﻿Ikoyã.
14.
Dii á Lua nɛ́ↄn á ũ. Ásu à á mɛ líli ge à á mi bo gɛ yã́ musuo, 
asa Dii á Lua gbɛ̃́ pↄ́ an kua adoaↄn á ũ. À á sɛ́ dṹnia buiↄ guu a gbɛ̃́ yenzideↄ ũɛ. 
Ásu tɛ̃e bleo. 
Nↄ̀ↄ pↄ́ áli sóↄn kɛ: Zu, sã, ble, 
bana, tue, bua, sae, yaa, gbↄ, kpasaa. 
Nↄ̀ↄ pↄ́ a swɛ paaa pla mɛ́ ì pↄbↄ a kòlou à ɛa àↄ só, àli beeↄ só. 
Tó a swɛ paaa plao, ge ìli pↄbↄ a kòlou à ɛ̀a sòo, ásuli sóo. Ásu yiongo ge kífɛ̃nɛna ge ɛ̃́n'ui'uina soo. Aaì pↄbↄ ń kòlou aa ɛa só, ãma an swɛ paaao. À nↄ̀ↄ beeↄ tɛ̃́. 
Sàwa swɛ paaa, kási ásu soo, asa ìli pↄbↄ a kòlou à ɛ̀a sòo. À nↄ̀ↄ beeↄ tɛ̃́. Ásu ↄkã a gɛwa seo. 
Pↄ́ pↄ́ kú í guu, tó a ka ń tɛɛo vĩ, àli só. 
Pↄ́ pↄ́ ka ń tɛɛo vĩ sↄ̃o, à tɛ̃́, ásuli sóo. 
Àli bã pↄ́ wi dilɛ tɛ̃ ũoↄ só píi. 
Bã pↄ́ áli sóoↄ tↄ́n kɛ: Yãamusu, kúu, bãso, 
baɛ, zabã, bleaa bui píi, 
gbagbaa bui píi, 
koohũhũna, taataa, yaabɛɛ bui píi, 
koo bui píi, bãyakpa, fana, 
gáu, tɛɛpili, kpↄbↄ'ilɛna, 
wàaliana, yaapuna bui píi, wɛlɛmbã, sasi. 
À kↄ̀ↄ gã̀sĩadeↄ tɛ̃ píi, ásu soo, 
a gã̀sĩade pↄ́ dɛ tɛ̃ ũoↄ bàasi. 
Ásu pↄ́ pↄ́ gà ń azĩao soo. À kpa bↄ̀mↄ pↄ́ kú á uawa aà so ge à yía buipãlewa. Ápiↄ, Dii á Lua gbɛ̃́ pↄ́ an kua adoaↄn á ũ. Ásuli blenɛ nↄ̀ↄ kuu ń a da yↄ̃́'ioo. 
Àliↄ á bua pↄ́wɛna kwide kpa wɛ̃ ń wɛ̃o. 
Àli ble Dii á Lua aɛ gu pↄ́ a sɛ àli a sísiu, á pↄ́wɛna ń á vɛ̃ɛo ń á nísio ń á pↄtuo nɛsana sɛ̃́iaↄ, kɛ́ à e àↄ Dii á Lua vĩa vĩ gↄↄpii yã́i. 
Tó gu pↄ́ Dii a sɛpi asu àↄ zã̀ɛ, mɛ́ á fↄ̃ sɛ à gɛò we píio báaa pↄ́ a dàágupi yã́i, 
à yía, í gɛ́ ń a ↄ̃ao we. 
Àli pↄ́ pↄ́ á yei lú ń ↄ̃apio, zu ge sã ge vɛ̃ɛ ge wɛ̃ ge pↄ́ pↄ́ á pↄ gbà píi, í ble Dii á Lua aɛ we à pↄnakɛò, ápiↄ ń á bɛdeↄ píi. 
Ásu niazĩkpa Levii bui pↄ́ kú á wɛ̃́lɛuↄzio, asa aa bùsu kpaalɛsɛánↄo. 
Àli wɛ̃̀ àaↄ̃de pↄ́ kwide kálɛ á wɛ̃́lɛↄu, 
á wɛ̃́lɛ Levii bui pↄ́ aa bùsu kpaalɛsɛánↄoↄ ń bↄ̀mↄↄ ń nɛtonɛ pↄ́ gwana vĩoↄ ń gyaa taasideↄ aai mↄ ble aa kã́, Dii á Lua i báaadaágu zĩ pↄ́ álɛ kɛ yã́ musu píi. 
