﻿Soũↄ.
69.
Davidi lɛ. 
Lua, ma suaba, asa í ma kũ ma nↄɛɛ. 
Dɛɛ lɛ́ ma mↄ́, ma ka zã̀, tepɛkĩi kuo. Ma kpalɛ ísiu, ísↄ̃ lɛ́ damala. 
Ma wiilɛ̀ ma kpasa, ma kòlo nàaa, ma wɛdↄ̀ ma Luazi e ma wɛ́ gɛ̀ lɛ́ wo. 
Gbɛ̃́ pↄ́ aa zamagu pãↄ dasi dɛ ma mikãa, ma ibɛɛ pↄ́ aa ye ma dɛ pↄewiwinɛ́saiↄ lɛ́ vĩo. Pↄ́ pↄ́ mi a kpã́i'oo ↄ̃ aa mɛ̀ mà a nɛ'i mà kpá. 
Lua, ń ma mìsaiyãↄ dↄ̃, ma tàaeↄ ulɛanɛo. 
Dii Lua Zĩgↄ̃de, gbɛ̃́ pↄ́ an wɛ́ dↄnziↄ ńsu to wí ń kṹ ma yã́io. Isailiↄ Lua, gbɛ̃́ pↄ́ aaì n kĩ́i wɛɛlɛↄ ńsu to an tↄ́ ↄ̃̀ↄkpa ma yã́io. 
Asa n yã́i mi sↄ̃́sↄ̃a fↄ̃i, ↄ̃ ma gɛɛ gↄ̃̀ kpa ma wɛ́i. 
Ma gↄ̃ zĩ̀lo ũ ma gbɛ̃́ↄ guu, ma gↄ̃ gbɛ̃ando ũ ma da bɛdeↄ guu. 
N kpɛ́ yã́ ma kũ gbãa, àlɛ ma ibaba, n sↄ̃̀sↄ̃naↄ n sↄ̃́sↄ̃a gↄ̃̀mɛɛ. 
Mi lɛye pↄsia guu, ↄ̃ wìↄ ma sↄ̃sↄ̃. 
Mi zwã̀nkasaↄ fĩfĩa, ↄ̃ wìↄ ma kɛ pↄ́ↄpↄↄ. 
Gbɛ̃́ pↄ́ zↄ̃lɛ gãaɛↄ ì ma pe, ígbãaminaↄ ì lɛdamanↄ. 
Dii, málɛ wabikɛma, ńsu to à bↄ n pↄ kpɛo, wea Lua, n gbɛ̃kɛ zↄ̃ↄ yã́i, ní ma suaba sĩana. 
Ma bↄ bɛ̀lɛu, ńsu to mà kpálɛuo. Ma bↄ ísiu, ma si ma zangudeↄwa. 
Ńsu to ísↄ̃ damalao, ńsu to mà kpálɛ ísiuo, ńsu to wà tɛ̃́ɛna kamalao. 
Wea Dii, asa n gbɛ̃kɛ maa, ma wɛgwa n sùuu zↄ̃ↄ guu. 
Ńsu mikpɛli n zↄ̀blenaɛo, wea kpakpa, asa ma gↄ̃ yeelɛaɛ. 
Sↄ̃mazi, ma misi, ma suaba ma ibɛɛↄ yã́i. 
Ń ma sↄ̃́sↄ̃a ń widaaao ń ma kpɛbↄao dↄ̃, ńlɛ gbɛ̃́ pↄ́ aa yã́kũamanↄↄ e. 
Sↄ̃́sↄ̃a ma sↄ̃ zↄ̃̀, ma gↄ̃ yɛ̃̀ɛɛsai, gbɛ̃́ pↄ́ a ma wɛgwa ↄ̃ má wɛ̀ɛlɛ, mi eo, gbɛ̃́ pↄ́ a ma nↄ̀sɛ nínimɛɛ ↄ̃ ma wɛdↄ̀i, a kuo. 
Aa ɛsɛ vãi kàmɛɛ blɛu, kɛ́ imi ma kũ gbãa, aa vɛ̃ɛ kũ̀ma kpàa. 
To an dikpɛkɛa gↄ̃nɛ́ bai ũ, wà ń kṹ, to an kua aafia yã'inɛ́. 
To an wɛ́ siakũ, kɛ́ aasu gu'eo, to an wó gↄ̃ koolonnↄ gↄↄpii. 
Ǹ n kpɛ̃nɛmuu bↄbↄmá, ǹ n pↄkũma pãsĩ pisimá. 
An bòo gↄ̃ bòo zia ũ, an gbɛ̃e su àↄ ku kɛ́ à zↄ̃lɛ ń kpɛ́u lↄo, 
asa aaì ĩada gbɛ̃́ pↄ́ ń gbɛ̃̀waɛ, aaì gbɛ̃́ pↄ́ ń zↄ̃̀ wãwã galikɛ. 
Ǹ ń yã́ píi tàaeↄ dańla, an baa su àↄ ku n gbɛ̃suabaa guuo. 
Ǹ ń tↄ́ waa wɛ̃ni taala guu, an tↄ́ su àↄ ku lá doũ guu ń gbɛ̃maaↄ tↄ́oo. 
Lua, má kú taasi ń yã'ↄ̃mao guu, ma sɛ lɛsĩ mà bↄu aafia. 
Má Lua tↄbↄ lɛsia guu, má aà sáaukpa mà aà kã́fĩ. 
Bee a ka Diigu dɛ sa'oa ń zuoa, a kɛɛ̀ na dɛ zugaaena kↄ́badea. 
Taasideↄ e, aai pↄnakɛ, á luakĩiwɛɛlɛnaↄ á sↄ̃ i níni. 
Asa Dii ì wɛ̃nadeↄ yãma, ìli saka a gbɛ̃́ pↄ́ dɛ zĩ̀zↄ ũↄguo. 
À aà táasilɛ musu ń tↄↄlɛo, ísia ń pↄ́ pↄ́ kú a guuↄ píi. 
Asa Lua a Siↄna suaba, a ɛa Yuda wɛ̃́lɛↄ kálɛ, aà gbɛ̃́ↄ i zↄ̃lɛu ń pↄ́ ũ. 
Aà zↄ̀blenaↄ nɛ́ↄ mɛ́ aa gↄ̃ vĩ, gbɛ̃́ pↄ́ ye aà tↄ́ naipiↄ iↄ ku a guu. 
