﻿NAANAA.
8.
Nuhu kũ nↄ̀bↄsɛ̃ntɛnↄ kũ bɛ pↄ́kãde kũ ò kú kãao gó gũnnↄ pínki yã dↄ̀ Ludan. Kũ à ĩa gbàrɛ zĩtɛa, akũ í nà babanaaa. 
Í kũ ò kú zĩtɛ gbárunↄ kũ ludambɛ guforonↄ tàta, akũ legũ kɛ̃̀. 
Í pì tɛn baba busɛbusɛ àtɛn lago ari gↄrↄ basuppla akuri. 
A mↄ supplade gↄrↄ gɛ̃ro awɛɛplade zĩ gó pìi dì kpi kũ òdi pi Ararataa. 
Í pì tɛn lago ari mↄ kuride gũn. Mↄ kuride pì gↄrↄ káaku zĩ kpinↄ mìsↄ̃ntɛnↄ bòbo. 
Gↄrↄ bupla gbɛra Nuhu gó wondo kũ à bòn yã wɛ̃̀, 
akũ à kãakãanna gbàrɛ. Àtɛn vura àtɛn gɛ́ àtɛn su ari í bàba zĩtɛa. 
À potɛ̃nɛ gbàrɛ dↄ de à le à dↄ̃ tó í làgo zĩtɛa. 
Kũ potɛ̃nɛ dí diki lero, akũ a ɛ̀ra à sù Nuhu kĩnaa gó gũn, zaakũ í da anduniala pínkimɛ. Nuhu ↄ bò à a kũ̀ à gɛ̃̀o gó gũn. 
À kámma bò ari gↄrↄ suppla, akũ à ɛ̀ra à potɛ̃nɛ gbàrɛ dↄ. 
Potɛ̃nɛ pìi ɛ̀ra à sù à kĩnaa ↄkↄsi à kù lá kɛ̃̀ à kpá a lɛ́i. Akũ Nuhu dↄ̃ kũ í làgo zĩtɛa. 
À kámma bò gↄrↄ suppla dↄ, akũ à ɛ̀ra à potɛ̃nɛ pìi gbàrɛ, adi ɛra à sù a kĩnaa doro. 
Nuhu wɛ̃̀ wàa aakↄ̃ awɛɛdode gũn a mↄ káaku gↄrↄ káaku zĩ, í bàba zĩtɛa, akũ à gó pìi musu gò. Kũ à gu gwà, à è í làka zĩtɛa. 
A mↄ plade gↄrↄ baraasↄↄro awɛɛplade zĩ í bàba zĩtɛa. 
Akũ Luda yã ò Nuhunɛ à pì: 
Ǹ bo gó gũn kũ n nanↄo kũ n nɛ́gↄ̃gbɛ̃nↄ kũ ń nↄnↄo. 
Ǹ pↄ́ wɛ̃̀ndide kũ ò kú kũnwonↄ bↄtɛ pínki, bãnↄ kũ nↄ̀bↄnↄ kũ pↄ́ kũ òdi táa o kũ kùaonↄ pínki, de ò fãkↄ̃a zĩtɛ ògↄ̃ nɛ́ i ògↄ̃ kara andunia gũn. 
Akũ Nuhu bò kũ a nɛ́nↄ kũ a nanↄo kũ a nɛ́ pìnↄ nↄnↄo. 
Nↄ̀bↄnↄ pínki kũ pↄ́ kũ òdi táa o kũ kùaonↄ pínki kũ bãnↄ pínki kũ pↄ́ kũ òdi táa o zĩtɛnↄ pínki bↄ̀tɛ gó gũn buri kũ burio. 
Akũ Nuhu Dikiri gbagbaki bò. À nↄ̀bↄ kũ bã kũ òdi sa oonↄ kũ̀, akũ à sa'opↄ kũ òdi ká tɛ́n à tɛ́ kũ òa. 
Kũ Dikiri a gbĩ mà, à kɛ̀nɛ nna, akũ à laasun lɛ̀ à pì: Mani ɛra mà láari bo zĩtɛa bisãsiri yãi doro, zaakũ bisãsiri laasun dìgↄ̃ vãni zaa a kɛfɛnnakɛgↄrↄamɛ. Mani ɛra mà pↄ́ wɛ̃̀ndidenↄ kakatɛ lákũ ma kɛ̀ nà doro. 
Ari andunia gɛ́ àgↄ̃ kunwo pↄ́tↄ̃na kũ pↄ́kɛkɛnaao, ĩa kũ guwãnao, bunsirɛ kũ sakareo, fãnantɛ̃ kũ gwãanio, ń ke ni lákaro. 
