﻿ZABURA.
94.
Dikiri Luda Mↄrakari, Luda Mↄrakari, ǹ bo gupuran! 
Andunia yãkpatɛkɛri, ǹ futɛ, ǹ fĩna bo zĩdabirinↄa ń yãkɛnaaa. 
Gbɛ̃ vãninↄ nigↄ̃ pↄnna kɛ ari bↄrɛmɛɛ? Ari bↄrɛmɛɛ, Dikiri? 
Yãvãnikɛrinↄ dì gↄ̃sa yã o, òdi yã bↄtɛ òdi ĩa dã ń pínki. 
Dikiri, òdi n gbɛ̃nↄ dúgu zↄ̃, òdi gbãna mↄ gbɛ̃ kũ n ń sɛ́nↄnɛ. 
Òdi gyaanↄnↄ kũ bòasunↄ dɛdɛ, òdi tonɛnↄ kakatɛ. 
Òdi pi Dikiri dí ń ero, Yakubu burinↄ Luda laakari kúḿmaro. 
Ákↄ̃nↄ yↄ̃nkↄnↄ, à laakari kɛ! Ákↄ̃nↄ mìsaridenↄ, áni ↄ̃ndↄ̃ kũ bↄrɛmɛɛ? 
Luda mɛ́ à sã pɛ̀, ani gí yã mai yá? À wɛ́ kɛ̀, ani gí gu ei yá? 
Àdi burinↄ toto, ani ń sã gágaro yá? Àdi yã dańnɛ, à dↄ̃na vĩro yá? 
Dikiri bisãsiri laasun dↄ̃, kũ yã pãmɛ. 
Arubarikademɛ gbɛ̃ kũ ndì toto ǹ n doka dadanɛ ũ, Dikiri. 
Ndì a laakari kpátɛnɛ warikɛgↄrↄa ari ò gɛ́ wɛ̀ɛ yↄ̃ vãnikɛriinɛ. 
Dikiri ni pã kpá a gbɛ̃nↄiro, ani gbɛ̃ kũ à ń sɛ́ a pↄ́ ũnↄ zukũnaro. 
Oni ɛra ò yãkpatɛ kɛ a zɛ́a, nɛ̀sɛpuradenↄ ni zɛo. 
Dí mɛ́ ani futɛmɛnɛ gbɛ̃ vãninↄaa? Dí mɛ́ ani zɛ kũmao yãvãnikɛrinↄ yã musuu? 
Tó adi kɛ Dikiri kpányĩ kɛ̀mɛnɛnlo, de má kú miran kítikiti kↄ̀. 
Kũ ma pì guzãrɛ tɛni ma sɛ́tɛ, n ma kũ n gbɛ̃kɛ gũn, Dikiri. 
Kũ laasun pà ma swɛ̃̀n, n ma laakarii kpàtɛmɛnɛ n ma pↄ kɛ̀ nna. 
N bàka nigↄ̃ kú kũ yãlɛkpɛrɛgↄ̃gↄ̃rinↄ kpataao yá? Ń yãditɛnanↄ dì suńnɛ kũ wario. 
Òdi lɛ́ kpákũsũ gbɛ̃ manai, òdi yã da taarisaridela ò a dɛ. 
Dikirimɛ ma zɛki gbãna ũ, ma Ludamɛ gbɛ̀si kũ madì utɛn ũ. 
Ani ń vãnikɛna ɛraḿma, ani ń buri bo ń taarinↄ yãi. Dikiri ó Luda ni ń buri bo. 
