﻿Isaia.
53.
Démɛ bao pↄ́ wá mà sìi? Démɛ Dii gbãa asiipi dↄ̃̀i? 
Aà zↄ̀blena fɛ̀lɛ aà aɛ lán lí vlãpaawa, lán lizĩna pↄ́ fù tↄↄlɛ giiu à bↄlↄbↄ̀wa. Aà kákaa ge aà zɛa maa i ka à gbɛ̃́ wɛ́ bleo, aà kɛfɛnkɛ i ka wà wɛ́tɛaàzio. 
Wà sakàaàgu wà bã̀nɛbↄ̀ɛ̀. Pↄsiadeɛ, a gyãeↄ dↄ́ɛ dↄ̃, a dɛ lán gbɛ̃́ pↄ́ wa ye wɛsiɛowa. Wa sakàaàgu, wi aà yãdao. 
Kási wá gyãↄ ↄ̃ a sɛa, à wá wãwãↄ dì a miwa. Ɔ̃ wa aà dìlɛ gbɛ̃́ pↄ́ Lua aà gbɛ̃̀ ũ, gbɛ̃́ pↄ́ Lua ↄkↄlↄmpàɛ̀ à widàwà ũ. 
Wà aà zↄ̃̀ wá tàaeↄ yã́i, wà aà kɛ̀'ĩa wá yãvãiↄ yã́i. Ĩa pↄ́ wa dàwàpi wá gbá aafia, aà flàala iaↄ mɛ́ wá gbãgbã. 
Wa sãsã wápii lán sãↄwa, baade azĩa zɛ́ sɛ̀, ↄ̃ Dii wápii vãikɛa dìɛ̀. 
Wà aà wɛtã̀ wà widàwà, ↄ̃ i lɛwɛ̃aao lán sã pↄ́ wàlɛ gɛ́ a kòlokpaiwa, a nílɛ kpɛ̃́ lán sã pↄ́ wàlɛ a kãkɛ̃ɛlɛwa. 
Wà aà kũ̀ ń gbãao, wà yã́kpalɛkɛ̀aànↄ. Wà aà bↄ̀ dṹniau ma gbɛ̃́ↄ tàae yã́i, wà aà dɛ̀ an gbɛ̃go pↄ́ lɛ́ ń dã́ ũ. Gbɛ̃́ pↄ́ kú aà gↄↄↄ, an démɛ yã́pi làasookɛ̀i? 
Baa kɛ́ i yãpãsĩkɛo, mɛ́ wi ma à ɛɛtòo, wà aà mia kpàkↄ̃i ń dàakɛnaↄ, ↄ̃ wà aà vĩ̀ ↄde miau. 
À kà Diigu à aà kɛ'ĩa aà taasikɛ. Lá à azĩa kɛ̀ tàae awakpabↄ ũ, a buikɛ, aà wɛ̃ni a gbã̀akũ, Dii pↄeã i bↄↄlɛkɛ aà sabai. 
Aà taasikɛa gbɛa a ɛa àↄ wɛ̃ni vĩ, i a namable. Ma zↄ̀blen maapi a to yã́ bↄ ń gbɛ̃́ↄ na dasi, kɛ́ aa aà dↄ̃ yã́i, asa a ń yãvãi di a miwa. 
A yã́i má aà baa daaa ń gbɛ̃zↄ̃ↄↄ, a zĩ̀ ài kpaalɛ ń gbãadeↄ, asa à gì a wɛ̃nii e à gɛ̀ gàò, wà aà gwà doũ ń dàakɛnaↄ. À gbɛ̃ dasiↄ duuna sɛ̀, à kulɛkɛ̀ Luaɛ tàaedeↄnɛ. 
