﻿Nauũ.
3.
Waiyoo gbɛ̃dɛnaↄ wɛ̃́lɛ! Ìliↄ ku gbɛ̃taitaisaio. Mↄafili pàɛwà ń pↄ́ pↄ́ wa sìmáↄ. 
Flã̀ kↄ̃fĩ ń sↄ̃́go gbá kↄ̃fĩo ma dↄ! Sↄ̃́ↄ lɛ́ bàalɛ, an góↄ lɛ́ vĩvĩ. 
Zĩgↄ̃ sↄ̃deↄ lɛ́ suwà, an fɛ̃nda wɛ́tɛ̃ lɛ́ pipi, an sↄ̃naↄ lɛ́ tɛkɛ. Gbɛ̃́ pↄ́ wà ń paɛpaɛↄ dasi, gɛↄ gↄ̃̀ kpálɛ, wa fↄ̃ dↄdↄo. Wàlɛ kpakpa gɛↄla. 
Káaluapi lɛnakasaanɛ́ yã́iɛ. Aà kákaa maa, ì kpáńzi, à buiↄ kà zↄbleu ń lɛnakasaanɛ́o, à ń ↄ̃̀ↄkpà a gbɛ̃kↄↄlɛkɛa guu. 
Ma Dii Zĩgↄ̃de ma mɛ̀, má fɛlɛnnↄ, má n zwãa sɛ kanɛ n mia, mí tó buiↄ n puizi e, mí n asii ↄlↄ an kíaↄnɛ. 
Má n pápa ń pↄ́ gĩ vãio, mí n kɛ pↄ́ↄpↄↄ, mí tó gbɛ̃́pii wɛfĩma. 
Gbɛ̃́ pↄ́ wɛsìnlɛↄ bàalɛnɛ aai mɛ: Niniva gↄ̃̀ da fↄ̃̀ii. Démɛ a wɛ̃nakɛ a yã́ musui? Má wá nↄ̀sɛnininaↄ euɛ̀i? 
N maa dɛ Tɛbɛsi pↄ́ kálɛa Niili saɛa yã̀? Swapi í mɛ́ kàedài a bĩ́i ũ. 
Etiopiↄ ń Egipiↄ mɛ́ wɛ̃́lɛpi wá ũ, a gbãa lɛ́ vĩo, Putiↄ ń Libiiↄ ku a zɛnnↄdeↄ guuɛ. 
Kási wà tà ń Tɛbɛsideↄ zĩ̀zↄↄ ũ, wà ń nɛ́ↄ wìwi zɛ́kpaaↄ guu píiɛ. Wà likpà an bɛɛɛdeↄ sɛa yã́ musu, wà mↄkà an gbɛ̃zↄ̃ↄↄwa. 
Á Ninivadeↄ sↄ̃, ma pↄkũmabↄbↄma í a zↄ̃lɛwáɛ, í gↄ̃ sãalɛa, íↄ mikpakĩi wɛɛlɛ á ibɛɛↄ yã́i. 
Á zɛgikĩiↄ gↄ̃ lán libɛ pↄ́ màwaɛ. Tó wa zĩ̀a, aa kwɛ a blenaↄnɛ. 
Gwa! Á zĩgↄ̃ↄ dɛ lán nↄɛↄwaɛ, á wɛ̃́lɛↄ bĩ́ibↄlɛↄ wɛ̃a á wɛ̀lɛↄnɛ dàii. Tɛ́ lɛ́ kṹ bↄlɛpiↄ gbã́aↄwa. 
À ítↄtↄ kálɛ, asa wa á kákaɛ. À gɛ̃ bɛ̀lɛu, í ↄ̃zↄ̃wà! À bilikibↄò, í á bĩ́i gbãa kã́fĩ! 
Tɛ́ a gi kṹwá weɛ, wi á dɛdɛ ń fɛ̃ndao. Wa á kaalɛ kwasutɛ̃ↄ pↄblea ũɛ. À kↄ̃ lán kwaↄwa! À gusisi lán kwasutɛ̃ↄwa! 
Á laatanaↄ dasikũ̀ lán saanaↄwa, aaì gbɛ̃ble, aaì gɛ̃zɛa. 
Á gudↄ̃anaↄ dɛ lán kwasutɛ̃ↄwa, á zĩ̀kan dↄaanaↄ dasi lán kwaↄwa, aa kpa bĩ́iwa niɛniɛ. Tó ĩatɛ̃ bìlɛ, aaì gɛ̃zɛa, wìliↄ ń tákĩi dↄ̃o. 
Asiliↄ kía, n gbɛ̃́ↄ dↄaanaↄ i'ò, n zĩgↄ̃ↄ gbɛ̃zↄ̃ↄↄ gàga. N gbɛ̃́ↄ fãaaa sĩ̀sĩↄ musu, gbɛ̃e ku à ń kãaao. 
Wíwia pↄ wà n wiwi ɛsɛ vĩo, n bↄpi láaa vĩo. Gbɛ̃́ pↄ́ n bao mà ali ↄtaalɛ n yã́ musuɛ, asa gbɛ̃e i gí n pãsĩ kpálɛsai mai a mɛwao.
