﻿ZABURA.
85.
Kora burinↄ lɛ̀ɛ. N arubarikaa dà n bùsun, Dikiri, n su kũ Yakubu burinↄ ń gwena zĩn. 
N n gbɛ̃nↄ taarinↄ gòḿma, n ń durunnanↄ kɛ̃̀ḿma pínki. 
N n pↄ kpã̀kpãa tò pínki, n n pↄfɛ̃ pãsĩ tò. 
Ǹ su kũoo ó gwena zĩn, Luda ó Surabari, ǹ pɛ̃tɛ̃ kũ n kɛ̀ kũoo lago. 
N pↄ nigↄ̃ fɛ̃nawái gↄrↄ sĩnda pínkin yá? Ĩnigↄ̃ n pↄfɛ̃gↄrↄ gága wɛ̃̀ kũ wɛ̃̀ɛon yá? 
Ĩni ɛra ǹ n gbɛ̃nↄ kunna kɛkɛ ǹ kɛńnɛ dↄ, de ń pↄ le à kɛmma nnaroo? 
Dikiri, ǹ n gbɛ̃kɛ mↄwɛrɛ, ǹ ó sura ba kũ n gbãnao. 
Ma sã dↄ Dikiri Luda yã'onaaa, zaakũ àdi aafia lɛ́ sɛ́ a yãmarinↄnɛ, tó odi ɛra ò sù ń yↄ̃̀nkↄyãnↄaro. 
A vĩnakɛrinↄ surabanaa gↄrↄ zã̀ro, de a gakuri le àgↄ̃ kú ó bùsun yãi. 
Gbɛ̃kɛ kũ náanio dì dakarɛ, yãzɛde kũ aafiaao dì ↄ kpákↄ̃a. 
Náani dì ↄ poro musu, yãzɛde dì ↄ nↄnↄ zĩtɛ. 
Dikiri ni yã mana kɛwɛrɛ, ó zĩtɛ ni pↄ́ble kɛ. 
Yãzɛde dìgↄ̃ tɛ́ a arɛ, àdi zɛ́ kɛkɛnɛ. 
