademɛ mↄkↄ̃n Dikiri ũ, ǹ n yãditɛnanↄ damɛnɛ. 
Dokayã kũ ò bò n lɛ́nnↄ pínki, mani babańnɛ kũ ma lɛ́o. 
Madì pↄnna kɛ kũ n yãnↄ lákũ òdi kɛ kũ aruzɛkɛ zↄ̃kↄ̃ↄo nà. 
Madì laasun lɛ́ n ↄdↄkia, ma wɛ́ kú n zɛ́nↄa. 
Ma pↄ kɛ̀ nna n yãditɛnanↄa, n yã ni sãmaguro. 
Ǹ yã mana kɛ makũ n zↄ̀bleriinɛ de màgↄ̃ kun kũ wɛ̃̀ndiio, mágↄ̃ n yã kũna. 
Ǹ ma wɛ́ kɛ̃mɛnɛ de mà wɛ́ si yãbonsarɛnↄlɛ n dokan. 
Nibↄↄmɛ ma ũ andunia gũn, ǹsun n yãditɛnanↄ utɛmɛnɛro. 
N dokayãnↄ nidɛna baala'i ma swɛ̃̀ɛ blè. 
Ndì kpãkɛ̃ karambaanide kũ lɛ́ ń kũnↄi, gbɛ̃ kũ ò zã̀ n yãditɛnanↄanↄ. 
Ǹ ma bo sↄ̃sↄ̃nan kũ gyabonaao, zaakũ má n yãnↄ kũna. 
Bee kũ kínanɛnↄ vùtɛ ò lɛ́ kpàkũsũmai, ma laasun nigↄ̃ kú n yãdannɛnanↄa. 
N yãnↄ dì ma pↄ kɛ nna, n yã pì dì lɛ́ dama. 
Ma gↄ̃ wutɛna zĩtɛ, ǹ ma wɛ̃̀ndi dãkpã lákũ n ò nà. 
Ma a yãkɛnanↄ dↄ̀dↄnnɛ, akũ n wema, ǹ n yãdannɛnanↄ damɛnɛ. 
Ǹ tó mà n ↄdↄkinↄ dↄ̃, ma laasun nigↄ̃ kú n yãbonsarɛnↄa. 
Ma pↄ sira à kɛ̀ zↄ̃kↄ̃, ǹ ma gba gbãna lákũ n ò nà. 
Ǹ ma bo manafiki zɛ́a, ǹ ma gba zɛ́ mà zɛ kũ n dokao. 
Ma yãpura zɛ́ sɛ̀, ma swɛ̃̀ɛ dìgↄ̃ kú n dokaa. 
Má n yãnↄ kũna ↄplapla, ǹsun tó wé'i ma kũro, Dikiri. 
Madì wã n yãditɛnanↄ zɛ́i, zaakũ n ma laakarii kpàtɛmɛnɛ. 
Dikiri, ǹ n yãdannɛnanↄ zɛ́ mↄmɛnɛ de màgↄ̃ kũna ari ma wɛ̃̀ndi lɛ́n. 
Ǹ ma gba ↄ̃ndↄ̃ màgↄ̃ n doka kũna, màgↄ̃ zĩ kɛa kũ nɛ̀sɛdoo. 
Ǹ ma da n yãditɛnanↄ zɛ́n, zaakũ abirekũ mɛ́ àdi kámagu. 
Ǹ tó ma swɛ̃̀ tá n yãnↄa, àsun tá bĩni zɛ́nlo. 
Ǹ ma wɛ́ go pↄ́ pãnↄa, ǹ ma wɛ̃̀ndi dãkpã lákũ n ò nà. 
Ǹ yã kũ n ò papa makũ n zↄ̀bleriinɛ, lɛ́ kũ n sɛ̀ n vĩnakɛrinↄnɛɛ. 
Ǹ tó sↄ̃sↄ̃na kũ madì a vĩna kɛ goma, zaakũ n dokayãnↄn mana. 
Má ye n ↄdↄkii fá, ǹ ma wɛ̃̀ndi dãkpã n manakɛ gũn. 
Dikiri, ǹ mↄ́ ǹ gbɛ̃kɛ kɛmɛnɛ, ǹ ma sura ba lákũ n ò nà, 
gbasa mà yã we ma sↄ̃̀sↄ̃rinↄa, zaakũ matɛni n yã náani kɛ. 
Ǹsun yãpura yã sí ma lɛ́nlo, zaakũ n dokayãnↄn ma wɛ́ dↄi. 
Manigↄ̃ n doka kũna ari gↄrↄ sĩnda pínki. 
