﻿ZABURA.
92.
Kámmabogↄrↄ lɛ̀ɛ. À mana ò n sáabu kpá, Dikiri, ò lɛ̀ sí ò n tↄ́ bo, Luda Musude, 
ò n gbɛ̃kɛ baba kↄnkↄ, ò n náanikɛyã o gwãani, 
ò n táaki lɛ́ kũ mↄrↄↄo kũ gidigboo kũ kontigiio. 
N yãkɛnanↄ dì ma pↄ kɛ nna, Dikiri, madì ayuwii kɛ n ↄzĩkɛnanↄa. 
Dikiri, n yãkɛnanↄn zↄ̃kↄ̃ manamana, n laasunnↄn zã̀ à kɛ̀ zↄ̃kↄ̃. 
Yↄ̃nkↄ yã pì dↄ̃ro, mìsaride ni fↄ̃ à dↄ̀rↄ dↄ̃ro. 
Bee tó gbɛ̃ vãninↄ fùtɛ ò gbã̀ lán sɛ̃̀ɛ bà akũsↄ̃ yãvãnikɛrinↄ karana lè ń pínki, ń zia bi kakatɛna lakanasarimɛ. 
Mↄkↄ̃n sↄ̃ Dikiri, ndìgↄ̃ kú musu gↄrↄ sĩnda pínki. 
Ǹ gwa, n ibɛrɛnↄ tɛn láka, vãnikɛrinↄ tɛn fãkↄ̃a ń pínki. 
N ma gba gbãna lán zùsɛ̃ntɛ bà, n nísi mana kù ma mìia. 
Ma wɛ́ sì ma wɛtɛrinↄ lɛtɛnalɛ, ma sã ma ibɛrɛ vãninↄ wikilɛnaa mà dↄ. 
Gbɛ̃ mananↄ ni gbã lán domina línↄ bà, oni kɛ zↄ̃kↄ̃ lán Lɛbana sida línↄ bà. 
Ò pɛna Dikiri bɛ gũn, oni gbã ó Luda ↄnn. 
Bee kũ ń zĩkũkɛo onigↄ̃ nɛ́ imɛ, ń lá nigↄ̃ tɛ́ kɛ síi plɛ̀plɛ. 
Ò pi, Dikirin mana, àkũmɛ ó gbɛ̀si ũ, vãni ke kú a gũnlo. 
