﻿ZABURA.
65.
Dauda lɛ̀ɛ. Luda, à kũ̀ ò n táaki lɛ́ Zaiↄ̃ ò lɛ́ kũ ò gbɛ̃̀nnɛnↄ fĩna bo. 
Mↄkↄ̃n kũ ndì aduakɛna ma, n kĩnaan buri sĩnda pínki ni sun. 
Ó yã vãninↄ ó fú, akũ n ó taarinↄ kɛ̃̀wá. 
Arubarikademɛ gbɛ̃ kũ n sɛ̀ n gɛ̃ kãao n ↄnn ũ. N kpɛ́ pↄ́ mananↄ mↄ̀wá, n kpɛ́ kũ à kú adona pìi. 
Ndì wewá kũ yã mana naasidenↄ, Luda ó Surabari. Andunia lɛ́zɛkidenↄ kũ ísirabaradenↄ wɛ́ dↄnyĩ ń pínki. 
N gbãna dànla, n kpinↄ kɛ̀ kũ n ikoo. 
Ndì ísira kũ a sↄ̃nↄ kĩni kpátɛ, ndì burinↄ zuka lákańnɛ. 
N daboyãnↄ dì swɛ̃̀ kɛ̃ gbɛ̃ kũ ò kú zĩtɛlɛanↄn, òdi ayuwii dↄmma zaa ifãboki kpa kũ a lɛ́tɛ kpao. 
Ndì laakari dↄ anduniaa, ndì a gba í, ndì taaki ká zĩtɛnɛ, n swanↄn pana kũ ío, ndì tó pↄ́wɛnↄ kɛ, zaakũ lɛn n dìtɛ lɛ. 
Ndì í dagula ari búgbanↄ pa, ndì gunↄ foko fↄ̃ kũ legũo, ndì arubarika da pↄ́ kũ à bùtɛnↄgu. 
Ndì arubarika da burazĩn wɛ̃̀ kũ wɛ̃̀ɛo, pↄ́ble níside dì kↄ́tɛ n ágban. 
Pↄ́dãdãkinↄ sɛ̃̀la bↄ̀tↄↄ kù sɛ̃̀ntɛ, sĩ̀sĩnↄ pↄnna dà uta ũ. 
Pↄ́kãdenↄ dàgula ń dãdãkinↄa, pↄ́wɛ dàgula sĩ̀sĩgɛrɛɛi. Òtɛn pↄnna wiki lɛ́, òtɛn lɛ̀ sí. 