Manigↄ̃ tɛ́ aafia, zaakũ ma n ↄdↄki wɛ̀tɛ. 
Mani n yãnↄ o kínanↄ arɛ, wé'i ni ma kũro. 
N yãditɛnanↄ dì ma pↄ gba, zaakũ má yei. 
Ma gã̀a sɛ̀ n yãditɛna kũ má yeinↄnɛ, madì laasun lɛ́ n yãdannɛnanↄa. 
Ǹ dↄ yã kũ n ò n zↄ̀bleriinɛn, zaakũ n tò ma wɛ́ dↄi. 
Yã kũ àdi ma laakari kpátɛ ma warikɛnan dí, n lɛ́sɛna mɛ́ àdi ma wɛ̃̀ndi dãkpã. 
Karambaanidenↄ tɛni ma fobo lakanaa sari, bee kũ abireo madì zã n dokaaro. 
Madì dↄ n dokayã kũ à kú zaa zĩnↄn, akũ òdi ma nɛ̀sɛ yĩda kũmɛnɛ, Dikiri. 
Madì pↄ fɛ̃ manamana, kũ yãvãnikɛrinↄ dì pã kpá n dokai yãi. 
Madì lɛ̀ sí n yãdannɛnanↄ musu ma kunna andunia díkĩna gũn. 
N yã dìgↄ̃ dↄmagu gwãani, Dikiri, madìgↄ̃ n dokayãnↄ kũna. 
Ma dↄ́nɛ kɛ̀ kũ yã birenↄo, zaakũ madìgↄ̃ n ↄdↄki gwa. 
Dikiri, mↄkↄ̃mmɛ ma baka ũ, ma lɛ́ sɛ̀ kũ mani n yã ma. 
Madì kútɛ kɛnnɛ kũ nɛ̀sɛdoo, ǹ sùru kɛ kũmao lákũ n ò nà. 
Ma a yãkɛnanↄ laasunn lɛ̀, akũ ma ɛra n dokayãnↄa. 
Mani wã, mani zɛzɛro, de mà n yãditɛnanↄ da. 
Bee kũ gbɛ̃ vãninↄ bàa fĩ̀kãmai, n dokayãnↄ ni sãmaguro. 
Madì futɛ mà sáabu kɛnnɛ lizãndo n dokayã mananↄ musu. 
N vĩnakɛri pínki gbɛ̃nnamɛ ma ũ, gbɛ̃ kũ òdi n ↄdↄki gwanↄ. 
Dikiri, n gbɛ̃kɛ andunia pà, ǹ n yãditɛnanↄ damɛnɛ. 
N a mana kɛ̀ makũ n zↄ̀bleriinɛ, lákũ n ò nà, Dikiri. 
Ǹ wɛ́zɛ̃ kũ dↄ̃naao damɛnɛ, zaakũ ma n yãditɛnanↄ sì. 
De ń kpɛ́ ǹ ↄ tↄ̃ma, má sãtɛnamɛ, ama tera sà má n yã kũna. 
Ń mana, akũsↄ̃ n yãkɛnanↄn mana, ǹ n yãditɛnanↄ damɛnɛ. 
Bee kũ karambaanidenↄ yãsira nàma, madìgↄ̃ n ↄdↄki gwa kũ nɛ̀sɛdoo. 
Ń sã dì, àdi yã maro, makũ sↄ̃ ma pↄ nna n dokaa. 
N ↄtↄ̃manaa kɛ̀mɛnɛ mana, de mà le mà n yãdannɛnanↄ dada. 
Doka kũ à bò n lɛ́n manamɛnɛ de wura kũ andurufu mɛ̀n dúbu ũgbangbanↄla. 
N ↄ ma í kàsa à ma kɛ, ǹ ma gba ↄ̃ndↄ̃ mà n yãditɛnanↄ dada. 
N vĩnakɛrinↄ ni ma e ò pↄnna kɛ, zaakũ n yãn ma wɛ́ dↄi. 
Dikiri, má dↄ̃ kũ n dokayãnↄn mana, kũ ń náani vĩ yãin n ↄ tↄ̃̀ma. 
Ǹ gbɛ̃kɛ kɛmɛnɛ de ma nɛ̀sɛ le à yĩda kũ, lákũ n ò makũ n zↄ̀bleriinɛ nà. 
Ǹ mↄ́ ǹ wɛ̃nda dↄ̃mɛnɛ de màgↄ̃ kun, zaakũ n dokayãnↄmɛ ma pↄnna ũ. 
Ǹ tó wé'i karambaanide kũ ò taari kɛ̀mɛnɛ pãnↄ kũ, makũ sↄ̃ mani laasun lɛ́ n ↄdↄkia. 
