﻿ZABURA.
90.
Luda gbɛ̃ Musa aduakɛnaa. Dikiri, ó utɛkimɛ n ũ wɛ̃̀ kũ wɛ̃̀ɛo. 
De ń kpɛ́ ǹ kpinↄ kɛ, de ń kpɛ́ ǹ zĩtɛ kũ anduniao kátɛ, Ludamɛ n ũ zaa káaku ari gↄrↄ sĩnda pínki. 
N dìtɛ kũ bisãsiri ɛra zĩtɛ, ndì pińnɛ ò ɛra bùsun. 
Wɛ̃̀ wàa sↄↄro dennɛ lán gↄrↄ do bà, à dennɛ lán gĩa ke gwãani zaka bà. 
Ndì bisãsiri sɛ́ kũ ga'io, ò de lán sɛ̃̀ yĩda bà kↄnkↄ. 
Àdi butɛ kↄnkↄ à gbã, àdi yitoro kũ ↄkↄsi à kori kɛ. 
N pↄfɛ̃ dì ó kakatɛ, n patammanaa dì swɛ̃̀ kɛ̃ógu. 
Ó yã vãninↄn katɛna n arɛ, ó asiriyãnↄ bò gupuran n kùru. 
Ó gↄrↄ dì gɛ̃tɛ n pɛ̃tɛ̃ yãi, ó wɛ̃̀ndii dì láka kũ ndanaao. 
Ó wɛ̃̀ɛ dì ká baaakↄ̃ akuri, tó ó gbãna sↄ̃, basiikↄ̃. Wari kũ pↄsiraoon wɛ̃̀ɛ pìnↄ dì suowɛrɛ, òdi gɛ̃tɛ likalika, akũ odì kpágui. 
Dí mɛ́ à n pↄfɛ̃ gbãna lɛ́ dↄ̃ↄ? n pɛ̃tɛ̃ zↄ̃kↄ̃ↄ kà vĩna kũ à de ò kɛnnɛ ũ. 
Ǹ dadawɛrɛ ògↄ̃ ó wɛ̃̀ndi kutukɛ lɛ́ dↄ̃, de ò ↄ̃ndↄ̃ le ó swɛ̃̀ɛ gũn. 
Dikiri, bↄrɛn ĩni n pↄfɛ̃ kpátɛɛ? Ǹ n zↄ̀blerinↄ wɛ̃nda gwa. 
Ǹ tó n gbɛ̃kɛ suwá lákũ gu dìgↄ̃ dↄ nà, de ògↄ̃ pↄnna kɛ kũ ayuwiikɛnaao ari ó gↄrↄ lɛ́n. 
Ǹ ó pↄ kɛ nna ↄ kũ n tↄ̃̀wá gↄrↄ lɛ́n, wari kũ o kɛ̀ wɛ̃̀ lɛ́n. 
Ǹ n yãkɛnanↄ mↄ ókↄ̃nↄ n zↄ̀blerinↄnɛ, ǹ tó ó nɛ́nↄ n gbãna gakuri dↄ̃. 
Dikiri ó Luda, ǹ tó ò n pↄnna le, ǹ tó ó zĩ àre le, ee, ǹ tó ó zĩ àre le. 
