﻿ZABURA.
58.
Dauda lɛ̀ɛ. Gbãnadenↄ, adì yã o a zɛ́a sↄ̃ yá? Adì yãkpatɛ kɛ kũ gbɛ̃nↄo súsu yá? 
Adì yã vãni laasun lɛ́ á swɛ̃̀ɛ gũn, adì gbãna mↄ gbɛ̃nↄnɛ á bùsun. 
Gbɛ̃ vãninↄn sãtɛna zaa ń ina gↄrↄmɛ, ɛ́kɛdenↄn yakana zaa ń da nɛ̀sɛn. 
Ń lɛ́gbɛ de lán mlɛ̃̀ sɛwɛ bà, ò de lán káre kũ à a sã tàtaa bà, 
de mlɛ̃̀ɛ pì sún a kↄ̃kↄ̃'ori úra ũ maro, de àsun a dabukɛri gonikɛ ero. 
Luda, ǹ ń saka ɛ́'ɛńnɛ ń lɛ́n, Dikiri, ǹ músuu pìnↄ saka sↄ̃ntɛnↄ ɛ́'ɛńnɛ. 
Ǹ tó ò gɛ̃tɛ lán í bàasinaa bà. Tó ò sá gà, ǹ ń kànↄ ɛ́'ɛńnɛ. 
Ǹ tó ò kori kɛ zɛ́n lán kↄntↄ lɛ́'i bà, ògↄ̃ de lán nↄ̀bↄtɛnɛ kũ adi ifãntɛ̃ ero bà. 
Ari yàka tɛ́ gↄ̃ oro wã, gbɛ̃ vãninↄ ni gɛ̃tɛ kũ ĩao. 
Gbɛ̃ mananↄ ni pↄnna kɛ zĩ kũ Luda fĩna bòńnɛ gbɛ̃ vãninↄa, kũ ò ń gbá pìpi ń aru gũn. 
Gbɛ̃nↄ ni pi: Gbɛ̃ mananↄn láada vĩ fá! Luda kun, àdi yãkpatɛ kɛ andunia gũn. 
