﻿ZABURA.
103.
Dauda lɛ̀ɛ. Ma swɛ̃, ǹ Dikiri sáabu kpá, ma gu sĩnda pínki, ǹ a tↄ́ kũ à kú adona bo. 
Ma swɛ̃̀, ǹ Dikiri sáabu kpá, ǹsun sã a yãmanakɛna kenlo. 
Àdi ma taarinↄ kɛ̃ma pínki, àdi ma werekↄ̃a kũ ma gyãnↄ pínki. 
Àdi ma wɛ̃̀ndi bo gyãwãn, àdi a nna diramɛnɛ a gbɛ̃kɛ kũ a wɛ̃ndaoo gũn. 
Àdi tó pↄ́ mana kũ má yeinↄ mↄ́ma, de ma kɛfɛnnakɛ le àgↄ̃ dufu lán vãu pↄ́ bà. 
Dikiri dì yã kɛ a zɛ́a, àdi tó yã bo gↄ̃nawɛ̃ndadenↄo nna. 
À tò Musa a pↄyeina yã dↄ̃̀, à a yãbonsarɛnↄ mↄ̀ Isarailanↄnɛ. 
Dikiri sùru vĩ kũ wɛ̃ndao, a pↄ dì fɛ̃ likaro, a gbɛ̃kɛ dasi manamana. 
Ani ń taari le gɛ̃̀n baaakↄ̃ro, ani pↄfɛ̃ da a nɛ̀sɛn gↄrↄ sĩnda pínkiro. 
Àdi yã kɛwɛrɛ lán ó durunnanↄn de nàro, àdi fĩna bowá lán ó sãtɛnanↄn de nàro. 
Lákũ ludambɛ lei de nà kũ zĩtɛo, lɛn à gbɛ̃kɛ zↄ̃kↄ̃ kũ a vĩnakɛrinↄo lɛ. 
Lákũ ifãboki zã̀kↄ̃nɛ kũ a lɛ́tɛ kpao nà, lɛn àdi ó taarinↄ kɛ̃wá lɛ. 
Lákũ de dì a nɛ́nↄ wɛ̃nda gwa nà, lɛn Dikiri dì wɛ̃nda dↄ̃ a vĩnakɛrinↄnɛ lɛ. 
Zaakũ à dↄ̃ pↄ́ kũ à ó kɛ́o, à dↄ̀n kũ bùsuumɛ ó ũ. 
Bisãsiri wɛ̃̀ndi kutu lán sɛ̃̀ɛ bà, àdigↄ̃ gakuri vĩ gↄrↄ pla lán lávu bà. 
Tó ĩa pàa, àdi gɛ̃tɛ, gu kũ à kunn pìi dì dↄ a yãn doro. 
Dikiri dìgↄ̃ gbɛ̃kɛ vĩ kũ a vĩnakɛrinↄ zaa káaku ari gↄrↄ sĩnda pínki, àdi yã mana kɛ ń nɛ́nↄnɛ kũ ń daikorenↄ, 
gbɛ̃ kũ ò zɛ̀ kũ a bàka kunna kũńwo yão akũsↄ̃ ò yã kũ à dìtɛnↄ kũnanↄ. 
Dikiri a kpataa dìtɛ musu, à gbãna vĩ gbɛ̃ sĩnda pínkia. 
À Dikiri sáabu kpá, ákↄ̃nↄ a malaikanↄ, ákↄ̃nↄ gbãnade kũ adì a yã ma à zĩ kɛanↄ. 
À Dikiri sáabu kpá, ákↄ̃nↄ ludambɛ zĩ̀karinↄ á pínki, ákↄ̃nↄ a zĩkɛri kũ adì a pↄyenyĩna yã kɛnↄ. 
À Dikiri sáabu kpá, ákↄ̃nↄ a pↄ́kɛnanↄ á pínki gu kũ àtɛn kí blennↄ pínki. Ma swɛ̃̀, ǹ Dikiri sáabu kpá. 
