﻿ZABURA.
72.
Sulemanu lɛ̀ɛ. Luda, ǹ dada kínanɛ à yãkpatɛ kɛ kũ yãpurao, ǹ tó kína yã mana kɛ lákũ ndì kɛ nà, 
de à do n gbɛ̃nↄnɛ arɛ a zɛ́a, à yã gↄ̃gↄ̃ talakanↄnɛ súsu, 
gbasa kpinↄ ni su gbɛ̃nↄnɛ kũ aafiaao, sĩ̀sĩnↄ ni tó ògↄ̃ kú nnamanaa gũn. 
Kína ni tó yã bo kũ talakanↄ nna, ani takaside nɛ́nↄ sura ba, ani gbãnamↄnnɛrinↄ dúgu zↄ̃. 
Anigↄ̃ kun lákũ ifãntɛ̃ dìgↄ̃ kun nà, lán mↄvura dìgↄ̃ kun nà wɛ̃̀ kũ wɛ̃̀ɛo. 
Anigↄ̃ de lán kabura legũ bà, lán mↄtↄ kũ àdi pisi zĩtɛaa bà. 
Gbɛ̃ mananↄ ni ↄ tá a gↄrↄa, nnamana nigↄ̃ zↄ̃kↄ̃ ari mↄ súngↄ̃ kun doro. 
Ani kí ble zaa ísira bara la kũ bara direo, sɛna zaa Yuflati ari gɛna andunia lɛ́a. 
Buri kũ ò kú gbáranna gũnnↄ ni su ò kútɛnɛ, a ibɛrɛnↄ ni wútɛ kũ kùaao a arɛ. 
Tasisi kína kũ ísira bara kínanↄ ni táfe bonɛ, Seba kũ Sɛba kínanↄ ni su ò gba danɛ. 
Kínanↄ ni su ò kútɛ a arɛ ń pínki, buri sĩnda pínki ni donyĩ. 
Zaakũ ani wɛ̃ndade kũ ń wiki dↄnↄ bomɛ, ani takaside kũ ò kpanyĩri vĩronↄ sura ba. 
Ani gbãnasaridenↄ wɛ̃nda gwa, ani takasidenↄ bo ga lɛ́i. 
Ani ń bo gbãnamↄnnɛrinↄ kũ gbɛ̃ pãsĩnↄ ↄĩ, zaakũ à ye ń arukↄtɛnaairo. 
Luda kína dↄ̃ kũ aafiaao! Ògↄ̃ a gba Seba bùsu wuraa, ògↄ̃ wɛ́ kɛnɛ Ludaa lakanaa sari, ògↄ̃ sa mana onɛ gↄrↄ sĩnda pínki. 
Ǹ tó burapↄnↄ kɛ a bùsun manamana, a lánↄ gↄ̃ da sĩ̀sĩnↄ musu síi, ò nɛ́ i ò pia lán Lɛbana lákpɛ bà, ò gbã lán kàsapli bà sɛ̃̀ntɛ. 
Ǹ tó a tↄ́ gↄ̃ kun gↄrↄ sĩnda pínki lán ifãntɛ̃ bà, buri sĩnda pínki ni arubarika le a gãi, oni a tↄ́ nna sí. 
Arubarikaden Dikiri Luda, Isarailanↄ Luda! Àkũ mɛ́ àdi yãbonsarɛnↄ kɛ ado. 
Ògↄ̃ a tↄ́ gakuride bo gↄrↄ sĩnda pínki! À tó a gakuri da anduniala pínki! Aami! Aami! 
Yɛsɛ nɛ́ Dauda aduakɛna lɛ́n gwe. 
