﻿Amↄsi.
4.
Á Basana zununuↄ, à yã́ɛ bee ma, á nↄɛ pↄ́ a mɛ̀kpa Samali sĩ̀sĩpↄlɛuↄ! I gbãamↄ wɛ̃nadeↄnɛ, i taasideↄ wɛtã, i o á zã́ↄnɛ aa idã dↄ à mi. 
Ma Dii Lua ma lɛgbɛ̃̀ ń ma kuaadoakɛo, ma mɛ̀ gↄↄ lɛ́ mↄ́wá wa kokoaka á gbɛ̃́ kↄ̃naↄzi, wi á sɛ́lɛ táánↄ ń mↄ̀ kòoloↄ. 
Á baade a bↄ a aɛdↄawa súsu bĩ́ifoou, wi táánↄ zĩ̀zↄↄ ũ. Ma Dii mámɛ má ò. 
À gi àↄ gɛ́ Bɛtɛli, í tàaekɛ we. À gi àↄ gɛ́ Giligali, í ɛa tàaekɛ lↄ. Àliↄ sa'o á diiↄwa we lá gu lɛ́ dↄ, íↄ á pↄ́ kwide kpa we wɛ̃̀ àaↄ̃ ń wɛ̃̀ àaↄ̃o. 
Àli pɛ̃ɛ sɛa kpasa sa'okĩiwa sáaukpabↄ ũ, í pↄ́ pↄ́ iↄ ma gba kpàwakɛ wà ma, á Isailiↄ, asa bee kɛa á yei. Ma Dii mámɛ má ò. 
Wɛ̃́lɛ píiu má tò á lɛkpɛ lɛ́ yↄ́ lↄo, ualɛ ń ualɛo má tò a kua blɛwa, kási i ɛa su ma kĩ́io. Ma Dii mámɛ má ò. 
Kɛ́ à gↄ̃̀ mↄ àaↄ̃ wà pↄkɛkɛ, ↄ̃ ma á tɛ̃́ lou. Má tò lou mà wɛ̃́lɛeↄu, à gì mai wɛ̃́lɛeↄu. Má tò à mà buaeↄ, à gì mai buaeↄ, ↄ̃ gu giigàga. 
Á gbɛ̃eↄ bã̀abãabò, aa gɛ̀ wɛ̃́lɛ ń wɛ̃́lɛo í wɛɛlɛi, aai e à mↄ̀máo, kási i ɛa su ma kĩ́io. Ma Dii mámɛ má ò. 
Mi to pↄ́wɛn gbↄ̃si ń pↄ́ fukpaao á kaaↄ ń á vɛ̃ɛbuↄ le mↄ̀ↄmↄↄ. Kwaↄ á kaadↄɛnaↄ ń á kuↄ blè, kási i ɛa su ma kĩ́io. Ma Dii mámɛ má ò. 
Ma gagyãↄ kàágu, lá má kà Egipiↄguwa. Ma á ɛ̀waasoↄ dɛ̀dɛ zĩ guu, má tò wà á sↄ̃́ↄ nàaa. Má tò yai gĩ dà á bòoa, á ní lɛ́ dↄkĩi eo, kási i ɛa su ma kĩ́io. Ma Dii mámɛ má ò. 
Ma á gbɛ̃eↄ suumpa, lá ma Sↄdↄũ ń Gↄmↄↄo suumpawa. A gↄ̃ gòmiↄna pↄ́ wa ga bↄ̀ tɛ́u ũ, kási i ɛa su ma kĩ́io. Ma Dii mámɛ má ò. 
A yã́i Isailiↄ, má yã́piↄ kɛɛ́. Lá má yã́piↄ kɛɛ́ Isailiↄ, àↄ kú ń mapi á Lua yã́kpalɛkɛaánↄ sↄuo. 
À ma! Mi gbɛ̀sĩsĩↄ kása, mi to zàa'ĩana fɛlɛ, mi to gbɛ̃nazĩna dↄ̃ lá a làasoo dɛ, mi to gu dↄ, mi ɛa to gu si, mi táa'o dṹnia gulɛsĩↄwa, ma tↄ́n Dii Lua Zĩgↄ̃de. 
