﻿Zia yã́.
2.
Kɛ̃ Ɛfɛsɛ Yesudeↄ dↄaanaɛ: Ma gbɛ̃́ pↄ́ má saana mɛ̀n soplaↄ kũa ma ↄplaau, má bɛ vua dau mɛ̀n soplaↄ zãnguo, mámɛ ma yãɛ bee ò. 
Má n yãkɛaↄ dↄ̃ ń zĩ pↄ́ ńlɛ kɛo ń n mɛnakɛao. Nili we gbɛ̃vãiↄ dìlɛo. Gbɛ̃́ pↄ́ aaì ńzĩa dilɛ Lua zĩnaↄ ũ mɛ́ aa dɛ a ũo, n ń yↄ̃́ ń è ɛɛdeↄn ń ũ. 
N mɛnafↄ̃̀, n taasikɛ̀ ma yã́i, ni kpasao. 
Kási má yãvĩnnↄ. Dafudafukɛlɛgɛ ń kɛ̀mɛɛ. 
To n kua zi zadↄ̃ ni busao yã́ dↄngu. Nↄ̀sɛlilɛ, níↄ yã́ pↄ́ ni kɛ yãaↄ kɛ. Tó ni kɛ màao, má mↄma, mí n dau sɛ sↄ̃ò. 
Ń beeo ń yã́ɛ bee vĩ, ń za Nikolaiↄ yãkɛau lá má zauwa. 
Gbɛ̃́ pↄ́ nↄ̀sɛ vĩ, aà yã́ pↄ́ Lua Nisĩna lɛ́ o Yesudeↄnɛ ma: Má gbɛ̃́ pↄ́ zĩblè gba zɛ́ aà lí wɛ̃nide pↄ́ kú Lua lu guu bɛ ble. 
Kɛ̃ Simiina Yesudeↄ dↄaanaɛ: Ma gbɛ̃́ pↄ́ má dɛ Dↄaana ń Gↄ̃zãnao ũ, ma ga ma ɛa vu, mámɛ ma yã́ɛ bee ò. 
Má wɛ́tɛ̃a pↄ́ wàlɛ mↄnɛ dↄ̃ ń n taasidekɛo. Ń beeo ↄden n ũ. Gbɛ̃́ pↄ́ aaì mɛ Yudaↄn ń ũ mɛ́ aa dɛ a ũo, an lousisikpɛ dɛ Setãu pↄ́ ũↄ, má dↄ̃ lá aaì yãdↄma. 
Ńsu vĩakɛ taasi pↄ́ ńyↄ̃ kɛɛo. Ma, Ibiisi a á gbɛ̃eↄ ká kpɛ́u à á yↄ̃, i wɛ́tɛ̃amↄɛ́ gↄↄ kwi. Ǹyↄ̃ náai vĩ e n gɛ ǹ gaò, mí àizãna kɛnɛ yàae ũ. 
Gbɛ̃́ pↄ́ nↄ̀sɛ vĩ, aà yã́ pↄ́ Lua Nisĩna lɛ́ o Yesudeↄnɛ ma: Ga plaade a ĩakpa gbɛ̃́ pↄ́ zĩblèzio. 
Kɛ̃ Pɛɛgaũ Yesudeↄ dↄaanaɛ: Ma gbɛ̃́ pↄ́ má fɛ̃nda lɛna kpɛpla vĩ, mámɛ ma yã́ɛ bee ò. 
Má n kúkĩi dↄ̃, gu pↄ́ Setãu kpalabaa kuuɛ. Ń ma yã́ kũa, ni lelekpamazio, baa gↄↄ pↄ́ wà ma seelade náaide Antipa dɛ̀ n wɛ̃́lɛu, gu pↄ́ Setãu kuupi. 
Kási má yã́ yↄↄna vĩnnↄ. Ń gbɛ̃́ↄ vĩ we, aa Balaaũ yã́ kũa. Balaaũpi mɛ́ dà Balakiɛ, à kↄ̃nikɛ̀ Isailiↄnɛ aa sa'onↄↄ sò aa gbãsĩkɛ̀. 
Beewa lↄ ń gbɛ̃́ↄ vĩ we, aa Nikolaiↄ yã́ kũa. 
A yã́i tò, nↄ̀sɛlilɛ. Tó ni kɛ màao, má mↄma tia, mí zĩkannↄ ń fɛ̃nda pↄ́ kú ma lɛ́uo. 
Gbɛ̃́ pↄ́ nↄ̀sɛ vĩ, aà yã́ pↄ́ Lua Nisĩna lɛ́ o Yesudeↄnɛ ma. Má gbɛ̃́ pↄ́ zĩblè gba mana pↄ́ ulɛa, mí aà gba gbɛpua boolona pↄ́ wà tↄ́ dafu kɛ̃̀wà. Gbɛ̃e aↄ tↄ́pi dↄ̃o, sema gbɛ̃́ pↄ́ má kpàwàpi. 
Kɛ̃ Tiatii Yesudeↄ dↄaanaɛ: Ma Lua Nɛ́ pↄ́ ma wɛ́ dɛ lán tɛ́vuawa, ma gbá dɛ lán mↄgotɛ̃wa, mámɛ ma yã́ɛ bee ò. 
Má n yãkɛaↄ dↄ̃, n yea gbɛ̃́ↄzi, n luanaaikɛa, n zĩkɛa ń n mɛnakɛao, mɛ́ yã́ pↄ́ ńlɛ kɛ gbɛzã dɛ a káaua. 
Kási má yãvĩnnↄ. N nↄɛ Zezabɛli pↄ́ azĩa dìlɛ ãnabi ũ gbà zɛ́. Álɛ ma zↄ̀blenaↄ sãsã, àlɛ danɛ́ aa gbãsĩkɛ aa sa'onↄↄ só. 
Ma aà gbà zɛ́ aà nↄ̀sɛlilɛ, ãma a ye à nↄ̀sɛlilɛ à a káaluakaa too. 
Ma, má kpaaàzi pɛwa, mí tó gbɛ̃́ pↄ́ gbãsĩkɛ̀aànↄↄ wɛ́tɛ̃a zↄ̃ↄ e, tó aai nↄ̀sɛlilɛ aa aà yã́ tòo. 
Má aà ìwaↄ dɛdɛ ń gagyão, Yesudeↄ píi i dↄ̃ kɛ́ mámɛ mi gbɛ̃́ↄ làasoo ń ń sↄ̃o yↄɛ, mɛ́ má fĩabo á baadeɛ a yãkɛawa. 
Á Tiatii gbɛ̃́ kĩni pↄ́ á yã́pi kũao mɛ́ á yã́ pↄ́ wì mɛ Setãu asii zↄ̃ↄ dↄ̃oↄ, má aso pãle diɛ́o. 
À ↄdidi yã́ pↄ́ á kũawa e màↄ mↄ́. 
Gbɛ̃́ pↄ́ zĩblè mɛ́ a yã́ pↄ́ má yeiↄ kũa e a lɛ́wa, má aà gba zɛ́ aà gbãable buiↄwa. 
A kiblemá ń mↄ̀ gopanao, a ń wíwi lá wì gĩ̀ oo wiwa, lá ma Mae ma gba zɛ́wa. 
Má aà gba gudↄlɛia saana lↄ. 
Gbɛ̃́ pↄ́ nↄ̀sɛ vĩ, aà yã́ pↄ́ Lua Nisĩna lɛ́ o Yesudeↄnɛ ma. 
