﻿ZABURA.
71.
Dikiri, mↄkↄ̃nn ma nanyĩ, ǹsun tó wé'i ma kũ zikiro. 
Ǹ ma bo ǹ ma mì sí n manakɛna yãi, ǹ sã kpámai ǹ ma sura ba. 
Ǹgↄ̃ de ma utɛki gbɛ̀ kũ manigↄ̃ gɛ́ utɛn ũ. N dìtɛ ǹ ma sura ba, ma gbɛ̀si kũ ma zɛki gbãnaoomɛ n ũ fá! 
Ma Luda, ǹ ma bo yãvãnikɛrinↄ ↄĩ, ǹ ma sí gbɛ̃ vãni pãsĩnↄa. 
Mↄkↄ̃nn ma wɛ́ dↄnyĩ, Dikiri Luda, mↄkↄ̃nn má n náani vĩ zaa ma kɛfɛnnakɛgↄrↄa. 
Ma gbãna lèmma zaa ma igↄrↄ, mↄkↄ̃n mɛ́ n ma bo ma da nɛ̀sɛn. N táakin madìgↄ̃ lɛ́. 
Ma kunna de yãbonsarɛ ũ gbɛ̃nↄnɛ dasi, zaakũ mↄkↄ̃mmɛ ma utɛki gbãna ũ. 
N táakilɛna dìgↄ̃ da ma lɛ́n, madìgↄ̃ n manakɛ bo kↄnkↄ kũ ↄkↄsio. 
Ǹsun pã kpámai ma zĩkũkɛna yãiro, ǹsun ma zukũna ma gbãna lakana yãiro. 
Zaakũ ma ibɛrɛnↄ tɛni ma pi, ma wɛtɛrinↄ tɛn lɛ́ kpákũsũmai ma wɛ̃̀ndi bona yãi. 
Ò pì: Luda gìimɛ, ò pɛ́a ò kũ, gbɛ̃ke kun kũ à a sura baro. 
Luda, ǹsungↄ̃ kú kũmao zã̀ro, ma Luda, ǹ kɛ likalika ǹ mↄ́ ǹ kpámai. 
Ǹ tó wé'i gbɛ̃ kũ òtɛn yã dimanↄ kũ de ò kakatɛ, ǹ tó sↄ̃sↄ̃na da gbɛ̃ kũ òtɛn wɛ́ tãmanↄla de ń tↄ́ yaka. 
Makũ sↄ̃, ma wɛ́ nigↄ̃ dↄnyĩ, manigↄ̃ n táaki lɛ́ màgↄ̃ gɛ́. 
N manakɛna nigↄ̃ da ma lɛ́n gↄrↄ sĩnda pínki kũ n surabana kũ má a lɛ́ dↄ̃roo. 
Mani su mà n zↄ̃kↄ̃kɛyãnↄ o Dikiri Luda n mɛ̀n do manakɛn mani da gbɛ̃nↄnɛ. 
N yã dàmɛnɛ zaa ma kɛfɛnnakɛgↄrↄa, Luda, ari tera matɛni n yãbonsarɛnↄ o'o. 
Bee kũ ma zĩ kũ̀, ma mìkã pura, ǹsun ma tónlo, Luda, de mà le mà n gbãna baba teradenↄnɛ, mà n gbãnakɛyã da gbɛ̃ kũ òtɛn futɛnↄnɛ ń pínki. 
Luda, n manakɛnaa zↄ̃̀ susunɛnↄa, n yã zↄ̃kↄ̃ↄ kɛ̀, dín oni lɛkↄ̃a kũnwoo? 
N tò wari pãsĩ ma le dasidasi, ama ĩni ɛra ǹ ma gba wɛ̃̀ndii dↄ, ĩni ɛra ǹ ma bo zĩtɛ. 
Ĩni ma bɛ̀ɛrɛ karamɛnɛ, ĩni ɛra ǹ ma laakari kpátɛmɛnɛ dↄ. 
Ma Luda, mani n sáabu kpá kũ mↄrↄↄo n náani yãi. Isarailanↄ Luda kũ ń kú adona, mani n táaki lɛ́ kũ gidigboo. 
Ayuwii nigↄ̃ dↄ ma lɛ́n, makũ kũ n ma mìi sì mani n táaki lɛ́. 
Manigↄ̃ n manakɛna o gↄrↄ sĩnda pínki, zaakũ wé'i gbɛ̃ kũ ò ma wɛtɛ kũ vãnionↄ kũ̀, ò gↄ̃̀ bídi gũn. 
