﻿Zelemii.
22.
Yã́ pↄ́ Dii òn kɛ: Gɛ́ Yudaↄ kí bɛ, ní yã́ɛ bee oɛ̀. 
Yudaↄ kía pↄ́ zↄ̃lɛa Davidi kpalau, Dii yãma, mpi ń n ìwaↄ ń n gbɛ̃́ pↄ́ aaì gɛ̃ bↄlɛɛ beeuↄ. 
Dii mɛ̀, àli yãmaakɛ a zɛ́wa. Àli gbɛ̃́ pↄ́ wàlɛ gbãamↄɛ̀ bↄ aà wɛtãna ↄzĩ. Ásuli gbãamↄ bↄ̀mↄɛo ge tonɛ ge gyaa. Ásuli ń taiinkɛo. Ásuli yãesaide dɛ guɛ beeu lↄo. 
Asa tó álɛ zĩkɛ yã́piwa, kía pↄ́ zↄ̃lɛa Davidi kpalauↄ gɛ̃ bɛɛ bee bↄlɛpiu kua sↄ̃́goↄ guu ń dia sↄ̃́ↄ kpɛo ń ń ìwaↄ ń ń gbɛ̃́ↄɛ. 
Tó álɛ zĩkɛ yã́piↄwa sↄ̃o, ma Dii má sì ń mazĩao, bɛɛ beepi a gↄ̃ bɛzia ũɛ. 
Yã́ pↄ́ ma Dii má ò Yudaↄ kí bɛ musun kɛ: Ń dɛmɛɛ lán Galada bùsuwa, lán Libã bùsu gbɛ̀sĩsĩ misonawa. Ń beeo má tó ǹ gↄ̃ gbáa ũɛ, wɛ̃́lɛ pↄ́ gbɛ̃e ku a guuo ũ, 
mí bùsudɛnaↄ gbaɛma, an baade iↄ a gↄ̃kɛbↄↄ kũa, aai á sɛdɛ lí maaↄ zↄ̃zↄ̃ kátɛu. 
Buiↄ aaↄ dↄ wɛ̃́lɛɛ beepizi dasi, aai kↄ̃ lala aa mɛ: Bↄ́yãi Dii kɛ̀ mɛɛwiaɛ beeɛ kɛ́wai? 
Wi onɛ́, kɛ́ aa Dii ń Lua bàakuańnↄ yã́ tò we, aa gɛ̀ kùlɛ dii pãleↄnɛ aa zↄblènɛ́ yã́iɛ. 
Ásu ↄ́ↄlↄ gbɛ̃́ pↄ́ gà yã́ musuo, ásu waiyookɛɛ̀o. À ↄ́ↄlↄ gbɛ̃́ pↄ́ wà tàaànↄ yã́ musu, asa a sua vĩ lↄo, a wɛsi a bɛ bùsulɛ lↄo. 
Yã́ pↄ́ Dii ò Yudaↄ kí Saluũ pↄ́ zↄ̃̀lɛ a mae Yosia gbɛu yã́ musun kɛ, à mɛ̀: À bↄ̀ lakĩi, mɛ́ a su la lↄo. 
A ga gu pↄ́ wà tàuaànↄ zĩ̀zↄ ũɛ, a wɛsi bùsuɛ beepilɛ lↄo. 
Waiyoo kía pↄ́ bɛkpà, i a yãkɛkɛ a zɛ́wao, a tò a gbɛ̃́ↄ zĩkɛ̀ɛ pã. Waiyoo kía pↄ́ kpɛ́ↄ dìdikↄ̃a, i a yã́gↄ̃gↄ̃ a zɛ́wao, i fĩabo a zĩkɛnaↄnɛo. 
À mɛ̀ á ua tìisi kpa azĩaɛ ń kpɛ́ zↄ̃ↄ didiakↄ̃aↄ, á fɛnɛnti yaasanaↄ bↄbↄ, í sɛdɛ líↄ kpa a gĩↄwa kpɛ́kpɛ, í pↄ́ tɛ̃a lɛwà. 
