﻿Soũↄ.
42.
Kole buiↄ lɛ. 
Lá tue ì swa saɛ nidɛ, màa n ni ku ma sↄ̃u, Lua. 
Lua ni lɛ́ ma dɛ, Lua bɛ̃́ɛpi. Bↄɛ má e gɛ wɛsiaàlɛi? 
Wɛ́'i mɛ́ gↄ̃̀ ma pↄblea ũ fãanɛ ń gwãasĩnao. Wìↄ omɛɛ gↄↄpii: N Lua ku máɛ la? 
Yã́ɛ beeↄ dↄ̀magu, ↄ̃ málɛ ma nↄ̀sɛ yã́ↄ bↄlɛ. Miↄ gɛ́ yãa bíla guu e Lua ua, gbɛ̃́ↄ ì dↄdↄkↄ̃wa ma kpɛ ń gulao, dikpɛkɛnaↄ ì nↄnↄaa ń táasilɛao. 
Bↄ́yãi ma sↄ̃ ↄ̃̀ↄkpài? Bↄ́yãi ma nↄ̀sɛ yài? Sema màↄ wɛdↄ Luazi, asa má ɛa màↄ aà táasilɛ, ma Suabana, ma Lua. 
Ma sↄ̃ ↄ̃̀ↄkpà ↄ̃ n yã́ dↄ̀magu za Mizaa gbɛpↄlɛu Yuudɛ̃ mii, za Ɛɛmↄ gbɛ̀sĩsĩↄ sↄ̀ↄu. 
Ni to isukaa kↄ̃fĩ àↄ dↄ, ísiↄ lɛ́ lɛzukↄ̃i, ń tò í lɛ́ damala, a sↄ̃́ lɛ́ tamanↄ. 
Dii ì gbɛ̃kɛkɛmɛɛ fãanɛ, aà lɛ ìↄ dↄ ma lɛ́u gwãasĩna wabikɛa Lua pↄ́ ma wɛ̃ni ũwa. 
Mi o Lua ma gbɛsiɛ: Bↄ́yãi ma yã́ sã̀ngui? Bↄ́yãi ń tò miↄ bɛ oosisia wɛ́tɛ̃a pↄ́ ma ibɛɛ lɛ́ mↄmɛɛ yã́ii? 
Ma ĩadamadeↄ ì ma sↄ̃́sↄ̃, ma wá ìↄ wí, aaìↄ omɛɛ gↄↄpii: N Lua ku máɛ la? 
Bↄ́yãi ma sↄ̃ ↄ̃̀ↄkpài? Bↄ́yãi ma nↄ̀sɛ yài? Sema màↄ wɛdↄ Luazi, asa má ɛa màↄ aà táasilɛ, ma Suabana, ma Lua. 
