﻿Salomↄↄ lɛ.
3.
Ma wɛ́ dↄ ma yenzidezi gwãasĩna ma wúlɛkĩi, ma aà wɛ̀ɛlɛ, mi aà eo. 
Má fɛlɛ gɛ́ zɛaↄ kɛɛlɛi saɛ, mí gbɛ̃́ pↄ́ ma nisĩna yeipi wɛɛlɛ gãaɛↄ. Ɔ̃ ma aà wɛ̀ɛlɛ, mi aà eo. 
Gudↄ̃anaↄ bↄ̀a, kɛ́ aalɛ bɛbɛ wɛ̃́lɛu, ↄ̃ ma mɛ̀: A gbɛ̃́ pↄ́ ma nisĩna yei è lae? 
Kɛ́ ma gɛ̃má gↄ̃̀ↄ, ma bↄ gbɛ̃́ pↄ́ ma nisĩna yeipiwa. Ma aà kũ̀, mi we ma aà gbàɛ lↄo e ma gɛ gɛ̃aànↄ ma dakpɛu e kpɛa pↄ́ à ma nↄsìu. 
Yelusalɛũ nɛnↄnaↄ, ma naɛ́ tueↄ ń zↄ̃́tɛ̃naↄzi, ásu dúsakũkpawɛ̃ɛo, ásu wá báasɛ̃ gbooo e a lɛ́ ká. 
Démɛ bↄ̀ gbáau, àlɛ mↄ́ lán tɛluwa keei? À lí'ↄ gĩnana tulaletikàtɛa ń laatanaↄ pↄ́ gĩnanaↄ píi. 
Salomↄↄ mákɛlɛ gwa kɛ, gↄ̃saↄ liaai gbɛ̃ↄn bàaↄ̃ Isaili nɛgↄ̃naↄnɛ. 
Aa fɛ̃ndaↄ kũa ḿpii, zĩ̀kan saↄnɛ! An baade fɛ̃nda looa gwãasĩn yã́ↄ yã́i. 
Kí Salomↄↄ a sɛbↄpi kɛ̀ ń Libã bùsu líoɛ. 
A lipɛlɛↄá ã́nusuɛ, a kpɛnakĩiá vuaɛ. Zwã̀a gàalulade kpa a zↄ̃lɛkĩia, a guuá Yelusalɛũ nɛnↄnaↄ yeanzi ↄgbɛɛ. 
Siↄna nɛnↄnaↄ, à bↄlɛ à mↄ́ kí Salomↄↄ gwa, a a kíakɛfua kpaa. Aà da mɛ́ kpàɛ̀ aà nↄsɛzĩ, gↄↄ pↄ́ aà nↄ̀sɛ lɛ́ yáalↄ. 
