﻿Salomↄↄ lɛ.
2.
Má dɛ lán Salↄna nàalɛvuwa, lán guzulɛ sũmaavuwa. 
Lá lávu kɛfɛna dɛ lɛↄ guu, màa ma gbɛ̃na dɛ wɛ̃́ndiaↄ guu. 
Lá mao lí dɛ líkpɛu, màa ma yenzide dɛ ɛ̀waasoↄ guu. Zↄ̃lɛa a uenai ì kamagu, a bɛ blea ì kɛmɛɛ na. 
À gɛ̃̀manↄ a pↄnablɛblekpɛu, aà dàlapoo pooamala báasɛ̃ ũ. 
À vɛ̃ɛbɛ gii kpaa kɛ́ mà yɛ̃̀ɛɛ e, à ma gba mao kɛ́ ma mɛ su, asa aà báasɛ̃ lɛ́ ma gyãkɛɛ. 
Aà ↄzɛɛ ku ma mi zíɛ, aà ↄplaa liaamazi. 
Yelusalɛũ nɛnↄnaↄ, ma naɛ́ tueↄ ń zↄ̃́tɛ̃naↄzi, ásu dúsakũkpawɛ̃ɛo, ásu wá báasɛ̃ gbooo e a lɛ́ ká. 
Ma yenzide kĩ́i ma, àlɛ mↄ́, à vĩ̀ lɛ́ pɛ́lɛpɛlɛ gbɛ̀sĩsĩↄwa, àlɛ bàalɛ sĩ̀sĩ musu, àlɛ vĩvĩ. 
Ma yenzide dɛmɛɛ lán tue ge bùasanawa. À aà gwa zɛ wá kpɛ́ kpɛ. Àlɛ wɛ́kpalɛ fɛnɛntiu, àlɛ gugwagwa a mↄↄ zãnguo. 
Ma yenzide yã'òmɛɛ à mɛ̀: Kía Ma gbɛ̃na kɛfɛna, fɛlɛ wà gɛ́, 
asa lou làa, buziɛ gɛ̃̀zɛa. 
Pↄ́pii lɛ́ vukɛ tↄↄlɛwa, lɛsigↄↄ kà, felenkↄpunaↄ ↄ́ lìgua wá bùsuu. 
Kaadↄɛnliↄ nɛ́ sɛ̃́ia dàalɛ, vɛ̃ɛliↄ vukɛ̀, a gĩ lòo. Ma gbɛ̃na kɛfɛna, fɛlɛ wà gɛ́. 
Ma felena, ń pɛ gbɛ̀sↄↄu n ulɛkĩi. To ma n wɛgwa, to ma n lↄↄ ma, asa n lↄↄ na, mɛ́ n oa kɛfɛũ kɛ̀ zài. 
À gbɛ̃gbonaↄ kṹkũwɛ̃ɛ, gbɛ̃gbon kelepiↄ, aalɛ wá vɛ̃ɛbuↄ ásookɛɛ, wá vɛ̃ɛ pↄ́ lɛ́ vukɛpiↄ. 
Ma yenzideá ma pↄ́ɛ, mɛ́ aà pↄ́n ma ũ, àlɛ pↄble sũmaavuↄ guu. 
Ma yenzide, e gu àↄ gɛ́ dↄi, e guwɛ àↄ gɛ́ kɛ̃́i, ɛa ǹ kɛ lá tue ge bùasan bↄlↄna ì kɛ gbɛ̀sĩsĩↄwawa. 