Ǹ tó n vĩnakɛrinↄ su ma kĩnaa, gbɛ̃ kũ ò n yãnↄ dↄ̃nↄ. 
Ǹ tó ma nɛ̀sɛ gↄ̃ yãke vĩro n yãnↄ musu de wé'i sún ma kũro yãi. 
N surabana yã tɛni ma swɛ̃̀ ble, n yãn ma wɛ́ dↄi. 
Ma wɛ́ dↄdↄna n lɛ́sɛnaai ari ma wɛ́ wò, bↄrɛn ĩni ma nɛ̀sɛ yĩda kũmɛnɛɛ? 
Má de lán bára bↄ̀kↄ kũ à túsukpɛ màa bà, bee kũ abireo n yãditɛnanↄ dì sãmaguro. 
Makũ n zↄ̀bleri manigↄ̃ n dã ari bↄrɛɛ? Bↄrɛn ĩni wari dↄ ma wɛ́tãmmarinↄaa? 
Karambaanidenↄ dì wɛ̀ɛ yↄ̃mɛnɛ mà zun, ń yã dì kↄ̃ sɛ́ kũ n dokaoro. 
N yãditɛnanↄ pínki náani vĩ, ǹ kpámai, zaakũ òtɛn wɛ́ tãma pãmɛ. 
À gↄ̃̀ fíti kũ oni láka kũmao andunian, makũ sↄ̃ mádi pã kpá n ↄdↄkinɛro. 
Ǹ ma wɛ̃̀ndi dãkpã n gbɛ̃kɛ yãi, mani n yãnↄ da. 
Dikiri, n yã dìgↄ̃ kun gↄrↄ sĩnda pínki, a zĩni pɛtɛna zaa musu. 
Ń náani vĩ wɛ̃̀ kũ wɛ̃̀ɛo, n andunia kàtɛ, akũ à kpɛ́ kun. 
Pↄ́ sĩnda pínki kpɛ́ kun gbãra n doka yãi, zaakũ pↄ́ sĩnda pínki dì donyĩ. 
Tó n dokamɛ ma pↄnna ũ yãro, de ma laka ma warikɛnaa gũn. 
N ↄdↄki ni sãmagu zikiro, zaakũ a gãin n ma wɛ̃̀ndii dã̀kpã. 
N pↄ́mɛ ma ũ, ǹ ma sura ba, zaakũ ma n ↄdↄki wɛ̀tɛ. 
Gbɛ̃ vãninↄ tɛni ma dã ò ma dɛ, ama ma laakari kú n yãnↄa. 
Ma è kũ pↄ́ mana sĩnda pínki zaka lɛ́ kummɛ, ama n yãditɛnanↄ zↄ̃kↄ̃ lɛ́ vĩro. 
Má ye n dokai à kɛ̀ zↄ̃kↄ̃ fá, madìgↄ̃ laasun lɛ́a zaa kↄnkↄ ari ↄkↄsi. 
N yãditɛnanↄ dì tó ma ↄ̃ndↄ̃ gↄ̃ de ma ibɛrɛnↄ pↄ́la, zaakũ à kú ma swɛ̃̀n gↄrↄ sĩnda pínki. 
Ma wɛ́zɛ̃ de ma yãdannɛrinↄ pↄ́la ń pínki, zaakũ ma laasun dìgↄ̃ kú n yãnↄamɛ. 
Ma ↄ̃ndↄ̃ de marenↄ pↄ́la, zaakũ madìgↄ̃ n ↄdↄkinↄ gwa. 
Madì mì kɛ̃ zɛ́ vãni sĩnda pínkia de mà le màgↄ̃ n yã kũna yãi. 
Mádi kɛ̃ n dokayãnↄaro, zaakũ mↄkↄ̃n mɛ́ n dàmɛnɛ. 
N yãnↄn nnamɛnɛ à kɛ̀ zↄ̃kↄ̃, à nna de zↄ́la ma lɛ́n. 
N ↄdↄki dì ma gba laakarii, abire yãi ma zã sãtɛna zɛ́ sĩnda pínkin. 
N yãmɛ fitila ũ ma gbánɛ, àdi gu pumɛnɛ zɛ́n. 
Ma la dà ma zɛo kũ manigↄ̃ tɛ́ n dokayã mananↄi. 
Ma wɛ́tãmmanaa kɛ̀ zↄ̃kↄ̃, Dikiri, ǹ ma wɛ̃̀ndi dãkpã lákũ n ò nà. 
Ǹ ma sáabukpana sí, gbasa ǹ n dokayãnↄ damɛnɛ, Dikiri. 
