﻿ZABURA.
105.
À Dikiri sáabu kɛ à a tↄ́ kpá, à tó burinↄ a yãkɛnanↄ dↄ̃. 
À lɛ̀ sí à a táaki lɛ́, à a yãbonsarɛkɛnanↄ baba pínki. 
À ĩa dã kũ Dikiri tↄ́ kũ à kú adonaao, ákↄ̃nↄ Dikiri kiwɛtɛrinↄ à pↄnna kɛ. 
À Dikiri ki wɛtɛ à gbãna wɛ́ kɛa, àgↄ̃ a arɛ wɛtɛ lakanaa sari. 
À tó yãbonsarɛ kũ à kɛ̀nↄ dↄágu, a daboyãkɛnanↄ kũ a yãkpatɛkɛnanↄo, 
ákↄ̃nↄ Dikiri zↄ̀bleri Ibrahĩ burinↄ, ákↄ̃nↄ Yakubu buri kũ à á sɛ́nↄ. 
Àkũmɛ Dikiri ó Luda ũ, a yãkpatɛkɛna kú andunia gũn pínki. 
A bàka kunna kũoo yã dì sãagu zikiro, yã kũ à dìtɛ nigↄ̃ kun ari ó buria. 
A bàka kú kũ Ibrahĩo, à ɛ̀ra à sì kũ a kunnaao Isaakunɛ dↄ. 
A yã pìi pàpa Yakubunɛ dokayã ũ, akũ à kú kũ Isarailanↄo ari gↄrↄ sĩnda pínki. 
À pì áni Kanaanↄ bùsu kpáḿma, anigↄ̃ de ń baka ũ kũ ògↄ̃ vĩ. 
Gↄrↄ birea ò dasiro, òdi ń yã daro, ò kú Kanaanↄ bùsun bòasunↄ ũmɛ. 
Òdigↄ̃ likara zↄ̃ buri kũ burionↄ tɛ́, òdigↄ̃ kure bùsu kũ bùsuuo. 
Adi we ò gbãna mↄ̀ńnɛro, à kpã̀kɛ̃ kínanↄi ń yã musu à pì, 
òsun ↄ na gbɛ̃ kũ a ń sɛ́nↄaro, òsun wɛ́ tã a annabinↄaro. 
Akũ à tò nàa gɛ̃̀ bùsuu pìn, à tò ń zànaa làka pínki. 
Akũ à Yusufu gbàrɛ à dòńnɛ ń arɛ, ò a yìa zↄ̀ ũ. 
Ò mↄ̀kpatii kpà a gbáa, ò mↄ̀kakↄ̃anaa kà a wakalɛ 
ari yã kũ à gĩnakɛ à òo gɛ̀ɛ à pàpao, akũ yã kũ Dikiri dànɛɛ tò yã bò kãao nna. 
Kũ kína gbɛ̃ zĩ̀, akũ ò a gbàrɛ, bùsu gbɛ̃ zↄ̃kↄ̃ↄ pì a kɛ̃̀. 
À a dìtɛ a bùsu don'arɛde ũ, à tò à iko vĩ a aruzɛkɛnↄa pínki. 
Yusufu a kínanɛnↄ tòto a pↄyeinaaa, à ↄ̃ndↄ̃ dàda a ìbanↄnɛ. 
Akũ Yakubu sù Misila, Isarailanↄn kun nibↄnↄ ũ Hamu burinↄ bùsun. 
Dikiri tò a gbɛ̃nↄ kↄ̃̀ gwe manamana, à tò ò dasi kũ̀ de ń ibɛrɛnↄla. 
À ń ibɛrɛɛ pìnↄ sã vùńnɛ, akũ ò zã̀ a gbɛ̃nↄgu, de ò ↄ̃ndↄ̃ kɛ a zↄ̀blerinↄnɛ. 
À a zↄ̀bleri Musa zĩ̀ḿma kũ Haruna kũ à a sɛ̀ɛo. 
Ò dabodabonↄ kɛ̀ Misilanↄnɛ, ò yãbonsarɛnↄ kɛ̀ Hamu burinↄ bùsun. 
À gusira gbàrɛḿma, gu sì ń bùsun, kũ ò gì a yã mai yãi. 
À ń ínↄ lì aru ũ, akũ ń kpↄ̀nↄ gàga. 
Kasonↄ dà ń bùsula kũ ń gbãnadenↄ wutɛkinↄ pínki. 
À yã ò, akũ ífĩninↄ dàńla, sàanↄ sì ń tɛ́ ari ń bùsu lɛ́n pínki. 
À legũgbɛɛ kↄ̀tɛńnɛ legũ gɛ̃nɛ ũ, surapatanaa dà ń bùsula pínki. 
À ń geepi línↄ ɛ̀'ɛ kũ ń kakapura línↄ, à ń bùsu línↄ kɛ̀ búgubugu. 
À yã ò, akũ kwanↄ dàńla, kwa zɛ̃kↄ̃nↄ kà ò lɛ́ vĩro. 
Ò ń bùsu sɛ̃̀ kũ láo blè ò nɛ̀, ò ń burapↄnↄ blè pínki. 
À ń bùsu daudunↄ dɛ̀dɛ ń pínki, ń nɛ́ daudu kũ ò ì ń kɛfɛnnakɛgↄrↄanↄ. 
À bò kũ Isarailanↄ, ò andurufu kũ wuraao sɛna, ń buri gbɛ̃ke dí gɛ̃̀ sí zɛ́nlo. 
Kũ ò bↄ̀tɛ, Misilanↄ pↄ kɛ̀ nna, kũ vĩna ń kũ Isarailanↄ yã musu. 
À tɛ́luku dà a gbɛ̃nↄla, à kɛ̀ tɛ́ ũ gwãani à gu pùńnɛ. 
Ò wɛ́ kɛ̀a, akũ à sùńnɛ kũ kpɛkpɛrɛwinↄ, à musu pↄ́ble kpàḿma, ò mↄ̀ḿma. 
À gbɛ̀si pàra, akũ í bòn, í bàa lɛ̀ gbárannan gwe lán swa'i bà. 
Zaakũ à dↄ̀ lɛ́ kũ à sɛ̀ a zↄ̀bleri Ibrahĩnɛ yãn. 
À bò kũ a gbɛ̃nↄ, òtɛn pↄnna kɛ, gbɛ̃ kũ à ń sɛ́nↄ tɛn ayuwii dↄ. 
À burinↄ bùsuu kpàḿma, ò zĩ kũ dakenↄ kɛ̀ɛ àree blè, 
de ò le ògↄ̃ a yãditɛnanↄ kũna, ò a dokayãnↄ da. Aleluya! 
