﻿ZABURA.
55.
Dauda lɛ̀ɛ. Òdi sí kũ guruminↄmɛ. Luda, ǹ ma aduakɛna ma, ǹsun lá kú ma yãlaro. 
Ǹ sã wɛ̃ ma yãi ǹ wema, ma laasun ma likara ma gↄ̃ bídi gũn, 
ma ibɛrɛnↄ yã'ona yãi kũ gbɛ̃ vãninↄ wɛ́birimanaao, zaakũ òtɛn wari dↄmamɛ, ò ma kũna kũ pↄfɛ̃o. 
Swɛ̃̀ɛ kɛ̃̀magu, ga vĩna gɛ̃̀magu. 
Vĩna ma kũ, matɛn lukaluka, ma nini vùra. 
Tó má dɛ̀mbɛrɛ vĩ lán potɛ̃nɛ bà, de mani vura mà gɛ́ kámma bo, 
mani bàa lɛ́ mà gɛ́ zã̀zã, mani gɛ́ mà vutɛ gbárannan. 
Mani wã mà gɛ́ mà utɛki wɛtɛ, de zàga'ĩa gbãna sún ma lero yãi. 
Ǹ ń yã gboro, Dikiri, ǹ ń yã yãkatɛńnɛ, zaakũ ma è zuka kũ fìtiio kú wɛ̃tɛ gũn. 
Òdi kpátɛ kɛ bĩni musu fãnantɛ̃ kũ gwãanio, yã vãni kũ yã gbãnao di wɛ̃tɛ gũn. 
Gbɛ̃dɛdɛyã mɛ́ à wɛ̃tɛ pìi pà, gbãnamↄnnɛna kũ manafikio dì kɛ̃ a batunlo. 
Tó ma ibɛrɛ mɛ́ àtɛni ma sↄ̃sↄ̃ yã, mani mɛna, tó ma zãnguri mɛ́ à fùtɛmai, mani utɛnɛ. 
Ama mↄkↄ̃n, mↄkↄ̃n kũ ó sára lɛ́lɛ, ma gbɛ̃ndo, ma gbɛ̃nna! 
Odì fàai bo kũ kↄ̃o yã nnanna, odìgↄ̃ tɛ́kↄ̃i pari tɛ́ Luda ↄnn. 
Ga ni zãmba kɛ ma ibɛrɛnↄnɛ, ò si gyãwãn ń gbãnagↄrↄ, zaakũ vãni vutɛki è ń gũn. 
Makũ sↄ̃, madì Luda sísi, akũ Dikiri dì ma sura ba. 
Kↄnkↄ, fãnantɛ̃ kũ ↄkↄsio madìgↄ̃ ma yã'ũmmananↄ bↄtɛnɛ kũ ndanaao, akũ àdi ma yã ma. 
Bee kũ ma ibɛrɛnↄn dasi, àdi ma sí à ma bo fìtin aafia. 
Luda dìgↄ̃ vutɛna kpatan gↄrↄ sĩnda pínki, ani ma yã ma, ani wé'i daḿma, zaakũ òdi ń dà litɛro, ò Luda vĩna vĩro. 
Ma gbɛ̃ pìi fìti kɛ̀ kũ a gbɛ̃nↄo, à bò lɛ́dokↄ̃nↄ kũ ò kɛ̀ kũ kↄ̃o kpɛ. 
Àdi yã nna o lán zↄ́ bà, ama fìti laasun kú a swɛ̃̀n. Àdi lɛ́nna kɛńnɛ páipai, ama yáadↄmma bà da a bↄ̀kↄmmɛ. 
Ǹ n yã'ũmmananↄ tó Dikirinɛ, anigↄ̃ n kũna, àdi tó gbɛ̃ mana fu zikiro. 
Gbɛ̃dɛri náanisaridenↄ ni ń gↄrↄ dagura lero, Luda, ĩni tó ò si gyãwãn tↄ̃̀nↄwɛɛn. Makũ sↄ̃, manigↄ̃ n náani vĩ. 
