﻿NARONAA.
10.
Dikiri yã ò Musanɛ à pì: 
Ǹ kãkãki pi mɛ̀n pla kũ andurufu kũ ò gbɛ̃̀gbɛ̃ manamanao gbɛ̃nↄ kakarabↄ ũ de ò bùra futɛ. 
Tó ò kãkãki pìnↄ pɛ̀, gbɛ̃nↄ ni su ò kakaranyĩ ń pínki dakarɛki kpɛ́lɛlɛa. 
Tó kãkãki mɛ̀n don ò pɛ̀, Isaraila buri don'arɛde kũ ò de kína ũnↄ mɛ́ oni su ò kakaranyĩ. 
Tó ò kãkãki pìnↄ pɛ̀ kũ yĩsãmpanaao, gbɛ̃ kũ ń bùra kú ifãboki kpanↄ mɛ́ oni bùra futɛ káaku. 
Tó ò a gɛ̃̀n plade pɛ̀ kũ yĩsãmpanaao, gbɛ̃ kũ ń bùra kú gɛ̀nↄmidↄki kpanↄ mɛ́ oni bùra futɛ. Kãkãkipɛna kũ yĩsãmpanaao pìimɛ gbɛ̃nↄ dana zɛ́n sèeda ũ. 
Tó ò ye ò gbɛ̃nↄ kakara, ògↄ̃ pɛ́ yĩsãmpanaa sari. 
Haruna nɛ́ sa'orinↄ mɛ́ oni kãkãki pìnↄ pɛ́. Anigↄ̃ deárɛ doka ũ gↄrↄ sĩnda pínki, ákↄ̃nↄ kũ á burinↄ. 
Gↄrↄ kũ a ka á bùsun, tó átɛn gɛ́ zĩ̀ ká kũ á ibɛrɛ kũ oni sù ò futɛ kãáonↄ, àgↄ̃ kãkãki pìnↄ pɛ́ kũ yĩsãmpanaao, de á yã le à dↄ makũ Dikiri á Ludagu, mani á bo á ibɛrɛɛ pìnↄ ↄĩ. 
Gↄrↄ kũ átɛn pↄnna kɛ sↄ̃, dikpɛn yá, mↄ dufu gↄrↄ káaku zĩn yá, àgↄ̃ kãkãki pìnↄ pɛ́ á sa'opↄ kũ òdi ká tɛ́n à tɛ́ kũnↄa kũ á sáabukpana sa'opↄnↄ, á yã ni dↄmagu. Makũmɛ Dikiri á Luda ũ. 
Wɛ̃̀ plade mↄ plade gↄrↄ barode zĩ, tɛ́luku gò sèeda kutala, 
akũ Isarailanↄ bùraa fùtɛ Sinai gbárannan, òtɛn bùra sↄ̃sↄ̃ ari tɛ́luku gɛ̀ɛ à zɛ̀ Parani gbárannan. 
Ń bùra futɛna káakun gwe. Ò kɛ̀ lákũ Dikiri dà Musanɛ à òńnɛ nà. 
Yuda zĩ̀karinↄ mɛ́ ò bùraa fùtɛ gã̀ kũ gã̀ao káaku kũ ń tutaao. Aminadabu nɛ́ Nasↄ̃mɛ ń don'arɛde ũ. 
Zua nɛ́ Nɛtanɛlimɛ Isaka zĩ̀karinↄ don'arɛde ũ. 
Eloni nɛ́ Ɛliabumɛ Zɛbuluni zĩ̀karinↄ don'arɛde ũ. 
Gɛsↄmu burinↄ kũ Mɛrari burinↄ kuta pìi gbòro, akũ ò sɛ̀ ò dào zɛ́n. 
Akũ Rubɛni zĩ̀karinↄ bùraa fùtɛ gã̀ kũ gã̀ao kũ ń tutaao. Sedeu nɛ́ Ɛlizumɛ ń don'arɛde ũ. 
Zurisadai nɛ́ Selumiɛlimɛ Simɛↄ zĩ̀karinↄ don'arɛde ũ. 
Dɛwɛli nɛ́ Ɛliasafamɛ Gada zĩ̀karinↄ don'arɛde ũ. 
Akũ Koa burinↄ Luda pↄ́nↄ sɛ̀ ò dào zɛ́n. Ò kuta pìi dↄ̀ ari ògↄ̃ ká. 
Akũ Ɛflaimu zĩ̀karinↄ bùraa fùtɛ gã̀ kũ gã̀ao kũ ń tutaao. Amiudu nɛ́ Ɛlisamamɛ ń don'arɛde ũ. 
Pedazu nɛ́ Gamaliɛlimɛ Manase zĩ̀karinↄ don'arɛde ũ. 
Gideoni nɛ́ Abidãmɛ Biliaminu zĩ̀karinↄ don'arɛde ũ. 
Akũ Dã zĩ̀karinↄ bùraa fùtɛ gã̀ kũ gã̀ao kũ ń tutaao. Mↄ́kↄ̃nↄ mɛ́ òdigↄ̃ tɛ́ kpɛkpɛ. Amisadai nɛ́ Ayɛzamɛ ń don'arɛde ũ. 
Ɔkↄrana nɛ́ Pagiɛlimɛ Asa zĩ̀karinↄ don'arɛde ũ. 
Enana nɛ́ Airamɛ Nafatali zĩ̀karinↄ don'arɛde ũ. 
Lákũ Isarailanↄ dì bùra futɛfutɛ ògↄ̃ tɛ́tɛkↄ̃i nàn gwe gã̀ kũ gã̀ao. 
Obabumɛ Musa anzure Ruɛli nɛ́ ũ, Midiã burimɛ. Musa pìnɛ: Ótɛn da zɛ́n ò gɛ́ bùsu kũ Dikiri pì áni ó gban. Ǹ mↄ́ ǹ gɛ́ kũoo, óni yã mana kɛnnɛ, zaakũ Dikiri nnamana gwe lɛ́ sɛ̀wɛrɛ. 
Akũ à pìnɛ: Mani gɛ́ro, mani ɛra ma bùsun ma bedenↄ kĩnaamɛ. 
Musa pì: N yã nna. Ǹsun ó tónlo, zaakũ ń bùrakatɛki mana dↄ̃ akũsↄ̃ mↄkↄ̃n mɛ́ ĩni kɛ ó wɛ́de ũ. 
Tó n gɛ kũoo, óni yã mana kũ Dikiri ni kɛwɛrɛ kɛnnɛ se. 
Isarailanↄ bùraa fùtɛ Dikiri kpi sarɛ ò táa ò gↄrↄ aakↄ̃. Ò dò arɛ kũ Dikiri bàka kunna kũńwo àkpatiio de à bùrakũki mↄńnɛ. 
Tó ò fùtɛ ò dà zɛ́n, Dikiri tɛ́luku pìi dìgↄ̃ kúńla fãnantɛ̃. 
Tó ò dà zɛ́n kũ àkpatiio, Musa dì pi: Ǹ futɛ Dikiri, de n ibɛrɛnↄ fãkↄ̃a, n zãngurinↄ bàa lɛ́nnɛ. 
Tó ò dìtɛ, Musa dì pi: Dikiri, ǹ ɛra ǹ su Isaraila dúbu ũgbangbanↄa. 
