﻿Soũↄ.
73.
Asafa lɛ. Lua ì ɛ̀fãaikɛ Isailiↄnɛ sĩanaɛ, ì maakɛ nↄ̀sɛpuadeↄnɛ. 
Mapi sↄ̃ ma kãikũ̀ ń lɛ́lɛao, ma gbá ye zãi guwa yãaɛ. 
Kɛ́ ma vãikɛnaↄ kua maa è, ma ĩ́andãnapiↄ gwea nidɛ̀. 
Yãe lí kpàlikpanɛ́o, aa aafia mɛ́ aa mɛkpaa. 
An wá lí wã lán dãↄwao, aali gyãkɛ lán deↄwao. 
Aaì ĩ́andãa da ń nↄɛ yàbaa ũ, aaì pãsĩ nańzi pↄkasa ũ. 
An oa ìↄ nísi bↄ, an kàamai dɛ ń pia. 
Aa gbɛ̃́laani vĩ, aaì boo gbɛ̃̀nɛ onɛ́, aaì naɛnaɛmá ń zↄ̃ↄkɛ yã́i. 
Aaì mɛ: Lua pila wà dɛ̃ɛka, mɛ́ an yã́ ì li dṹniaa. 
Ayãmɛto wì kɛnɛ́ kɛ̀kɛ, wì yã́ pↄ́ aa ò píi sí sĩana ũ. 
Aaì mɛ: Lua a dↄ̃ má ni? Musude dↄ̃a kà màae? 
Vãikɛnapiↄ gwa, aa yãe kã̀a vĩo, an gwea ìↄ kã́fĩ gↄↄpiiɛ. 
Asi ma nↄ̀sɛ pua pã yã̀? Ma a ↄbↄ̀lɛ tàaeu wásawasa pãɛa? 
Niↄ ma gbɛ̃ gↄↄpiiɛ, niↄ ma swã́gaga lá gu lɛ́ dↄ. 
Tó ma zɛ ń yã́ bee taa oaoɛ, bee aↄ dɛ bↄa n gbɛ̃́ↄ kpɛ ũɛ. 
Kɛ́ ma làasookɛ̀ yã́piwa mà dↄ̃, à kɛ̀mɛɛ zĩ'ũɛ, 
e ma gɛ gɛ̃ò Lua kúkĩi, ↄ̃ ma wɛ́ gbàsa kɛ̃̀ an láaa yã́ musu. 
Ni ń da gu zãandeu, ni ↄzↄ̃ńzi aa gↄ̃ ń liaao. 
Aaì gↄ̃ kaalɛpↄ ũ kã́ndo, vĩa pↄ́ↄ ì ń le, aa midɛ. 
Lá nana ì gɛ̃zɛa, tó gbɛ̃́ vù, tó n fɛlɛ Dii, ńyↄ̃ to aa gɛ̃ ń ĩ́anao màaɛ. 
Kɛ́ ma nↄ̀sɛ ↄ̃̀ↄkpà, mɛ́ ma pↄ yà, 
ma sↄũkũ̀, má yãe dↄ̃o, ma gↄ̃ n kĩ́i lán nↄ̀bↄwa. 
N beeo má kunnↄ gↄↄpiiɛ, n ma kũ ma ↄplaawa. 
Ni dↄaamɛɛ ń n lɛdaaao, bee gbɛa ńyↄ̃ ma ka àizãnawa. 
Ma wɛ́ dↄ gbɛ̃ezi musuo, n bàasio, kuannↄ guu pↄe ni lɛ́ ma dɛ tↄↄlɛo. 
Baa tó ma mɛ ń ma sↄ̃o yɛ̃̀ɛɛ lɛ́ láa, Lua mɛ́ ì to ma sↄ̃ gbãakũ, ↄ̃mɛ ma baa ũ gↄↄpii. 
Asa gbɛ̃́ pↄ́ kɛ̃̀maↄ midɛɛ, ńyↄ̃ n gbɛ̃́ pↄ́ bↄ̀ n kpɛↄ bãdɛ. 
Lua, sↄ̃́aanzi mɛ́ kɛ̀mɛɛ na, Dii Lua, ma n kɛ ma ulɛkĩi ũɛ. Má n yãkɛaↄ dau mà siunɛ́. 