N kíakɛá sɛdɛ lí dasi yã́ yã̀? N mae i pↄble à imìo lò? À yãmaakɛ̀ a zɛ́wa, ↄ̃ aà yã́ bↄ̀ maa. 
À zɛ̀ ń taasideↄ ń wɛ̃nadeↄ, ↄ̃ yã́ bↄ̀ɛ̀ maa. Kɛ́ a ma dↄ̃ yã́in weo lò? Ma Dii mámɛ má ò. 
Ń tò ↄvãi n wɛ́ ń n sↄ̃o blè ń yãesaidedɛao ń gbãamↄanɛ́o ń gbɛ̃́ↄ bↄ́ↄ'imiao. 
Ayãmɛto Dii yã́ɛ bee ò Yudaↄ kí Yosia nɛ́ Yoakiũ musu. Wa aà gɛ ↄ́ↄlↄ wà mɛ waiyoo gↄ̃ɛ, waiyoo nↄɛo. Wà aà gɛ ↄ́ↄlↄ wà mɛ, waiyoo ma dii, waiyoo ma kíao. 
Wa kɛ aà gɛɛ lá wì kɛ zàa'ĩn gɛɛwaɛ. Wa aà gɛ gálɛ bↄò Yelusalɛũ wà vũaa wɛ̃́nkpɛɛ. 
À gɛ wii pãlɛ Libã bùsuu, í búbuapɛ Basana bùsuu, í wiilɛ Abaliũ gbɛ musu, asa bui pↄ́ a yãyèńnↄↄ fùaɛ. 
Kɛ́ álɛ namable, má òɛ́, ↄ̃ a mɛ̀ á mao. Zɛ́ pↄ́ á bɛu za á ɛ̀waasogↄↄn we, íli swã́sɛ ma yã́io. 
Ĩana a á dↄaanaↄ sɛ́lɛ píiɛ, wi bui pↄ́ a yãyèńnↄↄ kṹkũ táńnↄ, á gɛɛ i gↄ̃ kpá á wɛ́i, wí i á kṹ á vãikɛaↄ yã́i. 
Á gbɛ̃́ pↄ́ á kú kpɛ́ pↄ́ wa dↄ̀ ń Libã líↄ guu, a sakpɛdà sɛdɛ lípiↄ musu, wãwã a mↄ́wá lán nɛ'iwãwãwaɛ, í aaukɛ à pelembo. 
Ma Dii má ò Yudaↄ kí Yɛkↄnia Yoakiũ nɛ́ɛ, baa kɛ́ ń dɛ tãana ũ ma ↄplaa ↄnɛwa, ń ma kuao má n bↄ ma ↄpiwaɛ. 
Mí n na gbɛ̃́ pↄ́ aalɛ n wɛↄnɛ ń ↄzĩ, gbɛ̃́ pↄ́ ńlɛ vĩakɛnɛ́ↄ, Babɛli kí Nɛbukanɛza ń Babiloniↄ. 
Mpi ń n da'iao, má á zu bùsu pãleuɛ, bùsu pↄ́ wi á iuo. We á gagau. 
Á e su bùsu pↄ́ áↄ a bɛɛkɛuo. 
Yɛkↄnia gbɛ̃́ bee dɛ oo pↄ́ wì wà sakàu ge pↄ́ pↄ́ gbɛ̃e yeio ũ yã̀? Bↄ́yãi wa aà zu ń a nɛ́ↄ bùsu pↄ́ aa dↄ̃o guui? 
Bùsude, bùsude, bùsudeↄ, à Dii yãma. 
Dii mɛ̀ gbɛ̃́pi tↄ́ dalau nɛ́sai, gbɛ̃́ pↄ́ a bↄ maa e a wɛ̃ni lɛ́uopi, asa aà nɛ́e a bↄ maao, an gbɛ̃e a e Yudaↄ kía ble à zↄ̃lɛ Davidi kpalauo. 
