﻿AYUBA.
19.
Akũ Ayuba wè a gbɛ̃nnanↄla à pì: 
Ari bↄrɛn ánigↄ̃ wari dↄma, àgↄ̃ ma nɛ̀sɛ yakamɛnɛ kũ yãzↄ̃zↄ̃naaoo? 
A ma sↄ̃sↄ̃ à kɛ̀ gɛ̃̀n kuri sà, átɛni ma fobo, wé'i dì á kũro. 
Tó ma sãtɛmɛ yãpura, ma taari de ma zĩda yã ũmɛ. 
Tó a gi átɛni á zĩda sɛ́ lei demala, akũsↄ̃ átɛni ma taari e yã kũ à ma le musu, 
àgↄ̃ dↄ̃ kũ Luda mɛ́ à yã dí kɛ̀mɛnɛ kpɛdangara, à tankutɛ kpàkpamɛnɛ à ma kũ. 
Madì faaba wiki lɛ́, gbɛ̃ke dì wemaro, madì surabana ↄ́ↄ dↄ, yãzɛde kunlo. 
Luda zɛ́ zↄ̃̀mɛnɛ, gɛ̃ki kunlo, à gusira dà ma zɛ́la. 
À ma kpe bò, à ma fùraa gò. 
Àdi ma wíwi kpa sĩnda pínkia ari ma laka, àdi ma tãmaa nɛ lákũ òdi lí nɛ́ nà. 
Àdi a pↄfɛ̃ kipama, àdi ma ditɛ a ibɛrɛ ũ. 
A zĩ̀karinↄ dì futɛmai lɛɛlɛ, òdi ma kagura kɛ, òdi bùra kátɛ ò lika ma kpɛ́i. 
À tò ma gbɛ̃nↄ dì kakara kũmao doro, gbɛ̃ kũ ò ma dↄ̃nↄ lɛ̀ɛ zↄ̃̀ ò tàtamalɛ. 
Ma danɛnↄ pã kpàmai, ma gbɛ̃nnanↄ sã̀ ma yãn. 
Ma gↄ̃ nibↄ ũ ma bɛ zĩkɛrinↄnɛ, ma gↄ̃ńnɛ lán buri zĩ̀tↄↄ bà. 
Tó ma a bɛgwarii sìsi, àdi wema doro, bee tó ma kútɛ kɛ̀nɛ kũ ma zĩda lɛ́o. 
Ma lɛ́'ĩa dì kɛ ma nanↄnɛ lɛ́fↄtↄ ũmɛ, ma vĩ̀ninↄ kũ ma dakũnanↄ yemai doro. 
Bee nɛ́ ketenↄ dì ma gya bo se, tó ma futɛ ma zɛ, òdigↄ̃ ma lalandi kɛmɛ. 
Ma kpàasinↄn ye ma yãiro, ma gbɛ̃ yenyĩdenↄ bò ma kpɛ. 
Ma mɛ̀ yitoro kũ̀, à gↄ̃̀ fíti mà ga. 
À ma wɛ̃nda gwa ma gbɛ̃nnanↄ, à ma wɛ̃nda gwa, zaakũ Luda ↄ tↄ̃̀mamɛ. 
À kɛ̀ dera adì wɛ́ dↄma lán Luda dì wɛ́ dↄma nà? Ma nↄ̀bↄ sona dí mↄ́áwa lɛroo? 
De ò ma yãnↄ kɛ̃̀ ò kà takadan. 
De ò kɛ̃̀ gbɛ̀ɛa kũ gão, ò daruma kpàtɛn àgↄ̃ kun ari gↄrↄ sĩnda pínki. 
Zaakũ má dↄ̃ kũ ma Zɛkũnwode kun, ani futɛ à zɛ ma sèedade ũ kpɛkpɛ. 
Tó ma mɛ̀bara díkĩna kàkatɛ, mani wɛ́ si Ludalɛ mɛ̀ɛ sari. 
Mani wɛ́ sialɛ ma zĩda, ani kɛmɛnɛ gbɛ̃ zĩ̀tↄ ũro. Yã pì ma kũna gbãna ma swɛ̃̀ɛ gũn. 
À kɛ̀ dera a wɛ́ dↄ̀mɛnɛ, a pì makũ ma a zĩda lèoo? 
À vĩna kɛ Luda fɛ̃nɛdanɛ, zaakũ ani pↄfɛ̃ kipao yãvãnikɛrinↄa, de àgↄ̃ dↄ̃ kũ yãkpatɛ tɛni á dã. 
