﻿1 Zãa.
3.
À gwa lá Mae Lua yewázi zↄ̃ↄ, kɛ́ ì wá sísi a nɛ́ↄ, mɛ́ wá a ũ sↄ̃! Dṹnia wá dↄ̃o, kɛ́ i aà dↄ̃o yã́i. 
Ma gbɛ̃́ yenzideↄ, Lua nɛ́ↄn wá ũ tia, mɛ́ lá wáↄ dɛ i bↄ gupuau yãao. Wá dↄ̃ kɛ́ gↄↄ pↄ́ à mↄ̀, wáↄ dɛ laaàwa, asa wá wɛsiaàlɛ, wí aà e lá a dɛ. 
Gbɛ̃́ pↄ́ a wɛ́ dↄaàzi màa, aàↄ ku gbãsĩsai lá Kilisi ku gbãsĩsaiwa. 
Gbɛ̃́ pↄ́ duunakɛ̀ bↄ̀ Lua yã́ kpɛɛ, asa duunaá bↄa Lua ikoyã kpɛɛ. 
Á dↄ̃ kɛ́ Kilisi mↄ̀ duunawoloa yã́iɛ, mɛ́ a duuna vĩo. 
Gbɛ̃́ pↄ́ naawà líↄ tɛ duunawao. Duunkɛnae i aà eo, a aà dↄ̃o. 
Ma nɛ́ↄ, ásu to gbɛ̃e á sã́são, yãmaakɛna mɛ́ maa lá Kilisi maawa. 
Gbɛ̃́ pↄ́ ì duunakɛá Ibiisi gbɛ̃́, asa Ibiisi duunakɛ̀ za asĩnizĩɛ. Ibiisi yã́ↄ midɛa yã́i Lua Nɛ́ mↄ̀i. 
Gbɛ̃́ pↄ́ Lua aà ì líↄ tɛ duunawao, asa Lua kɛkɛá kú aà guuɛ. A fↄ̃ líↄ tɛ duunawao, kɛ́ Lua aà ì yã́i. 
Lá wá Lua nɛ́ↄ dↄ̃kↄ̃ɛ ń Ibiisi nɛ́ↄn kɛ: Gbɛ̃́ pↄ́ lí yãmaakɛo ge gbɛ̃́ pↄ́ ye a gbɛ̃́deezio, adeá Lua nɛ́ no. 
Yã́ pↄ́ á mà za káaun kɛ: Wàↄ yekↄ̃i. 
Ásu àↄ dɛ lán Kainuwao. A dɛ Setãu pↄ́ ũɛ, ↄ̃ à a dãuna dɛ̀. Bↄ́yãi à aà dɛ̀ii? Kɛ́ aà yãkɛa vãi mɛ́ aà dãuna pↄ́ maa yã́iɛ. 
Ma gbɛ̃́ↄ, tó dṹnia zaágu, ásu to à bↄ á saɛo. 
Wá dↄ̃ wa bↄ gau wa gɛ̃ wɛ̃ni guu, kɛ́ wá ye wá Yesude deeↄzi yã́i. Gbɛ̃́ pↄ́ ye gbɛ̃́io, adeá gɛɛ e tia. 
Gbɛ̃́ pↄ́ za a gbɛ̃́deeguá gbɛ̃dɛnaɛ. Á dↄ̃ kɛ́ gbɛ̃dɛnae líↄ wɛ̃ni láasai vĩo. 
Yã́ɛ bee mɛ́ a to wà dↄ̃ lá yeakↄ̃i dɛ. Kilisi azĩa kpà wá yã́i. Wápiↄ sↄ̃, sema wà wázĩa kpá wá Yesude deeↄ yã́i màa. 
Tó gbɛ̃́ dɛ pↄde ũ, mɛ́ a è a gbɛ̃́dee lɛ́ wɛ̃nakɛ, tó i wɛ̃nadↄ̃ɛ̀o, a ye gbɛ̃́i lá Lua yeiwae? 
Ma nɛ́ↄ, wásu wàↄ yekↄ̃i ń lɛ́òo. Wàↄ yekↄ̃i sĩana ń yãkɛao. 
Beewa wá dↄ̃ kɛ́ sĩana gbɛ̃́ↄn wá ũ, màa wá sↄ̃ aↄ daa doũ Lua aɛ. 
Tó yãe sù lɛ́ wá sↄ̃ vĩ sↄ̃, wá dↄ̃ kɛ́ Lua zↄ̃ↄ dɛ wá làasooa, a yã́pii dↄ̃. 
Ma gbɛ̃́ yenzideↄ, tó wá làasoo lɛ́ wá dayãuo, wá sↄ̃ aↄ dilɛa Lua aɛɛ, 
wí pↄ́ pↄ́ wá gbɛ̀awà e, kɛ́ wá yã́ pↄ́ a dìlɛↄ kũa mɛ́ wi yã́ pↄ́ ì kaaàgu kɛ yã́i. 
Yã́ pↄ́ a dìlɛwɛ̃ɛn kɛ: Wà aà Nɛ́ Yesu Kilisi náaikɛ, wíↄ yekↄ̃i lá a dìlɛwɛ̃ɛwa. 
Gbɛ̃́ pↄ́ yã́ pↄ́ a dìlɛↄ kũa naawà, mɛ́ Luapi ku ade guu. Wá dↄ̃ kɛ́ a kú wá guu aà Nisĩna pↄ́ a kpàwá yã́i. 
