﻿Soũↄ.
32.
Davidi lɛ. Báaaden gbɛ̃́ pↄ́ Dii aà tàae wòlowà à aà duuna kɛ̃̀wà ũ. 
Báaaden gbɛ̃́ pↄ́ Dii lí aà tàae yãda lↄo mɛ́ mↄafili kú aà nↄ̀sɛ guuo ũ. 
Kɛ́ má nílɛ ń ma duunao, ma ibàba, ma wii ìↄ dↄ za kↄↄ e oosi. 
N ↄtↄ̃ↄlɛaa fãanɛ ń gwãasĩnao, ma yɛ̃̀ɛɛ làa lá guantɛ̃na ĩatɛ̃ ma gbɛ̃wa. 
Ɔ̃ ma wenɛ ma duunai, mi a yãvãi ulɛnɛ lↄo. Ma mɛ̀ má a tàaeↄ onɛ Dii, ↄ̃ n ma duuna kɛ̃̀a. 
N náaikɛna wabikɛma a gↄↄwa, tó yã'ĩa lɛ́ mↄ́, a aà le lↄo. 
Ma ulɛkĩin n ũ, ni ma bↄ wɛ́tɛ̃a guu, ni liamazi ǹ ma suaba. 
Dii òmɛɛ à mɛ̀: Má yãdanɛ, mí n da zɛ́ pↄ́ dɛ ǹ sɛwa, má lɛdama, míↄ wɛ́tɛnzi. 
Ńsu ǹyↄ̃ ku làasoosai lán sↄ̃́ ge sↄ̃baonawao. Tó ni ã̀asĩna kánɛ́ ge kpío, aali n dↄ̀ↄ sɛo. 
Yã'ↄ̃ma ì li gbɛ̃vãiↄla, Dii gbɛ̃kɛ ì li aà náaikɛnaↄla. 
Gbɛ̃maaↄ, à pↄnakɛ ń Diio, nↄ̀sɛpuadeↄ, à gulakɛ, í yáalↄ. 
