﻿ZABURA.
76.
Asafa lɛ̀ɛ. Òdi sí kũ guruminↄo. Ò Luda dↄ̃ Yudanↄ bùsummɛ, a tↄ́ zↄ̃kↄ̃ Isarailanↄ tɛ́. 
A bizakuta kú Salɛmu, a kúki kú Zaiↄ̃. 
Zaa gwen à kà wãnanↄ ɛ̀'ɛn kũ sɛ̃gbakonↄ kũ fɛ̃nɛdanↄ kũ zĩ̀kabↄnↄo. 
Ndì gu pu ndìgↄ̃ tɛ́ kɛ, n zↄ̃kↄ̃kɛ de kpi kũ ò kun gↄrↄ sĩnda pínkinↄla. 
N kùgbãnadenↄ gↄ̃kɛbↄnↄ sìḿma, ò wutɛna kũ ga'io, gↄ̃ gbãna pìnↄ doke dí fↄ̃ à a ↄ sɛ̀ro. 
Yakubu Luda, n kpãkɛ̃ńyĩ, akũ sↄ̃denↄ kũ ń sↄ̃nↄ gↄ̃̀ katɛna gɛ̀nↄ ũ. 
Mↄkↄ̃n mɛ́ ń naasi vĩ ndo, tó n pↄ́ bò n yĩn, dí mɛ́ ani fↄ̃ à zɛ n arɛɛ? 
Zaa musu n yãkpatɛ kɛ̀, akũ vĩna andunia kũ̀, à yĩ̀tɛ kítikiti, 
zĩ kũ Luda, n futɛ ǹ yã gↄ̃gↄ̃ andunianɛ de ǹ gbãnasaridenↄ sura ba. 
N pↄfɛ̃na gbɛ̃nↄi dì n tↄ́ bo, n pↄfɛ̃ kpara dìgↄ̃ dↄ n pi. 
À lɛ́ kɛ Dikiri á Ludaa à a fĩna bo. Ákↄ̃nↄ kũ á likanawáinↄ, à mↄ́ à Luda kũ à de ògↄ̃ a vĩna vĩ gba pↄ́. 
Àdi kpatablerinↄ kã kpátɛ, àdi tó vĩna andunia kínanↄ kũ. 
