﻿ZABURA.
107.
À Dikiri sáabu kɛ, zaakũ à mana, a gbɛ̃kɛ lakana vĩro. 
Gbɛ̃ kũ Dikiri ń bónↄ o lɛ, gbɛ̃ kũ à ń bó ń ibɛrɛnↄ ↄĩnↄ. 
Gbɛ̃ kũ à ń bó bùsu kũ bùsuuo à ń kakara bona ifãboki kpa kũ a lɛ́tɛ kpao kũ gugbãnduru kpao kũ gɛ̀nↄmidↄki kpaonↄ. 
Ń gbɛ̃kenↄ likara zↄ̃̀ gbárannan, odi wɛ̃tɛ kũ oni gɛ́ vutɛn zɛ́ dↄ̃ro. 
Nà ń dɛ́, ími ń kũ, ǹ wɛ̃̀ndii gↄ̃̀ lɛɛkɛɛ. 
Akũ ò wiki lɛ̀ Dikiria ń warikɛnan, akũ à ń bó ń wɛ́tɛ̃ra gũn. 
À ń dá zɛ́ súsun ari ò kà wɛ̃tɛ kũ oni vutɛn. 
Ò Dikiri sáabu kɛ a gbɛ̃kɛ yãi kũ yãbonsarɛ kũ àdi kɛ gbɛ̃nↄnɛɛo. 
Zaakũ àdi ímidɛrinↄ kòto yĩda kũńnɛ, àdi pↄ́ mana kpá nàdɛrinↄa ò kã. 
Ń gbɛ̃kenↄ kú ga gusiran, òtɛn wari kɛ yĩna kũ mↄ̀kakↄ̃anaao. 
Zaakũ ò gì Luda yã mai, ò Luda Musude lɛ́damma gya bò. 
À tò ò ń búsa kũ zĩ gbãnao, ò gɛ̃̀ɛ sì ò lɛ̀tɛ, kpanyĩri kunlo. 
Akũ ò wiki lɛ̀ Dikiria ń warikɛnan, akũ à ń bó ń wɛ́tɛ̃ra gũn. 
À ń bó ga gusiran, à ń mↄ̀kakↄ̃ananↄ gà à kɛ̃̀kɛ̃. 
Ò Dikiri sáabu kɛ a gbɛ̃kɛ yãi kũ yãbonsarɛ kũ àdi kɛ gbɛ̃nↄnɛɛo. 
Zaakũ àdi bĩnilɛ gbà kũ ò pì kũ mↄ̀gotɛ̃oo gboro, àdi mↄ̀si gbãngo zɛ́tatabↄnↄ ɛ́'ɛ. 
Ń gbɛ̃kenↄ lìkara ń sãgbãna yãi, ò wɛ́tãmma lè ń taarinↄ yãi. 
Pↄ́ble ni bò ń pↄn, ò kà gana. 
Akũ ò wiki lɛ̀ Dikiria ń warikɛnan, akũ à ń bó ń wɛ́tɛ̃ra gũn. 
À a yã zĩ̀ḿma, akũ ò wèrekↄ̃a, à ń bó ga lɛ́i. 
Ò Dikiri sáabu kɛ a gbɛ̃kɛ yãi kũ yãbonsarɛ kũ àdi kɛ gbɛ̃nↄnɛɛo. 
Ò kɛnnakũkↄ̃o sa oa, ò a yãkɛnanↄ baba kũ ayuwiikɛnaao. 
Ń gbɛ̃kenↄ dì ísira musu gó gũn, òtɛn laga tá í zↄ̃kↄ̃la. 
Ò Dikiri yãkɛnanↄ è, kũ yãbonsarɛ kũ àdi kɛ í daguranↄo. 
À yã ò, akũ zàga'ĩa gbãna kàka, ísira sↄ̃ à fùtɛ musumusu. 
Òtɛn futɛ musu, òtɛn su zĩtɛ, ò kú kari lɛ́i, akũ swɛ̃̀ɛ kɛ̃̀ńgu. 
Gó yĩ̀gãyĩgã kũńwo, ò tàtantatan kɛ̀ lán wɛ̃dɛrii bà, ítɛ'ↄ̃ndↄ̃ sĩnda pínki làkaḿma. 
Akũ ò wiki lɛ̀ Dikiria ń warikɛnan, akũ à ń bó ń wɛ́tɛ̃ra gũn. 
À ĩa gbãna zɛ̀, à gↄ̃̀ ĩa fɛɛɛ ũ, à ísↄ̃ kpàtɛ, akũ í zɛ̀ kítikiti. 
Kũ gu yĩ̀, ń pↄ kɛ̀ nna, akũ à gɛ̀ɛ kũńwo gódↄki kũ òtɛn wɛtɛ kpa. 
Ò Dikiri sáabu kɛ a gbɛ̃kɛ yãi kũ yãbonsarɛ kũ àdi kɛ gbɛ̃nↄnɛɛo. 
Ò a tↄ́ bo dasi kↄ̃kakaranaa gũn, ò a táaki lɛ́ don'arɛdenↄ kakaranan. 
À swa ídenↄ kɛ̀ gbáranna ũ, à tò ísɛ̃bokinↄ gↄ̃̀ gukori ũ. 
À zĩtɛ arubarikade lì guwiside ũ gbɛ̃ kũ ò vutɛnↄ yãvãnikɛna yãi. 
À gbáranna lì sɛ̀bɛ ũ, à tò gukori gↄ̃̀ ísɛ̃bokinↄ ũ. 
À nàdɛrinↄ kàtɛ gwe, akũ ò wɛ̃tɛ kàtɛ ò vùtɛn. 
Ò burapↄnↄ tↄ̃̀, ò geepi línↄ bà, akũ à nɛ́ ìńnɛ manamana. 
À arubarikaa dàńgu, ò kɛ̀ dasi manamana, adi tó ń pↄ́kãdenↄ làgoro. 
Akũ à ń lago dↄ, ò bùsa gbãnamↄnnɛna kũ kisirao kũ pↄsirao yãi. 
À wé'i dà kínɛnↄa, à tò ò likara zↄ̃̀ gukori zɛ́saride gũn. 
Ama à wɛ̃ndadenↄ bò takasikɛn à ń sɛ́ lei, à tò ń ↄndenↄ kɛ̀ dasi lán kpàsapↄnↄ bà. 
Tó gbɛ̃ mananↄ è, òdi pↄnna kɛ, gbɛ̃ vãninↄ sↄ̃ òdi ń lɛ́ nakↄ̃a. 
Ɔ̃ndↄ̃de laakari dↄ yã pìnↄa, à Dikiri gbɛ̃kɛ gwa lákũ à de nà. 
