﻿ZABURA.
32.
Dauda lɛ̀ɛ. Arubarikademɛ gbɛ̃ kũ Luda a taarinↄ tònɛ à a durunnanↄ kɛ̃̀nɛ ũ. 
Arubarikademɛ gbɛ̃ kũ Dikiri dì a durunna yã daro ũ, akũsↄ̃ manafiki kú à nɛ̀sɛɛ gũnlo. 
Kũ ma yĩtɛ kũ ma durunnao, ma fɛ̃fɛ̃, ma wiki dìgↄ̃ dↄ zaa kↄnkↄ ari ↄkↄsi. 
N ↄ dìgↄ̃ tↄ̃nama fãnantɛ̃ kũ gwãanio, ma gbãna làka lákũ guwãnagↄrↄ ifãntɛ̃ ma lɛ bà. 
Akũ ma wennɛ ma durunnai, mádi ma yã vãni utɛnnɛ doro. Ma pì, mani ma taarinↄ o Dikirinɛ, akũ a ma durunna kɛ̃̀mɛnɛ. 
Abire yãi n náanikɛri wɛ́ kɛmma a gↄrↄa, tó kisira tɛn su, ani a lero. 
Ma utɛkimɛ n ũ, ndì ma bo wɛ́tãmmanaa gũn, ndì likamai ǹ ma sura ba. 
Mani yã dannɛ mà n da zɛ́ kũ à de ǹ sɛ́a, mani lɛ́ damma, ma wɛ́ gↄ̃ tɛ́nyĩ. 
Ǹsungↄ̃ kun laasunn sari lán sↄ̃ ke baragbãsↄ̃ bàro, tó ńdi sↄ̃mↄ káńnɛ kũ a bàaoro, òdi da n dↄ̀rↄↄaro. 
Yã'ũmmanaa dì da gbɛ̃ vãninↄla, Dikiri yenyĩ dì lika a náanikɛrinↄa. 
Gbɛ̃ mananↄ, à pↄnna kɛ Dikiri yãi, nɛ̀sɛpuradenↄ, à ayuwii kɛ à yáa dↄ. 
