﻿Yoɛli.
1.
Dii yã'oa Petuɛ nɛ́ Yoɛliɛn kɛ. 
Mae zↄ̃ↄↄ, à yã́ɛ bee ma! Gbɛ̃́ pↄ́ kú bùsuu laↄ píi, à swã́kpa! Yã́ɛ bee taa kɛ̀ á gↄↄ ge á deziↄ gↄↄe? 
À dau siu á nɛ́ↄnɛ, aai o ń nɛ́ↄnɛ, an nɛ́ↄ i o ń nɛ́ↄnɛ lↄ. 
Pↄ́ pↄ́ kwasutɛ̃ↄ tò sɛ̃sɛwɛkwaↄ sò. Pↄ́ pↄ́ sɛ̃sɛwɛkwaↄ tò kwa búunaↄ sò. Pↄ́ pↄ́ kwa búunaↄ tò kwa keleↄ sò. 
À vu iu idɛnaↄ, í ↄ́ↄlↄ! À búbuapɛ vɛ̃ɛminaↄ ápii vɛ̃ɛ dafu yã́ musu, asa wa wò á lɛ́waɛ. 
Buie lɛ̀lɛ ma bùsuwa, aa gbãa mɛ́ an dasi lɛ́ vĩo, an swaa dɛ lán nↄ̀ↄmusu swaawa, an kãnkãnaↄ dɛ lán nↄ̀ↄkusi kãnkãnawa. 
Aa ma vɛ̃ɛliↄ ↄ̃̀ↄkpà, aa ma kaadↄɛnliↄ kɛ̀ kɛ́lɛkɛlɛ. Aa a tɛɛ wòlo kↄ̀lɛ, a gↄ̃na gↄ̃̀ kpá púuu. 
À búbuapɛ lán wɛ̃́ndia pↄ́ lɛ́ a gↄ̃kpama gaa ↄ́ↄlↄ à zwã̀nkasa kàkaalawa. 
Pↄ́wɛna ń vɛ̃ɛ gbao zↄ̃̀ɛ Lua kpɛ́u, sa'on Dii gbàgbanaↄ lɛ́ ↄ́ↄlↄ. 
Bua músikɛ̀, tↄↄlɛ gↄ̃̀ wɛ̃nannↄ, pↄ́wɛna ásookɛ̀, vɛ̃ɛbɛ í vĩo, ku i bↄo. 
Zↄ̃ɛↄ, à ↄku á wɛ́wa, vɛ̃ɛbudeↄ, à búbuapɛ. À ↄ́ↄlↄ mase ń éseo yã́ musu, asa bua pↄkɛkɛa i zɛkɛo. 
Vɛ̃ɛliↄ i'ò, kaadↄɛnliↄ lá dↄ̀ńzi ń gbɛafuↄ ń daminaↄ ń maoↄ. Sɛ̃̀a líↄ giigàga píi, pↄna làa gbɛ̃nazĩnaↄwa. 
Sa'onaↄ, à zwã̀nkasa kákaála à bala bↄ sↄu, Lua gbagbakĩi zĩkɛnaↄ, à búbuapɛ. Ma Lua gbàgbanaↄ, à mↄ i la ń zwã̀nkasaↄ daa, asa pↄ́wɛna ń vɛ̃ɛ gbao lɛ́ gɛ́ á Lua kpɛ́u lↄo. 
À lɛye dilɛ Lua pↄ́ ũ, à gbɛ̃́ↄ kãaa, à maezↄ̃ↄↄ sísi ń á bùsudeↄ píi aa mↄ wiilɛ Dii á Luawa a kpɛ́u. 
Agya! Asa Dii gↄↄ kãikũ̀, kaalɛgↄↄ pↄ́ Gbãapiide dìlɛ lɛ́ mↄ́. 
Pↄblea i láa wá wáao lé? Pↄna ń yaalↄo mìdɛ wá Lua kpɛ́u. 
Pↄ́wɛna gↄ̃̀ koosiinnↄ bùsukↄ̃ↄtɛ̃u, dↄ̃ↄ gↄ̃̀ yáiyai, gbaↄ gbòo, asa pↄ́wɛna gìɛ. 
Zuↄ wii gↄ̃̀ dↄ, asa sɛ̃ kuo, kpàsaↄ bílikɛ̀ gɛ́kĩiwa. Baa pↄtuo nɛ́naↄ lɛ́ ĩamaɛ. 
Dii, málɛ lɛzunzi, asa dã́dãkɛkĩiↄ tɛkũ̀ɛ, tɛ́lɛpiↄ sɛ̃sao líↄ sã̀sã píi. 
Baa sɛ̃̀anↄbↄↄ, n ni lɛ́ ń dɛ, asa swadↄↄↄ gↄ̃̀ gii píiɛ, mɛ́ an pↄblekĩiↄ tɛkũ̀. 
