﻿NAANAA.
29.
Yakubu ɛ̀ra à dà zɛ́n à gɛ̀ɛ ifãbokikpadenↄ bùsun. 
Kũ à kà gwe, à lↄ̀gↄↄ è sɛ̃̀n sã kpàsa lɛu aakↄ̃ katɛna a sarɛ, zaakũ lↄ̀gↄↄ pì ín òdi kpáḿma. Gbɛ̀ zↄ̃kↄ̃ ta lↄ̀gↄↄ pìlɛ. 
Tó kpàsaa pìnↄ kàkara gwe pínki, akũ òdi gbɛ̀ɛ pì go lↄ̀gↄↄ pì lɛ́a, ò í kpáḿma, akũ òdi ɛra ò gbɛ̀ɛ pì tarɛ a gbɛ̀n. 
Akũ Yakubu sãdãrinↄ là à pì: Gbɛ̃nↄ, a bo mámɛɛ? Ò wèa ò pì: O bo Aranamɛ. 
Akũ à ń lá à pì: Á Nao daikore Labã dↄ̃ yá? Ò wèa ò pì: Ó a dↄ̃. 
Akũ à ń lá à pì: À aafia yá? Ò pì: À aafia. Ǹ a nɛ́ Rahila gwa, àtɛn su kũ sãnↄ zã̀ dire. 
Akũ Yakubu pì: Ifãntɛ̃ kpɛ́ gbãna, sãnↄ tágↄrↄ dí ká kↄ̀ro. À í kpáḿma à gɛ́ ń dã. 
Akũ ò pì: Óni fↄ̃ro. Tó adi kɛ sã kpàsanↄ kàkara pínki baasiro, òdi gbɛ̀ go lↄ̀gↄↄ pì lɛ́a ò í kpáḿmaro. 
Kũ àtɛn yã ońnɛ lɛ, Rahila sù kũ a de sãnↄ, zaakũ sãdãriimɛ a ũ. 
Kũ Yakubu a disɛ̃ Labã nɛ́nↄgbɛ̃ Rahila è kũ a de sãnↄ, à nà lↄ̀gↄↄi à gbɛ̀ɛ gò lↄ̀gↄↄ pì lɛ́a, akũ à í kpà a disɛ̃ sãnↄa. 
Akũ à lɛ́ pɛ̀ Rahilaa à pↄnna ↄ́ↄ dↄ̀. 
Akũ à ònɛ kũ a de danɛ Rɛbɛka nɛ́n a ũ. Akũ Rahila bàa lɛ̀ à gɛ̀ɛ à ò a denɛ. 
Kũ Labã a dãre nɛ́ Yakubu baaruu mà, à bàa lɛ̀ à gɛ̀ɛ daalɛ. Kũ à kà, akũ à kùsia à lɛ́ pɛ̀a à tà kãao a bɛa. Akũ Yakubu yã kũ ò kɛ̀nↄ ònɛ pínki. 
Akũ Labã pìnɛ: Ma arumɛ n ũ yãpura. Yakubu kɛ̀ Labã bɛa mↄ do, 
akũ Labã pìnɛ: Kũ ń de ma danɛ ũ yãin ĩni zĩ kɛmɛnɛ pã yá? Dera mani fĩna bonnɛ nà ǹ omɛnɛ. 
Labã sↄ̃ à nɛ́nↄgbɛ̃nↄ vĩ gbɛ̃nↄn pla. Yↄ̃ↄ tↄ́n Lea, Bãna sↄ̃ Rahila. 
Lea wɛ́ busana, Rahila sↄ̃ nↄkpare manamɛ, akũ a kakana mana. 
Yakubu ye Rahilai, akũ à pì Labãnɛ: Mani zĩ kɛnnɛ wɛ̃̀ suppla n nɛ́ bãnade Rahila yãi. 
Labã pì: À sã̀na mà a kpámma de mà a kpá gbɛ̃ pãndeala. Ǹgↄ̃ kú ma bɛa la. 
Akũ Yakubu zĩ kɛ̀nɛ wɛ̃̀ suppla Rahila yãi, ase à kɛ̀nɛ lán gↄrↄ pla bàmɛ kũ à yei yãi. 
Akũ à pì Labãnɛ: Kũ ma zĩgↄrↄ pàpa, ǹ ma nↄ kpáma mà sɛ́. 
Akũ Labã gwedenↄ kàkara ń pínki à nↄsɛpↄble kɛ̀ńnɛ. 
Kũ ↄkↄsi kɛ̀, akũ à a nɛ́ Lea sɛ̀ à kpàa, akũ Yakubu wùtɛ kãao. 
Labã a nↄgbɛ̃ zĩkɛri Zilipa kpà Leanɛ zĩkɛri ũ. 
Kũ gu dↄ̀ Yakubu è Leamɛ, akũ à pì Labãnɛ: Bↄ́yãi n kɛ̀mɛnɛ lɛɛ? Rahila yãin ma zĩ kɛ̀nnɛroo? Bↄ́ mɛ́ à tò n ma kɛkɛɛ? 
Labã pì: Ó kĩnaa òdi Bãna kpá gↄ̃a Yↄ̃ↄ ãro. 
Ǹ azuma do kɛ kũ gbɛ̃ dio gĩa, mani a gbɛ̃ndo kpámma zĩ kũ ĩni ɛra ǹ kɛmɛnɛ wɛ̃̀ suppla pãnde pↄ́ ũ. 
Yakubu wè à azuma do pìi kɛ̀ kũ Leao, akũ Labã a nɛ́ Rahila kpàa nↄ ũ. 
Labã a nↄgbɛ̃ zĩkɛri Bila kpà Rahilaa zĩkɛri ũ. 
Yakubu wùtɛ kũ Rahilao sↄ̃, akũ à yei de Leala. Akũ à ɛ̀ra à zĩ kɛ̀ Labãnɛ ari wɛ̃̀ suppla dↄ. 
Dikiri è Yakubu ye Leairo, akũ à a kɛ̀ nɛ́rande ũ, Rahila sↄ̃ paramɛ. 
Lea nↄ̀ↄ sì à nɛ́ ì gↄ̃gbɛ̃ ũ, akũ à tↄ́ kpànɛ Rubɛni, zaakũ à pì: Dikiri ma warikɛnaa gwà. Ma zã nigↄ̃ yemai sà. 
Kũ à nↄ̀ↄ sì dↄ, à nɛ́ ì gↄ̃gbɛ̃ ũ, akũ à pì: Dikiri mà ma zã yemairo, akũ à ɛ̀ra à nɛ́ díkĩna kpàma dↄ. Akũ à tↄ́ kpànɛ Simɛↄ. 
Kũ à ɛ̀ra à nↄ̀ↄ sì dↄ, à nɛ́ ì gↄ̃gbɛ̃ ũ à pì: Adikĩna sà ma zã ni ma ditɛki ero, zaakũ ma nɛ́gↄ̃gbɛ̃ ì kãao mɛ̀n aakↄ̃. Akũ à tↄ́ kpànɛ Levi. 
À ɛ̀ra à nↄ̀ↄ sì dↄ à nɛ́ ì gↄ̃gbɛ̃ ũ à pì: Adikĩna sà ma Dikiri sáabu kpà, akũ à tↄ́ kpànɛ Yuda. Akũ a nɛ́'i zɛ̀. 
