﻿Yobu.
36.
Ɛlihu ɛ̀a pɛ̀ a yã́lɛ à mɛ̀: 
Mɛnakɛ yↄↄ, mí ɛa onɛ yã́ pↄ́ tò Lua yã́ mɛ́ kú. 
Mí bↄnɛ ń ma dↄ̃a pↄ́ i bↄ kãioo, mí yãnakpa ma Kɛnawa. 
Ǹyↄ̃ dↄ̃ sã́asã kɛ́ ma yã́ ɛɛ vĩo, ma ↄ̃nↄpaɛmade má kunnↄ. 
Lua zↄ̃ↄ, kási ìli saka gbɛ̃eguo, a zↄ̃ↄ, yã́ pↄ́ à zɛ̀ò lilɛa vĩo. 
Ìli gbɛ̃vãi to aàↄ kuo, ì yã́gↄ̃gↄ̃ wɛ̃nadeↄnɛ a zɛ́waɛ. 
Aà wɛ́ lí go gbɛ̃maaↄwao, ì ń kpá kpalau ń kíaↄ sãnu, ì to aaↄ kible gↄↄpii, aai tↄbↄ. 
Tó wà gbɛ̃́ↄ yèye ń mↄdaonaↄ, tó wà wɛ́tɛ̃a ba kã̀nɛ́, 
Lua ì yã́ pↄ́ aa kɛ̀ↄ onɛ́, ↄ̃ aai dↄ̃ kɛ́ wà dↄ̀ɛwà, wà tàaekɛ̀ɛ̀. 
Ì ń swã́ busanɛ́, kɛ́ aa e yãma yã́i, ì dilɛnɛ́ aa mikɛ̃ yãvãiwa. 
Tó aa aà yãmà mɛ́ aa zↄblèɛ̀, aa láa maa, aai ká ń gↄↄwa ń namao. 
Tó aa gì mai, wa ń dɛdɛ ń fɛ̃ndaoɛ, aa kpagua dↄ̃a kɛ̃́sãma yã́i. 
Luayãdansaiↄ ìↄ ĩ́ikũa ń sↄ̃u, baa tó Lua ń yé ń mↄdaonaↄ, aali awakpaɛ̀o. 
Aaì ɛɛ wà gaga ń ɛ̀waasogↄↄ lán gↄ̃ɛ káaluaↄ gaawa. 
Lua ì to wɛ̃na gbɛ̃́ le kɛ́ à aà bↄ yã́iɛ, ì to wà gbãamↄ gbɛ̃́ɛ, kɛ́ aà swã́ e busa. 
Màa àlɛ n sisi à n bↄ n yooyeau, i gɛnnↄ dɛ̀ɛpookĩi, ní gↄ̃ nzĩaɛ dↄdↄa, n táabũnu aↄ fòona vĩo ń blɛ maaↄ. 
Lua tàae'ea lán gbɛ̃vãiwa lɛ́ í sima, n aà tàae è, ↄ̃ àlɛ n swãgaga. 
Laaika kɛ́ àizɛɛ su n wɛ́ bleo, ńsu to gbagusaɛ zↄ̃ↄ n làasoo liaao. 
N wiilɛa a fↄ̃ n bↄ taasiue? Baa ń dɛ̃ɛ sa pↄ́ ńlɛ kao píi. 
Ńsu gwãasĩna nidɛo, gbɛ̃nazĩna ã́nuatoa gↄↄpi. 
Laaika zɛa ń vãioi, asa wãwãpi n le kɛ́ ǹ kɛ̃ vãiwa yã́iɛ. 
Lua dɛ pↄ́piia a gbãa yã́i. Démɛ yãdanɛde ũ laaàwai? 
Démɛ aà yãkɛaↄ zɛ́ kàlɛɛ̀i? Démɛ a fↄ̃ oɛ̀ à vãikɛ̀i? 
To aà zĩ maaboa àↄ dↄngu, aà yã́ pↄ́ wà lɛdàò wì sipiↄ. 
Gbɛ̃́pii wɛsì aà pↄkɛapiↄlɛ, baade lɛ́ gwa kãaa. 
Lua dɛ pↄ́piia, aà zↄ̃ↄkɛ dɛ wá dↄ̃ala, wa fↄ̃ wà aà wɛ̃ dↄdↄ wà a lɛ́ dↄ̃o. 
Ì í pusu gálɛ suowa, ↄ̃ ì to à ma lou ũ à ɛa ta swai. 
Ì to lou sisi à kwɛ à í zↄ̃ↄ bↄ gbɛ̃nazĩnaↄnɛ. 
Démɛ lousisia daa gua yáasi dↄ̃i? Démɛ aà kↄ̃fĩ gbãa bↄkĩi gbadↄ̃i? 
Gwa! Ì to loupilɛa dagua, a gupua ì kúlɛ ísiaa e títiu. 
Ì kibleò bui píiwa, ì blɛ kpaomá àↄ dińzi. 
A loupilɛa naa a ↄzĩ, ↄ̃ ì pↄ́ pↄ́ a yei aà suwà oɛ̀. 
Aà kↄ̃fĩ ìↄ aà baokpa, baa pↄtuoↄ ì dↄ̃ kɛ́ à kà kãi. 