Madìgↄ̃ ma zĩda da karii gũn, bee kũ abireo n dokayãnↄ dì sãmaguro. 
Yãvãnikɛrinↄ tankutɛ kpàkpamɛnɛ, ama mádi zã n ↄdↄkiaro. 
N yãnↄmɛ ma túbi ũ ari gↄrↄ sĩnda pínki, mↄ́kↄ̃nↄmɛ ma pↄnna ũ. 
Ma swɛ̃̀ kú n yãdannɛnanↄa ari ma wɛ̃̀ndi lɛ́n. 
Ma zã nɛ̀sɛpladenↄn, má ye n dokai. 
Mↄkↄ̃mmɛ ma utɛki kũ ma sɛ̃gbakoo ũ, n yãn ma wɛ́ dↄi. 
À gomala ákↄ̃nↄ yãvãnikɛrinↄ de màgↄ̃ ma Luda yãditɛnanↄ kũna. 
Ǹgↄ̃ ma kũna lákũ n ò nà, manigↄ̃ kun, ǹsun tó tãmaa ma nɛro. 
Ǹ ma sɛ́ musu de mà bo aafia, ma wɛ́ nigↄ̃ pɛ́ n yãdannɛnanↄa. 
Ndì gí gbɛ̃ kũ ò zã̀ n yãdannɛnaaanↄi, ń manafikikɛna bi pãmɛ. 
Ndì andunia yãvãnikɛrinↄ kↄ́tɛ lán mↄ̀gbↄ̃ↄ bà, abire yãin má ye n yãnↄi. 
Ma mɛ̀ɛ dì futɛ n vĩna yãi, n dokayãnↄn naasi vĩmɛ. 
Ma yã kɛ̀ a zɛ́a súsu, ǹsun ma tó ma wɛ́tãmmarinↄnɛro. 
Ǹ zɛnkpɛkɛ sɛ́ makũ n zↄ̀bleriinɛ de mà bo mana, ǹsun tó karambaanidenↄ ma wɛ́ tãro. 
Ma wɛ́ dↄ n surabanaai ari ma kpasa, matɛni n lɛ́sɛna mana dã. 
Ǹ yã kɛmɛnɛ n gbɛ̃kɛ gũn, ǹ n yãdannɛnanↄ da makũ n zↄ̀bleriinɛ. 
N zↄ̀bleriimɛ ma ũ, ǹ ma gba laakarii de mà n yãnↄ dↄ̀rↄ dↄ̃. 
Yãkɛna gↄrↄ kà, Dikiri, zaakũ òtɛn bo n doka kpɛ. 
Má ye n yãditɛnanↄi de wurala, bee wura baasanaa. 
Ma è n ↄdↄki mana, abire yãi sãtɛna zɛ́ pínki dì kɛmɛnɛro. 
N yãnↄn demɛnɛ yãbonsarɛ ũ, abire yãi má kũna ma swɛ̃̀n. 
N yã bↄkↄtɛnaa dì gu puńnɛ, àdi nɛ̀sɛdodenↄ gba laakarii. 
Ma lɛ́ wɛ̃na, matɛn wesa bo fɛ̀ɛkuu, zaakũ n dokayãnↄ ni tɛni ma dɛ. 
Ǹ arɛ dↄma ǹ sùru kɛ kũmao, lákũ ndì kɛ gbɛ̃ kũ ò ye n tↄ́inↄnɛ nà. 
Ǹ ma da zɛ́a lákũ n ò nà, ǹsun tó yã vãni ke kí blemaro. 
Ǹ ma bo gbɛ̃ takikɛrinↄ ↄĩ de mà n ↄdↄki gwa. 
Ǹ ãn were makũ n zↄ̀bleriia, ǹ tó mà n yãdannɛnanↄ dↄ̃. 
Wɛ́'i tɛn pla ma wɛ́n kũ ò n doka kũnaro yãi. 
Dikiri, ń mana, n dokayãnↄn zɛ́ vĩ. 
N n yãnↄ dìtɛ a zɛ́a, ò náani vĩ manamana. 
Ma ibɛrɛnↄ sã̀ n yãn, akũ ń yã ma kũ gbãna manamana. 
Ò n yã yↄ̃̀ ò gwà à sãnkara ke vĩro, makũ n zↄ̀bleri, má yei manamana. 
Pↄ́ken ma ũro, òdi ma gya bo, bee kũ abireo n ↄdↄki dì sãmaguro. 
N yãmanakɛna lakana vĩro, n doka yãpura vĩ. 
Wari kũ yã'ũmmanaao ma le, ama n yãditɛnanↄmɛ ma pↄnna ũ. 
