﻿Isaia.
43.
Tiasa ma Dii ma mɛ̀, á Yakↄbu buiↄ, mámɛ ma á kɛ́, á Isailiↄ, mámɛ ma á ikàsa. Ásu vĩakɛo, asa ma á bó, ma á sisi á tↄ́wa, a gↄ̃ ma pↄ́ ũ. 
Tó a gɛ̃ íu, a daálao, tó swa lɛ́ á ble, máↄ kúánↄɛ. Tó a gɛ̃ tɛ́u, a nawáo, tó a si tɛ́vuau, a kṹwáo. 
Asa mámɛmaa Dii á Lua, á Isailiↄ Lua pↄ́ ma kua adoa ũ, á Suabana ũ. Má Egipiↄ kɛɛ́ á gɛ̃ɛ ũ, má Etiopiↄ ń Sabaↄ kpá á gbɛu. 
Lá á bɛɛɛ vĩmɛɛ mɛ́ á gbiamɛɛ, mɛ́ má yeázi, má gbɛ̃́ↄ kpá á gɛ̃ɛ ũ, má buipãleↄ mipãakɛánↄ. 
Ásu vĩakɛo, asa máↄ kúánↄɛ, má bↄ ń á buiↄ gukpɛ oi, má á nɛ́ↄ kãaa bɛ'aɛ oi mà suńnↄ. 
Má o gugbãntoo oiɛ: Mↄò! Gɛↄmidↄkĩi sↄ̃: Ńsu gí ń kpáio! Su ń ma nɛgↄ̃ɛ pↄ́ kú zã̀zãↄ, su ń ma nɛnↄɛ pↄ́ kú tↄↄlɛ lɛ́waↄ, 
gbɛ̃́ pↄ́ ma tↄ́ kúmápiↄ, gbɛ̃́ pↄ́ ma ń ikàsa ma ń kɛ́ ma tↄbↄa yã́ipiↄ. 
Bↄ ń vĩ̀a wɛdepiↄ ń swãdo yãmanapiↄ. 
Bui píi kↄ̃ kãaa, bùsu píi gbɛ̃́ↄ kálɛa gudoũ. An démɛ yã́ bee dↄ̃ à dↄaa oi? An démɛ yãzi kã̀wɛ̃ɛ wá swã́wai? Aa bↄ ń ń seeladeↄ, aai ń yã'o, kɛ́ gbɛ̃́ↄ ma, aai mɛ sĩanaɛ! 
Ma Dii ma mɛ̀, ámɛ á ma seeladeↄ ũ, ma zↄ̀blena pↄ́ má sɛ̀ↄ ũ. Ma á sɛ́ kɛ́ à ma dↄ̃, í ma náaikɛ, íↄ dↄ̃ gbɛ̃́ pↄ́ má dɛ a ũ. Tã́ae ku ma ãao, mɛ́ an kee aↄ ku ma gbɛao. 
Mapi, mámɛmaa Dii, mɛ́ ma bàasio suabanae kuo. 
Mámɛ ma dↄaa ma yã'ò, ma á suabà, má dàɛ́ á dↄ̃̀, i kɛ dii zĩ̀lo pↄ́ kú á guue no. Ámɛ á ma seeladeↄ ũ, kɛ́ mámɛ má Lua ũ. 
Ao, má dɛ a ũ zadↄ̃ gↄↄ i daalɛo. Gbɛ̃e a fↄ̃ pↄe bↄ ma ↄuo. Tó málɛ yãkɛ, démɛ a kpamɛɛi? 
Ma Dii á Suabana, á Isailiↄ Lua pↄ́ ma kua adoa, ma mɛ̀, má gbɛ̃́ↄ gbaɛ Babɛliwa á yã́i, má Kaladeↄ nɛ gↄↄ pↄ́ aalɛ bàalɛ, má ń gulakɛa lilɛ aaukɛa ũ. 
Ma Dii á Lua pↄ́ ma kua adoa, á Isailiↄ Kɛna, á Kían ma ũ. 
Ma Dii ma zɛbↄ̀ ísiau, ma zɛ́ dà í zↄ̃ↄpi guu, 
má tò zĩkasↄ̃goↄ ń sↄ̃́ↄ sì zɛ́u ń zĩgↄ̃ↄ ń ń gbãao píi, ↄ̃ aa gↄ̃̀ kálɛa, aai fɛlɛ lↄo, aa mìdɛ lán filiadɛawa. 
Ásu làasookɛ yãziↄwa lↄo, ásu yã́ pↄ́ gɛ̃̀piↄ da lↄo. 
Gwa! Málɛ yã́ dafu kɛ sa. Kɛ́ yã́pi lɛ́ bↄ, i dↄ̃o lé? Málɛ zɛ́ fↄ̃́ gbáau, málɛ swaↄ bↄ gugiiu. 
Sɛ̃̀a nↄ̀bↄↄ ma tↄnasi, gbɛ̃gbonaↄ ń koohũhũnaↄ, asa málɛ í kpá gbáawa, málɛ swaↄ bↄ gugiiu, kɛ́ ma gbɛ̃́ pↄ́ má sɛ̀ↄ e imi, 
gbɛ̃́ pↄ́ ma ń kɛ́ mazĩa pↄ́ ũ kɛ́ aa ma táasilɛpiↄ. 
Yakↄbu buiↄ, i ma sísio, Isailiↄ, i ma kĩ́i wɛɛlɛ a kpasao. 
I mↄa ń sa pↄ́ wì a pↄ́ kátɛu à tɛ́kũ sãoo, i ma kpɛla ń á sa'obↄↄo. Mi pↄ́wɛn gba aso diɛ́o, mi ĩadawá ń tulaletikaamɛɛ tɛ́aoo. 
I tulaleti gĩnana lumɛɛo, i á sa'obↄ nísi kpaa ma kão, ↄ̃ a á duuna aso dìmɛɛ, a ĩadàa ń á yãvãiↄ. 
Mámɛmaa Dii, mi á tàaeↄ bãdɛ ma sùuu yã́i, mili tó á duuna yã́ dↄmagu lↄo. 
À á yã'omɛɛ wà gwa ń kↄ̃o, à dau siu lá a á bↄwa. 
Á dezi sɛ̃́ia duunakɛ̀, mɛ́ á ãnabiↄ bↄ̀ ma kpɛ. 
A yã́i má a kúkĩi gbɛ̃zↄ̃ↄↄ kpɛbↄ, má Yakↄbu buiↄ kpa kaalɛi, má Isailiↄ kpa sↄ̃́sↄ̃i. 