N yãnↄn mana gↄrↄ sĩnda pínki, ǹ ma gba laakari de màgↄ̃ kun. 
Madì n sísi kũ nɛ̀sɛdoo Dikiri, ǹ wema, manigↄ̃ n yãditɛnanↄ kũna. 
Madì lɛ́ zunyĩ ǹ ma sura ba, manigↄ̃ n yãnↄ kũna. 
Madì futɛ gudↄo mà wiki lɛ́mma, n yãn ma wɛ́ dↄi. 
I dì na ma wɛ́a gwãaniro de mà le mà laasun lɛ́ n yãa yãi. 
Ǹ ma yã ma n gbɛ̃kɛ yãi, Dikiri, ǹ ma wɛ̃̀ndi dãkpã lákũ n yãzɛdekɛ de nà. 
Gbɛ̃ kũ òdi lɛ́ kpákũsũmainↄ kãni kũmao, ama ò zã̀ kũ n dokao. 
Ń kú kũmao kãni Dikiri, n yãditɛnanↄ pínki yãpura vĩ. 
Zaa gìkɛna ma dↄ̃̀ n yãnↄa kũ n dìtɛ àgↄ̃ kun gↄrↄ sĩnda pínki. 
Ǹ ma warikɛna gwa ǹ ma sura ba, zaakũ n doka dí sãmaguro. 
Ǹ zɛ kũmao ǹ ma bo, ǹ ma wɛ̃̀ndi dãkpã lákũ n a lɛ́ sɛ̀ nà. 
N surabanaa zã̀ kũ yãvãnikɛrinↄ, zaakũ òdi n yãdannɛnanↄ wɛtɛro. 
N wɛ̃nda zↄ̃kↄ̃, Dikiri, ǹ ma wɛ̃̀ndi dãkpã lákũ n yãzɛdekɛ de nà. 
Ma ibɛrɛ kũ òdi wɛ́ tãmanↄn dasi, ama mádi zã n yãnↄaro. 
Má ye n náanisaridenↄ kãiro, kũ ò n yã kũnaro yãi. 
Ǹ gwa lákũ má ye n ↄdↄkii nà. Dikiri, ǹ ma wɛ̃̀ndi dãkpã n gbɛ̃kɛ yãi. 
N yã sĩnda pínki bi yãpuramɛ, n dokayãnↄn mana ò lakana vĩro. 
Gbãnadenↄ dì wɛ́ tãma pã, ama n yã vĩna dì ma kũ. 
Madì pↄnna kɛ kũ n lɛ́sɛnaao, lákũ ma aruzɛkɛ zↄ̃kↄ̃ sɛ̀tɛ zĩ̀i gũn bà. 
Ma zã manafikin, má ye a yãiro, n dokan má yei. 
Madìgↄ̃ n táaki lɛ́ gↄrↄ do gɛ̃̀n supplapla kũ n dokayãnↄn mana yãi. 
Gbɛ̃ kũ ò ye n dokainↄ aafia zↄ̃kↄ̃, yãke dì tó ò furo. 
Ma wɛ́ dↄi ǹ ma sura ba, Dikiri, madì tɛ́ n yãditɛnanↄi. 
Má n yãnↄ kũna, zaakũ má yei manamana. 
Madì n ↄdↄki gwa madì n yãnↄ ma, zaakũ ma yãkɛna sĩnda pínki kú n ↄĩmɛ. 
Ǹ tó ma wikilɛna n kĩnaa le, Dikiri, ǹ ma gba laakari lákũ n ò nà. 
Ǹ tó ma aduakɛna n ki le, ǹ ma sura ba lákũ n lɛ́ sɛ̀ nà. 
N táakilɛna gↄ̃ da ma lɛ́n, zaakũ ndì n yãdannɛnanↄ damɛnɛ. 
Mani lɛ̀ sí n lɛ́sɛnaa musu, zaakũ n yãditɛnanↄn mana pínki. 
Ǹgↄ̃ kú kũ soruo ǹ ↄ dama, zaakũ ma zɛ kũ n ↄdↄkio. 
Matɛni a ni dɛ ǹ ma sura ba, Dikiri, n dokamɛ ma pↄnna ũ. 
Ǹ tó màgↄ̃ kun, manigↄ̃ n táaki lɛ́, ǹ tó n dokayãnↄ gↄ̃ ma kũna. 
Ma zã zɛ́a lán sã kũ à sã̀tɛ bà, ǹ makũ n zↄ̀bleri wɛtɛ, zaakũ n yãdannɛnanↄ dí sãmaguro. 
